Pô čih tơlơi pơhing phrâo Lê Quốc Minh, Ding kơna Ping gah dêh čar ta, Khua Khul wai lăng bruă pôr pơhing Việt Nam. Kơ-iăng Khua Grŭp pơtô bruă Ping gah dêh čar, Khua git gai bruă Hră pơhing phrâo Nhân Dân brơi thâo: Rơgao rim tal pơphun pri hră pơhing phrâo lŏn ia, tơlơi lăp mơ-ak hloh anun lĕ rơwang kơplah wah hră pơhing Dêh čar hăng tơring čar, ƀôn prong ƀơƀrư̆ jê̆ tui. Hmâo hơdôm pri A gah hră pơhing tơring čar, ƀôn prong ƀudah ƀirô čih tơlơi pơhing anet. Anô̆ klă hơdôm tơlơi čih pơhing pơplông dưm kơnar hloh. Anô̆ pơdah rơđah dong lĕ ƀirô čih tơlơi pơhing tơring čar, ƀôn prong ră anai yua prăk kơ bruă čih tơlơi pơhing amăng internet hmâo akô̆ tlôn hloh. Hơdôm bôh anom bruă pơtui jua pơhiăp, pơdah rŭp tơring čar, ƀôn prong ăt amra dưi ngă mơn hơdôm tơlơi čih kơjăp hloh. Gah bruă pơphun ngă Lơphet jao pri hră pơhing Lŏn ia tal 18, Pô čih tơlơi pơhing Lê Quốc Minh lăi pơthâo:

 “Thun anai ngă Lơphet ƀơk pri Hră pơhing lŏn ia dưi pơphun phara biă, tui hăng hơdră ngă ha jăn. Ƀing gơmơi mă mơnuih hmâo mă pri ngă phun ñu. Mơnuih đĭ čơkă mă pri ƀuh ư-ang hăng bơni kơ pri mơ̆ gơñu hmâo mă. Wot mơnuih dô̆ lăng ăt ƀuh ư-ang mơn kơ bôh tơhnal mơ̆ ƀing gŏp pô dưi ngă. Hơdră pơphun phrâo tui anun amra ngă pơhưč pran jua kơ ƀing akă hmâo mă pri hăng pơđĭ tui mơnuih hmâo mă pri pioh ƀing ta ƀuh anô̆ klă bruă čih tơlơi pơhing phrâo lŏn ia lăp djơ̆ tơhnal lĕ pri hră pơhing yôm phăn hloh mơ̆ng lŏn ia Việt Nam”.

Tui hăng pô čih tơlơi pơhing phrâo Lê Quốc Minh, Khua Khul wai lăng mơnuih čih tơlơi pơhing phrâo Việt Nam, hră pơhing rơnuk anai khom hmâo hơdôm tơlơi pơplih phrâo hăng pơčeh phrâo na nao. Čang rơmang hơdôm bôh ƀirô čih tơlơi pơhing amra ngă tui lơm pơplih mrô truh kih, pơplih phrâo pơčeh phrâo na nao, hmâo hơdră ngă hrečh bruă pôr pơhing hăng biă ñu khom đing nao tơlơi klă pioh mơnuih lăng hmư̆ đing nao, ngă pơhưč pran jua mơnuih lăng hmư̆ phrâo, djă pioh bruă ba jơlan hlâo amăng pôr pơhing mơnuih thâo hră kơ mơnuih mơnam. Hơdôm hrơi rơgao, khă bưp lu tơlơi tơnap, tơlơi lông, samơ̆ Khul leng kơ ngă giong sôh hơdôm bôh yôm bruă mă ba tơbiă hăng hmâo lu anô̆ rơđah. Mơ̆ng anun djru ngă giong klă bruă kơđi čar mơ̆ng Khul mơnuih čih tơlơi pơhing Việt Nam hơdôm hrơi rơgao:

 “Mơ̆ng akô̆ rơwang bruă truh ră anai, Khul Ping gah, Grŭp apăn bruă, Grŭp mă bruă hăng Khul gum hrŏm hơbit, tŭ ư hrŏm amăng bruă git gai, črâo ba hơdôm gưl Khul, bruă mă mơ̆ng hơdôm gưl Khul amăng đơ đam dêh čar hmâo lu gru rơđah, pơplih klă; hmao tlôn thâo tơlơi pơmin, tơlơi čang rơmang mơ̆ng mơnuih čih tơlơi pơhing amăng khul, đing nao pơsir djru hơđong tơlơi pơmin, gum hrŏm hơbit pơlir nao rai”.

