VOV4.Jarai-Hrơi mông či truh Tết Nhâm Dần 2022 giăm laih. Lu mơnuih hyu mă bruă apah, sang anŏ rin ƀun, sang anŏ kơnuk kơna lăng ba biă mă ñu mơnuih djuai ƀiă bơngơ̆t yơh hŭi kơ ƀong tết ƀu djop, bơbeč djơ̆ mơ̆ng klin Covid 19 ngă. Kiăng mơnuih ƀôn sang djop pô dưi ƀong tết soh, ƀu hơmâo hlơi lui hĭ pơ klôn, hơdôm hrơi hăng anai, lu bruă mă bơwih brơi tết, hyu djru gơnam ƀong tết brơi kơ mơnuih ƀun rin, sang anŏ tơnap tap, mơnuih djuai ƀiă amăng djop tơring tơrang. Gơnam djru anai ngă mơak hăng pơđao pran jua mơnuih ƀôn sang čơkă thun phrâo djuai ania.

Anih hơmâo klin lu hloh blung a ƀơi tơring čar Dak Lak truh rơnuč blan 7/2021 hăng 51 čô mơnuih F0, ƀôn Bhok, să Ea Bhok, tơring glông Čư̆ Kuin găn rơgao lu tơlơi tơnap tap rung răng. Samơ̆ yua hơmâo tơlơi djru hmao kru mơ̆ng anom bruă ia jrao hăng djop anom bruă gong gai kơnuk kơna mơnuih ƀôn sang amăng plơi dưi găn rơgao hĭ tơlơi tơnap tap mông anun, pơwơ̆t glăi kah hăng tơđar.

Ơi Nguyễn Văn Dũng, Khua jơnum min mơnuih ƀôn sang să Ea Bhok brơi thâo, amăng hrơi blan guang dar, gong gai kơnuk kơna amăng să iâu pơthưr lu mơnuih pơdrong čơmah djru gơnam ƀong huă, braih kơ sang anŏ ƀun rin, sang anŏ bơbeč yua klin Covid 19 kiăng gơñu hơđong tơlơi hơdip mơda. Hơdôm jơlan hơdră djru anun să hơmâo ba nao truh pơ sang anŏ mơnuih ƀôn sang hmao kru:

“Să ăt lăi pơthâo hăng tơring glông, djru kơ mơnuih F0 10 kg braih, F1 mơ̆ng anih pơkŏn glăi pơ plơi pla lĕ 5 kg braih. Hơdôm ƀing hyu mă bruă apah glăi pơ să lĕ ăt djru tui hăng Hră pơtrun 68 pioh djru mơnuih ƀôn sang hmao kru kiăng hơmâo prăk bơwih ƀong huă hơmâo bơƀiă hai laih anun pơtô lăi mơnuih ƀôn sang anăm ngă amưng ôh, khom ngă tui djơ̆ 5 hơdră juăt 5 k pơgang klin mơ̆ng Ding jum ia jrao pơtrun”.

Ƀu kơnong ƀôn Ea Bhok đôč ôh, ƀơi lu plơi pla pơkŏn mơ̆ng mơnuih djuai ƀiă bơbeč djơ̆ klin Covid 19 ngă lêng kơ dưi djru ba braih, mơnong ƀong huă, ia jrao gun soh…

Tết Nhâm Dần 2022 hlăk truh laih, Ping gah, Kơnuk kơna, Jơnum min djop djuai ania mơnuih mơnam Việt Nam hlăk git gai djop ding jum, anom bruă pơ gơnong dlông, djop tơring čar tañ sem lăng, jŭ yap glăi, kiăng thâo tơlơi hơdip mơda hơdôm sang anŏ kơnuk kơna djru, mơnuih djuai ƀiă tơnap tap, bơbeč yua kơ klin Covid 19 ngă, răm ƀăm yua tơlơi truh, tơlơi duăm ruă ngă ư̆ rơpa amăng bơyan tơjŭ pla….pioh djru ba hmao kru braih, mơnong ƀong huă hăng gơnam yua, kiăng djop sang anŏ djop mơnuih hơmâo prăk ƀong tết soh.

