Dua rơkơi bơnai amai Lâm Thị Ngọc Hoa, sang anŏ rin djuai ania Khmer dŏ ƀơi plơi Xẻo Cóc, să Lai Hòa, ƀôn prong Cần Thơ, phrâo anai hơmâo tơlơi pơsit djru brơi hơbô̆ bruă rông bê kar hăng bruă djru bơwih ƀong, pok rai tơlơi dưi hrưn đĭ hơđong tơlơi hơdip mơda. Amai Lâm Thị Ngọc Hoa brơi thâo: “Bơni lu biă mă, thun anai hơmâo arăng djru brơi dua drơi bê rông tuh hrôh. Anun ră anai gir run čem rông kiăng kơ hrôh lu tui, tơlơi bơwih ƀong hơđong, dưi pơkrem prăk man pơdong sang. Ră anai kâo juăt yuă rơk rĭm hrơi, bơ rơkơi kâo nao wai dơnao rông hơdang kơ arăng, lơm ñu dŏ pơ sang djru kâo rông bê”.

Ơi Diệp Phước Nghĩa, phường Mỹ Xuyên, yua prăk čan tui hơdră djru 50 klăk prăk, lơm 2 wŏt čan, hơmâo tuh pơ alin pla pơjing amăng đang hmua prong 4 blah. Ñu ăt tuh pơ alin dưm truă đing pruih pơkrem, mă yua boh thâo phrâo hăng măi mok amăng ngă hmua, yua anun pơhrui glăi rơbêh 50 klăk prăk rĭm thun. Mơng tơlơi gum djru mơng Kơnuk kơna hrŏm hăng pran hrưn đĭ, ñu hơmâo man pơdong sang prong rơhaih hăng sit nik dưi pơklaih mơng ƀun rin amăng thun 2024. “Ră anai pla kơtor, rơtă huăi kiăng lu mơnuih mă bruă dong tah lơm mă yua đing pruih dar hyu, yua mô-tơr ƀô̆p ia, dưi pơkrem lu biă mă. Laih dong, jơlan glông hơmâo man pơkra nao tơl đang hmua yua anun ƀing sĭ mlia nao blơi gơnam gêh gal. Neh met wa hơmâo lŏn ngă hmua jum dar ăt pơsur tơdruă bơwih brơi phun pla kiăng pơhrui hơmâo hmăi ƀiă”.

Ƀôn prong Cần Thơ tơdơi kơ pơmut hrŏm hơmâo giăm 495.000 mrô mơnuih djuai ania ƀiă, amăng anun lu hloh lĕ mơnuih djuai ania Khmer hăng giăm 411.000 čô. Amăng thun rơgao, ƀôn prong hơmâo pok pơhai tŭ yua Jơlan hơdră hơnong pơkă dêh čar amăng pơđĭ kyar bơwih ƀong huă-mơnuih mơnam kual mơnuih djuai ania ƀiă, hăng abih tih prăk tuh pơ alin rơbêh 305 klai prăk. Mơng anun, lu ară jơlan, sang hră, sang ia jrao hơmâo tuh pơ alin man pơdong; sang dŏ hăng prăk čan hơmâo djru brơi, ngă mơnuih ƀôn sang pơđĭ kyar bơwih ƀong huă, ƀơƀrư̆ hrưn đĭ amăng tơlơi hơdip mơda. Truh ră anai, mrô sang anŏ ƀun rin amăng kual djuai ania Khmer amăng ƀôn prong hrŏm trun dŏ giăm 1.900 boh sang anŏ. Ơi Lê Trung Tuấn, kơ-iăng Khua Jơnum min mơnuih ƀon sang să Thạnh Thới An, ƀôn prong Cần Thơ brơi thâo: “Hrŏm hăng bruă pok pơhai hơdôm hơdră djru brơi mơnuih djuai ania ƀiă, să ăt đing nao bruă pơtô brơi bruă mă hluai tui hơdôm anih pơtop hrăm kơ bruă rông hlô, pơsur ngă hmua, pơtô bruă mă…Mơng anun djru brơi mơnuih ƀôn sang hrưn đĭ klă dong amăng bruă mă, djru pơđĭ kyar bơwih ƀong huă ƀudah mut nao mă bruă ƀơi hơdôm boh kông ti kiăng hơmâo dong prăk pơhrui brơi sang anŏ”.

Pơ anăp anai, ƀôn prong Cần Thơ amra ngă tui ha amăng plĕ hơdôm bruă jao, hơdră pơđĭ kyar bơwih ƀong huă-mơnuih mơnam; pơtrut tan hơdôm ring bruă, akŏ bruă amăng hơdôm jơlan hơdră hơnong pơkă dêh čar; pơhlôm brơi mơnuih ƀôn sang dưi tŭ mă djop, hmao tlôn hơdră djru tui tơlơi pơkă, mơng anun ƀơƀrư̆ hrưn đĭ tơlơi hơdip mơda.