Thun hrăm phrâo 2026-2027, anom bruă pơtô hrăm tơring čar Lâm Đồng him lăng ba yua 250 boh anih hrăm, amăng anun hơmâo 200 boh anih hrăm djop tơlơi hrăm hăng 50 boh sang pioh ngă lu mơta bruă. Hrŏm hăng anun, djop ring bruă djru tui klôn, kah hăng tơdron ngui ngor, pơkơjăp drơi jăn hăng bơwih brơi adoh suang, ăt hlăk ngă pơgiong tui hrŏm hăng anih hrăm, sang hră, dưi djop brơi čơđai sang hră mut thun hrăm phrâo.

Hrŏm hăng tuh pơ alin gơnam yua mă bruă, pơhlom djop hơdrôm hră pơar brơi kơ čơđai sang hră, biă mă ñu čơđai sang hră dŏ pơ anih tơnap tap, kual ataih, ăt hơmâo pơtong rơđah bruă mă phun hloh kơ thun hrăm phrâo. Ƀơi anăp lĕ, Gơnong bruă Pơtô hăng Pơjuăt tơring čar Lâm Đồng hơmâo rơkâo djru dơ̆ng 49, 7 klai prăk pioh blơi hơdrôm hră hră tal 1 djru čơđai sang hră hrăm amăng sang hră đôm lăm,  kơnuk kơna čem rông ba; čơđai sang hră ƀơi 5 boh să giăm guai dêh čar, kual gong gai phara Phú Quý hăng djop să tơnap tap hloh.

Ƀơi djop anih pơtô hrăm, bruă dưm dăp hip hơdrôm hră pioh yua hrŏm, sang dưm hơdrôm hră pioh pơđok hrŏm, jak iâu lu khul mơnuih hơmâo pran jua čơmah djru ba čơđai sang hră djuai ƀiă, sang anŏ ƀun rin, giăm ƀun rin, čơđai sang hră ƀu klă drơi jăn, ƀu lui kơ čơđai sang hră yua sang anŏ tơnap tap, tơlơi bơwih ƀong huă gleh glar anun ôh, pơgăn hĭ tơlơi hrăm hră pơar. Ơi Nguyễn Văn Quang, Kơ-iăng khua jơnum min mơnuih ƀôn sang să Dam Rông 4, tơring čar Lâm Đồng, brơi thâo, bruă prăp lui thun hrăm phrâo ƀơi să ngă giong laih, amra čơkă 4.300 čô čơđai sang hră mut hrăm thun hrăm phrâo:

“Gơnam yua mă bruă amăng anih pơtô hrăm, amăng sang hră sô, răm laih gơmơi brơi pơhrua glăi phrâo, ming pơkra glăi soh. Djop mơta gơnam yua pơtô hrăm, măi pơčrang, gơnam yua kơƀah lĕ, brơi jŭ yap glăi abih hăng blơi prăp lui phrâo. Truh ră anai, kơƀang grê, sang hră, anih hrăm hăng hơdrôm hră pơar amăng sang hră să Dam Rông 4 hơmâo djop laih. Bruă prăp čơkă thun hrăm phrâo pơhlom djop 100%, kiăng abih bang ană amôn truh thun hrăm hră dưi mut hrăm hră. Gơmơi ăt gir run đing nao klă hloh kơ ană amôn čơđai sang hră sang anŏ ƀun rin, sang anŏ tơnap tap, mơnuih ƀôn sang djuai ƀiă”.