Ơi Ta Rương Lương, Kơ-iăng Khua să Hương Hữu, tơring glông Nam Đông, tơring čar Thừa Thiên Huế brơi thâo, hơdôm hrơi giăm tết lu sang bruă, khul mơnuih čơmah nao čuă djru gơnam tết kơ mơnuih djuai ania Kơtu amăng să:

“Bruă djru ba hơdôm sang anŏ kơnuk kơna lăng ba, sang anŏ ƀun rin, biă mă ñu sang anŏ mơnuih djuai ƀiă tơnap tap amăng bơyan ƀong tết anai, mơnuih mă bruă pơ Anom wai lăng bruă mă tơhan rơka hăng mơnuih mơnam tơring glông ba nao lu gơnam djru mơ̆ng gơñu pô, laih anun kơnuk kơna djru phara mơ̆n brơi kơ sang anŏ ƀun rin, tơnap tap”.

Kiăng djru kơ mơnuih ƀôn sang djop pô hơmâo tết mơak soh, hrom hăng gơnam mơ̆ng Khua mir sir hăng tơring čar Thừa Thiên Huế, Jơnum min mơnuih ƀôn sang  tơring glông Nam Đông ăt prăp lui rơbêh 4,5 tơn braih hăng 200 anung gơnam, rĭm anung hơmâo 500 rơbâo prăk brơi kơ sang anŏ tơnap tap. Ơi Nguyễn Thanh Bình, Kơ-iăng Khua jơnum min mơnuih ƀôn sang tơring čar Thưà Thiên Huế brơi thâo: Tơring čar djru biă mă kơ sang anŏ hơmâo anăn kơnuk kơna lăng ba, mơnuih ƀun rin hăng mơnuih ƀôn sang djuai ƀiă kiăng kơ djop pô hơmâo gơnam ƀong tết ngă yang thun phrâo djuai ania mơak mơai:

“Lơ̆m hrơi blan klin kheng hơđuh rai kơtang, hơdôm sang anŏ kơnuk kơna lăng ba, sang anŏ ƀun rin hăng mơnuih ƀôn sang djuai ƀiă tơnap tap tŭ mă gơnam djru mơnong ƀong huă. Ƀing gơmơi hơmâo đing ba djru hmao kru tal čơkă têt anai. Hrom hăng anun, tơring čar ăt kơtưn brơi yap glăi, sem lăng djop sang anŏ ƀun rin, sang anŏ kơnuk kơna djru, mơnuih djuai ƀiă tơring glông A Lưới hăng Nam Đông laih anun jao kơ tơring glông A Lưới hăng Nam Đông tañ nao djru ba brơi mơnuih ƀôn sang čơkă thun phrâo djuai ania ta mơak mơai, djop mơnong ƀong huă”.

Ƀrô djơ̆ bơyan têt anai, rơbêh 53 rơbâo boh sang anŏ djuai ania ƀiă ƀơi 5 boh tơring glông kual čư̆ siăng hăng 8 boh să mơ̆ng tơring glông kual dăo tơring čar Quảng Ngãi dưi tŭ mă gơnam Tết. Rĭm anung gơnam rơnoh prăk 180 rơbâo prăk kah hăng ia mơsin, ia rơmă, ƀôt ngot….Anai lĕ jơlan hơdră djru hơdôm mơta gơnam ƀong huă kơ mơnuih djuai ƀiă amăng tal Têt Nhâm Dần 2022. Ơi Nguyễn Thế Nhân, Kơ-iăng Khua anom bruă djuai ania tơring čar Quảng Ngãi brơi thâo, rĭm bơyan tết truh, hơmâo gơnam djru mơ̆ng kơnuk kơna, djop plơi pla, anom bruă djru hrom ba tết pơđao pran jua kơ mơnuih ƀôn sang ƀun rin pơ kual čư siăng:

“Rơngiao kơ tơlơi djru anai, Jơnum min djop djuai ania mơnuih mơnam Việt Nam ăt iâu pơthưr djru hrom kơ mơnuih ƀôn sang ƀun rin amăng tơring čar. Iâu pơthưr lu mơnuih mơnam gum ba gơnam tết kơ mơnuih djuai ƀiă hăng sang anŏ ƀun rin, giăm ƀun rin”.

