Sa tơlơi lăp đing nao ƀing pơ ala mơnuih ƀôn sang dêh čar pơsit hră pơtrun pơtrut hnong pơđĭ kyar pơjing gơnam sĭ mơdrô pơhrui glăi GDP hăng rơnoh 6,5%. Ƀing khua mua lăi lĕ, tơhnal pơkă pơđĭ kyar bơwih ƀong huă thun 2023 dưi ngă năng 6,5% kơđiăng hăng man ƀrô mơ̆n.

Lăi hnong pơđĭ kyar hơdôm anun GDP thun 2023 ƀiă pơkă hăng rơnoh pơkă 8,83% amăng 9 blan thun anai. Khă tui anun, pô pơ ala ơi Trần Đức Thuận, grup mơ̆ng Nghệ An lăi: hnong pơđĭ kyar thun 2022 lĕ ƀuh mơak yơh samơ̆ anăn h’ĭn đơi ôh hnong pơđĭ kyar nao amăng thun 2023 lu hloh. Yua dah thun 2023 dưi him lăng hlâo dŏ lu tơlơi lông lăng tơnap tap, tơlơi blah ngă Ukraine hăng Nga aka ƀu pơđut ôh, hơdui nao hrom ngă rơnoh ia săng hăng apui lơtrik đĭ laih anun rơnoh gơnam ƀong huă, prăk trun nua hăng prăk kơmlai đĭ tui soh:

“Ră anai kâo đing nao kơ tơlơi pơhing ia săng ia jâo pơblih đĭ trun nua, ƀing ta ăt ƀu dưi ngă amưng ôh yua hơmâo djă hnong rơnoh sĭ mơdrô ia săng ia jâo phrâo anai. Yua kơ anun, bruă pơkă rơnoh 6,5% kâo pơmin lĕ ƀing ta kơđiăng biă mă ba tơbiă rơnoh 6,5% tui anun djơ̆ mơ̆n”.

Khua pơ ala Vũ Tiến Lộc, grup ƀôn prong Hà Nội lăi lĕ, tơlơi bơwih ƀong huă dêh čar ta hlăk pok pơhư tui, tui hluai prong biă mă kơ bruă tuh pơ alin, sĭ mơdrô, kơnang kơ anih anom sĭ mơdrô amăng rŏng tơnah. Amăng dêh čar, lu sang bruă sĭ mơdrô bưp tơlơi tơnap, hnong pơđĭ kyar sĭ mơdrô, dêh čar tač rơngiao tuh pơ alin lĕ aka hơđong.

“Lơ̆m tơnap tap kah hăng ră anai, khua mua pơ ala mơnuih ƀôn sang pơdah thâo tơhnal pơkă pơđĭ kyar 6,5% tơhal pơkă kơ ta gir run ƀu ƀiă ôh. Tơdah ƀu hơmâo tơlơi rung răng amăng rŏng lŏn tơnah, ƀing ta dưi mơ̆n ngă djơ̆ tơhnal pơkă anai. Tơdah anih sĭ mơdrô ƀơi rŏng lŏn tơnah pơblih ƀu gêh găl ôh, tơnap tap hloh, anŏ ƀing ta ngă kiăng djop 6,5% lĕ kah hăng sa tơlơi lông lăng prong biă mă”.

Lăi nao kơ hơdôm hơdră či ngă pơ anăp, khua pơ ala Vũ Hồng Thanh, grup mơ̆ng Quảng Ninh lăi lĕ, tơdah pơsir klă hơdôm tơlơi tơdu amăng dêh čar, hnong pơđĭ kyar bơwih ƀong huă ƀu kơnong thun anai, thun tơdơi ăt dưi ngă djơ̆ tơhnal pơkă mơ̆n.

“Ƀing ta khom pơsir hơdôm tơlơi tơdu amăng dêh čar tơlơi bơwih ƀong huă kah hăng hơdră tuh pơ alin kơ bruă čar. Tơdah prăk mă yua tuh pơ alin đĭ amăng thun 2022 anai dưi ƀuh rơđah rơbêh 8%, tơlơi ngă kaih yua prăk čan tuh pơ alin kơ bruă čar amăng thun 2023 khom pơtum nao kơ bruă tuh pơ alin bruă čar. Hrom hăng anun, anung prăk 347 rơbâo klai prăk mơ̆ng Hră pơtrun mrô 43 jơlan hơdră prăk kăk djru rŭ glăi pơđĭ kyar bơwih ƀong huă mơnuih mơnam pơtum ngă bơkơnar, hăng yua prăk čan klă”.