Khul čih tơlơi pơhing Việt Nam ră anai hmâo rơbêh kơ 25.000 čô mơnuih glăk gum hrŏm khul ƀơi 307 bôh anih anom gưl Khul. Dong mơ̆ng akô̆ rơwang bruă truh ră anai, Anom pơhrăm bruă čih tơlơi pơhing mơ̆ng Khul hmâo pơphun rơbêh kơ 256 bôh anih pơhrăm brơi giăm truh 9.000 wot čô mơnuih mơ̆ng khul amăng đơ đam dêh čar. Hrŏm hăng anun brơi thâo, hơdôm gưl Khul mơ̆ng dêh čar truh pơ̆ tơring čar, ƀôn prong hmâo pơjing rơbêh kơ 250 Khul pơsir tơlơi ngă sôh gah pran jua mă bruă mơ̆ng mơnuih čih tơlơi pơhing Việt Nam hăng mă bruă jai hrơi jai kơjăp, hmâo pơsir hmao tlôn hăng tơpă sa dua mơta tơlơi ngă soh phiăn hăng pran jua mă bruă.

Phrâo anai, ƀơi mông mă bruă hăng Khul čih tơlơi pơhing dêh čar Việt Nam, Khua Grŭp pơtô bruă Ping gah dêh čar ta Nguyễn Trọng Nghĩa lăi rơđah: hơdôm hrơi pơ̆ anăp, Ping gah Khul mơnuih čih tơlơi pơhing phrâo Việt Nam khom đing nao dong bruă pơtô juăt kơđi čar, tơlơi pơmin pioh mơnuih čih tơlơi pơhing thâo dơlăm bruă mă tơlơi pơhing lĕ bruă hơkrŭ, mơnuih čih tơlơi pơhing lĕ mơnuih ba jơlan hlâo amăng tơlơi pơmin – bôh thâo mơ̆ng Ping gah; ngă tui klă dong bruă pô mă, ngă tui ba glăi bôh tơhnal bruă kơđi čar dưi hmâo Ping gah, Kơnuk kơna hăng mơnuih ƀôn sang đăo kơnang, jao bruă.

 “Khul mơnuih čih tơlơi pơhing phrâo Việt Nam khom jing anăn đăo kơnang, jing anih kơnang gah bruă čih pơhing, bruă mă pioh hơdôm bôh ƀirô čih tơlơi pơhing gir run, hơduah ĕp pơplih phrâo pô, sit nik jing glông pôr pơhing djơ̆, hmao tlôn, kiăo tui bôh nik mơ̆ng lŏn ia, jua suă mơ̆ng tơlơi hơdip mơda, mơ̆ng anun ngă tui bruă pơsit jơlan gah tơlơi pơhing, pơjing pran djơ̆ hrŏm amăng mơnuih mơnam, djă kơjăp bruă pô mă jing tơlơi pơhing sit, lăp đăo kơnang pioh kơ mơnuih ƀôn sang. Rim tơlơi čih pơhing khom jing tơlơi čih hmâo tơhnal bôh thâo, pơtô juăt. Rim mơnuih čih tơlơi pơhing khom sit nik jing sa ling tơhan ƀơi tơdrŏn tơlơi pơmin hăng “mơta rơđah, pran jua tơpă, čih kơjăp”, tañ amăng bruă mă, khin bŏng glăi hăng hơdôm tơlơi ngă soh, djă kơjăp drơi pô ƀơi anăp hơdôm tơlơi lông, tơlơi plư juăt hmâo...”

Ƀrô djơ̆ tal Hơdor glăi 99 thun Hrơi Hră pơhing phrâo Hơkrŭ Việt Nam, Khua Grŭp pơtô bruă Ping gah dêh čar ta ơi Nguyễn Trọng Nghĩa hơ-ưč hmưi kơ Khul mơnuih čih tơlơi pơhing Việt Nam jai hrơi jai lăp djơ̆ lĕ khul kơđi čar – mơnuih mơnam – bruă mă yôm phăn mơ̆ng đơ đam dêh čar, jing “sang dô̆ hrŏm” tum pơƀut, gum hrŏm hơbit hyu djop mơnuih čih tơlơi pơhing đơ đam dêh čar./.