Khua ding jum, khua anom bruă Djuai ania, ơi Hầu A Lềnh brơi thâo, ƀrô djơ̆ bơyan Tết Nhâm Dần thun anai, 2022 ñu phara hăng hơdôm tết hlâo adih, yua lu sang anŏ ƀun rin laih bơbeč yua mơ̆ng klin Covid 19 dơ̆ng jai tơnap tap hloh. Hrom hăng anun, thun anai,  ăt thun ngă tui hnong pơkă ƀun rin phrâo, anun mrô sang anŏ ƀun rin ăt lu tui:

“Bruă hyu čuă jơmư, ƀơk gơnam kơ mơnuih ƀôn sang ƀrô čơkă tết thun anai bruă ngă yôm phara biă mă, kiăng juh alum pơtrut pran jua, kah pơpha ƀiă tơlơi tơnap tap laih anun djru mơnuih ƀôn sang kiăng hơmâo tết mơak, trơi pơđao djơ̆ hăng tơlơi git gai mơ̆ng Ping gah, kơnuk kơna ƀu lui sa čô mơnuih ƀôn sang rơpa amăng hrơi Tết ôh”.

Mông anai, lu mơnuih hyu mă bruă, lu sang anŏ mơnuih djuai ƀiă pơ kual ataih, kual čư̆ siăng bơngơ̆t biă mă kiăng hơmâo tết mơak trơi pơđao, yua dah klin kheng ngă kơtang kah hăng ră anai gun bruă. Ơi Lê Văn Thanh, Kơ-iăng Khua Ding jum bruă mă tơhan rơka hăng mơnuih mơnam lăi:

“Ding jum Bruă mă Tơhan rơka hăng Mơnuih mơnam hrom hăng Jơnum min djop djuai ania mơnuih mơnam Việt Nam ngă hrom jak iâu pơčruh prăk yua kơ mơnuih ƀun rin hrom hăng ană plơi pla khul mơnuih mơnam djru hrom, kiăng kơ djop mơnuih hơmâo gơnam soh, mah ƀu djop tum ôh, samơ̆ gir run  abih pran jua. Hrom hăng anun, Ding jum ăt rơkâo djop tơring čar khom gleng nao djru ba abih bang mơnuih ƀôn sang amăng tơring čar kiăng djop pô hơmâo tết soh.

 Boh nik ñu, gleng nao kơ mơnuih ƀun rin hăng mơnuih kơnuk kơna djru hăng lu hơdră djru phara. Biă mă ñu gleng nao kơ mơnuih ƀun rin pơ kual ataih, anih djru ba mơnuih mơnam tơnap tap, ƀing tơdu amăng mơnuih mơnam kiăng gơñu hơmâo mơnong ƀong huă hrơi Tết hăng djru abih bang mơak hrom soh amăng hrơi tết”.

Hăng tơlơi gleng nao mơ̆ng Ping gah, kơnuk kơna, anom bruă djop djuai ania mơnuih mơnam hăng djop ding jum anom bruă git gai djop tơring čar, ƀôn prong  khom djru ba klă tơlơi hơdip mơda mơnuih ƀôn sang, biă mă ñu sang anŏ kơnuk kơna djru, mơnuih tơnap tap, bơbeč yua klin kheng Covid 19. Mơ̆ng anun, djru hrom mơnuih ƀôn sang djuai ƀiă lăi pha hăng mơnuih ƀôn sang amăng dêh čar hnun mơn čơkă Tết thun phrâo djuai ania ta thun Nhâm Dần 2022 trơi pơđao yâo mơak, rơnuk rơnua, pioh kơ djop mơnuih, djop sang anŏ hơmâo Tết soh.

Nay Jek: Pơblang