Ƀơi tơring čar Dak Lak, sa amăng hơdôm tơring čar hơmâo bruă pơtô hrăm prong hloh amăng kual Dap Kơdư, bruă dăp glăi sang hră, pơmut hrŏm lu sang hră anet hlăk pok pơhai hăng lu bruă či ngă. Đơ đam tơring čar ră anai hơmâo 1.267 boh anih pơtô hrăm hră, sang hră pơtô bruă mă gah kơnuk kơna wai lăng hăng rơbêh 40.400 čô khua mua, nai pơtô hrăm hră, mơnuih mă bruă amăng sang hră, gơnong bruă pơtô hrăm. Tui hăng hơdră dăp glăi, mrô mơnuih ngă khua wai lăng amăng sang hră giong dăp glăi dŏ năng ai 655 boh sang hră.

Bruă dăp glăi sang hră, pơhrŏ mrô mơnuih ngă khua sang hră wai lăng ƀing nai pơtô ƀu kơnong ngă hrŏ mrô khua đôc ôh, dŏ anăp nao tơhnal pơkă pơđĭ tui bruă pơtô hrăm. Khă tui anun, hrŏm hăng anun, bruă či kiăng amăng bruă dăp mơnuih apăn bruă ngă khua, ruah khua sang hră, kơ-iăng khua sang hră ƀơi djop sang hră pơmut glăi. Jơnum min mơnuih ƀôn sang tơring čar Dak Lak, ruah mă ƀing khua mua gitt gai wai lăng amăng bruă pơtô hrăm, lăng nao kơ tơlơi pơtrun tong ten, pơhaih rơđah, tơpă hnơ̆ng hăng hơmâo tơlơi pơsit tŭ yua. Hơdôm tơlơi či sem lăng, kah hăng thun, tơlơi thâo amăng bruă mă, tơlơi hrăm kiăng pơhno nao rai. Khua Jơnum min mơnuih ƀôn sang tơring čar Dak Lak, ơi Đỗ Hữu Huy git gai tui anai:

“Gơnong bruă Pơtô hăng Pơjuăt tañ ngă hrŏm Gơnong bruă Čar lăi pơthâo tơhnal pơkă ruah khua sang hră rơđah rơđong, ngă tañ hloh klă hloh, hơmâo tơhnal pơkă dăp tơlơi thâo, ngă tong ten rơđah hloh klă hloh. Hrŏm hăng anun, Gơnong bruă Čar ăt khom ngă hră pơkă hnơ̆ng kơ mơnuih ngă khua sang hră, kơ-iăng khua sang hră kiăng pơtong glăi tong ten boh tơhnal, tơlơi thâo amăng bruă mă pơ anăp, kiăng huăi hơmâo tơlơi soh glăi lơ̆m ngă tui”.

Ƀu kơnong tơring čar Dak Lak ôh, hơdôm tơring čar pơkŏn amăng kual Dap Kơdư ăt hlăk pok pơhai hơdôm yak nao kơtang hloh kiăng pơblih phrâo amăng bruă pơtô hrăm. Ƀơi Lâm Đồng, đơ đam tơring čar ră anai hơmâo 1.453 boh sang hră kơnuk kơna, him lăng tơdơi pơmut glăi dŏ 977 boh sang hră, hrŏ hĭ mrô sang hră kah hăng hlâo lĕ 476; laih dơ̆ng pơhrŏ 1.810 čô khua sang hră hăng mơnuih mă bruă. Lơ̆m ngă tui bruă anai, hơmâo pơtrun hiăp brơi ngă tui tong ten kơđiăng ba mơtam, djơ̆ hăng tơlơi gêh găl mơ̆ng rim tơring; biă mă ñu pơhlom djơ̆ anŏ ataih hăng jĕ brơi kơ čơđai sang hră dưi nao rai, anŏ gêh găl ba yua gơnam yua mă bruă pơtô hrăm hăng kiăng ngă hơđong na nao kơ bruă pơtô hăng hrăm ƀơi kual čư̆ siăng, kual ataih, asuek.

Ƀơi Gia Lai, Jơnum min mơnuih ƀôn sang tơring čar hơmâo ngă hră pơtrun kơ bruă dăp glăi, pơphun glăi sang hră gưl muai hăng klâo gưl amăng sang hră kơnuk kơna ngă pô kiăng pơđĭ tui boh tŭ yua amăng bruă pơtô hrăm, pơpha bruă mă kơ ƀing nai pơtô, gơnam yua mă bruă djơ̆ găl. Tui hăng hơdră pơpha, mrô sang hră gưl muai hăng klâo gưl kơnuk kơna ngă pô amăng tơring čar mơ̆ng 1.267 trun dŏ glăi 699 boh sang hră đôč, hrŏ hĭ 568 boh sang hră. Bruă dăp glăi anai, ngă tui ƀơƀrư̆, kiăng djơ̆ găl hăng rim tơring, plơi pla; amăng anun ƀơi 61 boh să, phường kual gêh găl ƀiă, mrô sang hră pơhrŏ trun dưi ngă 51%, dŏ glăi 74 boh să, phường dơ̆ng lĕ kiah ngă djop 37%. Anom bruă pơtô hrăm Gia Lai lăi pơtong, lơ̆m dăp glăi amra lir hơbit hăng bruă pơhlom brơi tơlơi hrăm hră, biă mă ñu kual ataih, kual mơnuih djuai ƀiă.

Hrŏm hăng anun, bruă đing nao pơpha bruă mă kơ mơnuih mă bruă gah gơnong bruă pơtô hrăm, bruă pơtô lăi, pôr pơthâo, ngă anŏ gêh găl bơtŭ ư hrŏm abih bang mơnuih mơnam ăt lu tơring čar khom đing nao. Ƀơi anăp kơ tơlơi tơnap tap hăng tơlơi bơngơ̆t bơngañ mơ̆ng hơdôm plơi pla, ƀing amĭ ama čơđai sang hră hŭi hơmâo hĭ tơlơi lŭk pŭk pơtô hrăm, anom bruă pơtô hrăm djop tơring čar lăi pơtong, bruă dăp glăi djơ̆ biă ñu pơphun glăi bruă kơ ƀing khua mua git gai kiăng hơbôt hloh, ƀiă tui đôč, lui hĭ sang hră raih lu khua kah hăng hlâo adih, pơmut glăi anăn dua klâo boh sang hră jing sa, kơnong sa čô ngă khua, ƀơi djop sang hră čơƀeng lĕ, kơnong ƀing kơ-iăng khua sang hră đôč, samơ̆ bruă pơtô pơhrăm ăt hruaih na nao huăi tơ̆i dưn hĭ ôh; nai pơtô ăt djop, čơđai sang hră ăt nao hrăm tui tơđar ƀơi sang hră, anih hrăm hlăk dŏ hrăm ră anai.