Khua pơ ala Nguyễn Xuân Nghiêm, mơng Đà Nẵng brơi thâo, bruă pơmut 4 jơlan hơdră hơnong pơkă dêh čar jing 1 jơlan hơdră abih bang lĕ sa tơlơi pơplih prong ƀu djơ̆ kơnong kơ mrô jơlan hơdră đôč ôh mơ̆ ăt pơplih hơdră pơphun ngă tui hơdră bruă pơđĭ kyar ƀơi ƀon lan tơnap tap. Yua anun, tơlơi pơkă kiăng ngă na nao lĕ pơmut kiăng sit nik; anăm ngă pơhrŏ tơlơi kiăng ngă hăng hơdôm boh ƀon lan, ƀing mơnuih tơnap tap kiăng djru, laih dong, kah gưl kiăng djơ̆ hrŏm hăng tơlơi thâo thăi, ngăn rơnoh hăng boh tŭ yua mơng jơlan hơdră kiăng pơkă hăng boh than ngă sit nik: “Tơdah pơsit anai lĕ sa jơlan hơdră hơnong pơkă dêh čar khŏm ngă kiăng hơmâo sa hơnong pơkă hrŏm, hơmâo logic hơdră bruă pơmut hrŏm, sa tơhnal pơkă kah pơpha ngăn rơnoh hăng sa jơlan gah wai lăng hrŏm. Kâo ƀu pơmĭn bruă pơmut ƀu djơ̆ kơnong lŏm hĭ hơdôm hơnong pơkă, mơnuih tŭ mă ƀudah hơdră phara brơi rĭm bruă, mơ̆ hơdră djru phara ăt kiăng pơhlôm ngă, samơ̆ bruă dưm dăp, kah pơpha ngăn rơnoh, pơphun ngă tui, kiăo tui lăng hăng sem lăng kiăng hơmâo tơlơi djơ̆ hrŏm. Sit biă ñu bruă pơmut kiăng dưi kah mă yua ngăn rơnoh klă ƀiă mơ̆ ƀu djơĕ pơmut hrŏm ngăn rơnoh.”

Tui khua pơ ala Nguyễn Thị Yến Nhi, mơng Vĩnh Long, tơlơi pơmĭn mơng jơlan hơdră hơnong pơkă dehe čar kiăng pơplih kơtang tui jơlan gah Kơnuk kơna djru ba kiăng mơnuih ƀôn sang pơđĭ kyar mă. Yua pơhrŏ trun ƀun rin hơđong kjăp kiăng pơkă hăng boh than ba glăi (tơdơi kơ djru brơi, mơnuih ƀôn sang hơmâo bruă mă hă ƀŭ, pơhrui đĭ hă ƀŭ, tơlơi bơwih ƀong hơđong hăng dưi gơgrong mă pô kjăp hă ƀŭ): “Kiăng đing nao hơdôm akŏ bruă amra ba glăi bruă mă, đĭ tui prăk pơhrui, pơlir bơwih ƀong huă, pơkra gơnam, blơi pơhrui, pơtô bruă mă pơlir hăng tơlơi kiăng, pơplih mrô, sĭ mơdrô điện tử, pơđĭ kyar gơnam yôm phara, tuai čuă ngui amăng plơi pla, čuă ngui pơ đang hmua, ĕp lăng gru grua. Kâo rơkâo lơm lăng glăi jơlan hơdră kiăng pơplih bruă mă tong ten, anăm lăng mrô prăk jao tuh pơ alin kiăng pơkă lăng tơlơi truh kih. Sa akŏ bruă jao prăk mă yua 100% samơ̆ ngă pơgiong mơnuih ƀôn sang dŏ rin rơpa, hơbô̆ bruă anai ƀu dưi tŏ tui na nao ăt lăng aka ƀu klă ôh. Samơ̆ sa akŏ bruă djru brơi tơlơi bơwih ƀong huă mơnuih ƀôn sang, đĭ tui prăk pơhrui ngă pơklaih mơng ƀun rin hơđong kjăp hăng dưi tŏ tui na nao kah mơng ba glăi tơlơi tŭ yua sit nik.”