Ăt amăng rơwang hrơi tơjuh rơgao, lơ̆m pơčrông sai kơ hơdră rŭ glăi bơwih ƀong huă mơnuih mơnam, ƀing khua mua pơ ala gleng nao hơdră anăn “Jua pơhiăp hăng măi komputer kơ adơi”. Tơhnal pơtrun, ră anai dŏ 400 rơbâo boh măi  komputer aka jao. Hrom hăng anun, hơdră ăt aka ƀu djop jua pơhiăp, hơmâo internet truh pơ djop sang anŏ. Ƀing khua mua pơblang hăng rơkâo đĭ pơ anăp adih. Khua pơ ala Nguyễn Thị Sửu, grup mơ̆ng Thừa Thiên Huế rơkâo, pơ anăp adih pơtum kơ hrĕ dăng kông ba tơlơi pơhing ia rơgơi phrâo. Čang rơmang Ding jum Tơlơi pơhing hăng pôr pơhing lăi pơthâo hmao kru kơ Kơnuk kơna djru kơ lu mơnuih dưi tŭ mă jơlan hơdră djru.

“Lui yơh pơtum lăi nao kơ tơlơi pơkŏn amra lăi nao kơ bruă mă gưl să ƀudah gưl tơring glông, lơ̆m sa gưl bruă kơnuk kơna lĕ hơmâo sa hơdră bơnah tơlơi pơhing hrom đơ đam dêh čar. Kâo ƀuh tŭ yua biă hăng tơlơi anai djru kơ lu bruă mă yua mrô, ba yua mrô kah yôm amăng bruă ba yua pơtô hrăm tơdơi anom bruă bơwih ƀong, tơdơi kơ anom bruă gru grua amăng pơtô hrăm”.

Khua pơ ala Nguyễn Lâm Thành, grup mơ̆ng Thái Nguyên lăi lĕ: dŏ lu tơlơi lăi nao kual ataih ƀơi plơi pla, anih mơnuih ƀôn sang dŏ aka ƀu hơmâo jua pơhiăp truh, yua plang internet dŏ tơdu, biă mă ñu kual čư̆ siăng, guai dêh čar, bul pơtâo ia rơsĭ. Lơ̆m anun, hơdră “Jua pơhiăp hăng komputer kơ adơi” pok pơhaih kaih:

“Phun ñu yua kơ bruă mă thâo tong ten tơlơi pơhing hơmâo sit nik hăng pơsir hơdôm tơlơi kiăng mơ̆ng mơnuih mơnam, mơnuih ƀôn sang kơ tơlơi jua pơhiăp khom ngă tui sa amăng plĕ. Hơdră “Jua pơhiăp hăng komputer kơ adơi” kaih, boh tơhnal ƀu djơ̆ kah hăng anŏ kiăng. Wơ̆t jua pơhiăp laih anun măi komputer. Boh yôm phun pôr tơlơi pơhing amăng hơdră dêh čar ta pơtrun lĕ bruă mă aka ƀu čih pơkra hră pơar pơtô brơi rơđah rơđong. Tơlơi anai, ba truh ngă kaih pơkă hăng bruă mă sit nik”.

Lăi glăi hăng ƀing khua mua pơ ala, Khua ding jum Tơlơi pơhing hăng Pôr pơthâo ơi Nguyễn Mạnh Hùng brơi thâo: Ră anai hơmâo 400 rơbâo boh măi komputer hlăk pơkra sa hnong djơ̆ hơdră pioh hrăm hră mơ̆ng ataih tơdơi kơ Covid 19 mơ̆ng Ding jum Pơtô hăng Pơjuăt pô gơgrong. Tơdơi kơ hơdră anai, amra ba nao djru hơdră “Jua pơhiăp hăng măi komputer kơ adơi”.