Lăi pơtong, tơlơi truh kih mơng jơlan hơdră kiăng pơkă lăng hăng tlâo tơlơi pơplih: Mơng wai lăng raih daih hơdai nao wai lăng hrŏm, mơng wai lăng blung a hơdai nao wai lăng ba than ba glăi; mơng gơnong glông pơsit lu bruă tong ten hơdai nao ƀon lan gơgrong, glăm ba bruă mă hăng wai lăng boh than ba glăi. Khua pơ ala Bùi Văn Dũng, grup mơng Thanh Hóa brơi thâo: “Kâo tŭ ư hăng tơlơi pơkă ƀon lan pơsit, ƀon lan pơphun ngă hăng glăm ba kơ boh than dưi ngă. Gơnong glông wai lăng hơnong pơkă, hơdră bruă hăng pel ĕp, krăo lăng. Samơ̆ kah gưl kiăng sit nik, jao tơlơi glăm ba kiăng pơmut hrŏm hăng tơlơi dưi pơsit bruă hăng bruă dưi kah pơpha ngăn rơnoh. Kiăng pơplih mơng gơnong glông wai lăng bruă mă hơdai nao gơnong glông wai lăng hơnong pơkă hăng boh than dưi ngă. Hăng kâo rơkâo kơnuk kơna kiăng jao brơi sa anom bruă git gai wai lăng jơlan hơdră pơmut hrŏm anai”.

Khua pơ ala Lý Thị Lan, grup mơng Tuyên Quang rơkâo ngă rơđah ƀiă dong tơlơi gơgrong mơng ƀon lan amăng bruă ruah jơlan gah ngă tui. Mơng bruă mă, boh thâo mơ̆ gưl să aka ƀu dưi ngă, gưl tơring čar kiăng črâo ba, djru brơi. Kơ tơlơi pơkă brơi ƀon lan kiăng pơhlôm kah pơpha djop ngăn rơnoh amăng ako bruă tuh pơ alin man pơdong gap ƀrô, ngăn drăp mă yua rĭm thun tui mrô aset hloh, ñu lăi pơtong: “Hăng hơdôm boh tơring čar kual čư̆ siăng, kual giăm guai, kual djuai ania ƀiă aka dưi mă yua klă ngăn drăp. Kâo pơmĭn tơlơi pơkă kiăng lăng nao tong ten ƀiă, hơdôm boh ƀon lan anai mrô arăng djru ba lu, tơlơi rơkâo tuh pơ alin lu mơn yua anun ngăn rơnoh djru trun mơng gơnong glông kiăng lu. Tơdah pơsit tui mrô prăk gơnong glông jao trun, mrô prăk kak ƀon lan kiăng mă yua lu, lơm anun aka ƀu dưi mă yua lăp djơ̆ ngăn drăp, tơlơi anai amra ƀuh gơnong glông jao trun prăk kak mơ̆ ƀon lan ƀu dưi mă yua abih ôh.”

Lăi glăi, ngă rơđah kơ tơlơi mơ̆ khua mua hơmâo lăi nao, Khua ding jum prăk kak Ngô Văn Tuấn brơi thâo: “Ăt kiăng djă pioh ngăn rơnoh mơ̆ pă jơlan hơdră hơmâo Khua pơ ala mơnuih ƀon sang dêh čar pơsit ngă. Ngăn drăp gơnong glông amra djru brơi hơdôm boh ƀon lan ƀu kiăng mă yua bơkơnar, ƀudah yua bơkơnar mơ̆ ƀu kiăng pơgôp brơi gơnong glông. Kah pơpha hăng djru brơi mơng gơnong glông tui tơlơi pơkă, hluai tui tơlơi tơnap tap, kơplah wah tơlơi ră anai hăng hơnong pơkă ba tơbiă, amăng anun đing nao sem lăng bruă jao prăk, boh tŭ yua amăng wai lăng mă yua prăk kak. Hăng sit biă ñu amăng črăn tơlơi pơtrun ăt pơsit đing nao kual mơnuih djuai ania ƀiă hăng čư̆ siăng.”./.