VOV4.Jarai - Rơwang hrơi tơjuh rơgao, ƀrô hrơi ngă bruă blung a mơng thun phrâo Nhâm Dần, Khua git gai pơ ala mơnuih ƀon sang dêh čar ơi Vương Đình Huệ hăng khua mua pơ ala mơnuih ƀon sang hơmâo bưp, jao bruă kơ ƀing khua pơ ala mơnuih ƀon sang gơgrong sa mơta bruă, ƀing khua, mơnuih mă bruă mơng Anom bruă Khua pơ ala mơnuih ƀon sang. Pơhiăp ƀơi mông bưp, Khua git gai pơ ala mơnuih ƀon sang ơi Vương Đình Huệ lăi, tơlơi čang rơmang kơtang kơdrưh kơ-ang, pơđĭ kyar, tơlơi pơmin prong mơng mơnuih ƀon sang, tơguăn kơ hơdôm tơlơi pơplih phrâo, amăng anun hơmâo tơlơi pơplih mơng tơlơi phiăn.

Ƀơi mông bưp, Khua git gai pơ ala mơnuih ƀon sang ơi Vương Đình Huệ hơmâo lăi pơthâo kơ tal nao čuă, bơni hơ-ơč Tê̆t mơng Khua git gai pơ ala mơnuih ƀon sang dêh čar hrŏm hăng grup khua mua ƀơi 6 boh tơring čar gah Dơnung laih anun hơdôm bruă mă mơng Kơ-iăng khua git gai pơ ala mơnuih ƀon sang dêh čar. Lăi lĕ, amăng thun rơgao, hăng lu bruă mă, lu tơlơi bơngơ̆t, samơ̆ mơng tơlơi lăi glăi tañ mơng Ding kơna Jơnum min khua apăn bruă pơ ala mơnuih ƀon sang dêh čar, mơnuih ƀon sang, kư tri bơni, lăng yôm biă mă bruă mơng Ƀirô khua pơ ala mơnuih ƀon sang. Ƀing khua pơ ala mơnuih ƀon sang, ƀing khua apăn bruă, mơnuih mă bruă mơng Anom bruă khua pơ ala mơnuih ƀon sang dêh čar dưi pơ-ư pơ-ang kơ tơlơi anai, samơ̆ ƀu dưi pơdơi kơtưn đĭ, bu dưi pơklaih lui hơdôm bruă hơmâo ngă.

Khua git gai pơ ala mơnuih ƀon sang dêh čar ơi Vương Đình Huệ pơhiăp ƀơi mông bưp.

Khua git gai pơ ala mơnuih ƀon sang dêh čar brơi thâo, thun 2022 ăt jing thun yôm mơn, thun tŏ tui yôm ngă tui Tơlơi pơtrun mơng Ping gah, hơdôm tơlơi pơtrun mơng Khua pơ ala mơnuih ƀon sang dêh čar. Khua mua Ping gah, Kơnuk kơna, kư tri, mơnuih ƀon sang pơđing hmư̆ laih anun čang rơmang biă kơ hơdôm bruă mă mơng Khua pơ ala mơnuih ƀon sang, yua hnun kiăng prăp lui klă bruă mă, pơjing tơlơi ƀu juăt ƀuh jing tơlơi juăt ƀuh đah mơng djơ̆ hăng tơlơi hơdip anai.

“Wa Hồ ƀing ta lăi laih, Khua pơ ala mơnuih ƀon sang lĕ pơ ala kơ pran jua gum pơgôp prong mơng djuai ania hăng tơlơi pơmin hrưn đĭ kơtang mơng mơnuih ƀon sang Việt Nam. Tơlơi čang rơmang kơtang kơdrưh kơ-ang, čang rơmang đĭ kyar, tơlơi pơmin kơjăp phik mơng djuai ania ta, khŏm gơnang kơ hơdôm tơlơi pơplih mơng jơlan ngă bruă, amăng anun hơmâo tơlơi pơplih gah tơlơi phiăn. Yua hnun, tơlơi gơgrong bruă mơng Khua mua git gai pơ ala mơnuih ƀon sang dêh čar ta dŏ prong đôč. Ngă hiư̆m pă đah mơng hơmâo tơlơi phiăn djơ̆ hrŏm, djŏp, rơđah rơđông, amuñ thâo hluh. Kơ tơlơi čih amăng lăm lĕ khŏm kiăng hơmâo jơlan hơdră pơplih phrâo lŏn ia pơđĭ kyar tañ, kơjăp hloh dong hăng mut hrŏm jar kmar hloh dong. Anun lĕ tơlơi ƀing ta khŏm pơmin. Rim čô khua, mơnuih mă bruă kơnuk kơna, rim čô mơnuih gơgrong bruă phara khŏm pơmin kơ tơlơi anai. Ƀing ta khŏm čih pơkra tơlơi phiăn, tơlơi pơkôl pơkă lĕ kiăng đĭ kyar”.

Khua git gai pơ ala mơnuih ƀon sang dêh čar Vương Đình Huệ kiăng, gah bruă wai lăng, tơdơi hrơi Tê̆t, ƀing Khua grup wai lăng khŏm ngă bruă kơtang đah mơng ngă 4 kơčăo bruă wai lăng mơng Khua mua pơ ala mơnuih ƀon sang dêh čar jao; laih dong lăng glăi 107 kơčăo bruă amăng Jơlan hơdră ngă bruă mơng Ping gah Ƀirô khua pơ ala mơnuih ƀon sang ngă tui Tơlơi pơtrun Jơnum Ping gah dêh čar tal 13 hăng 137 mơta bruă čih pơkra tơlơi phiăn tui hăng tơlơi klah čun 19 mơng Ding jum kơđi čar hăng kơčăo bruă Jơlan hơdră ngă bruă čih tơlơi phiăn Ƀirô khua pơ ala mơnuih ƀon sang dêh čar tal 15. Pơtŏng glăi ha wơ̆t dong, anŏ klă, tơlơi dưi wai lăng mơng Ƀirô khua pơ ala mơnuih ƀon sang dêh čar kiăng pơhlôm kơnuk kơna tui tơlơi phiăn xã hội chủ nghĩa mơng mơnuih ƀon sang, yua kơ mơnuih ƀon sang, tui Khua git gai pơ ala mơnuih ƀon sang dêh čar ơi Vương Đình Huệ, mơnuih ƀon sang khŏm tŭ mă hơdôm tơlơi hơmâo mơng tơlơi bơwih ƀong - mơnuih mơnam đĭ kyar, mơng tơlơi pơplih phrâo. Rơngiao kơ anun, djŏp tơlơi pơtrun mơng Ƀirô khua pơ ala mơnuih ƀon sang dêh čar kơ hơdôm bruă yôm mơng lŏn ia ta khŏm gơñăm nao tơlơi gêh gal klă hiam kơ lŏn ia, kơ mơnuih ƀon sang yơh phun hlâo.

Hăng bruă pơsit hơdôm bruă yôm mơng lŏn ia, Khua git gai pơ ala mơnuih ƀon sang dêh čar ơi Vương Đình Huệ pơtă, djŏp tơlơi pơsit mơng Ƀirô khua pơ ala mơnuih ƀon sang dêh čar, hơdôm bruă yôm mơng lŏn ia khŏm gơñăm nao tơlơi klă hiam kơ lŏn ia, kơ mơnuih ƀon sang yơh phun hlâo. Mơng tơlơi klă hiam mơng lŏn ia, mơnuih ƀon sang yơh ƀing ta thâo lăi glăi, sem lăng, ba pơsit, amăng tơlơi klă hiam mơng lŏn ia, djuai ania klă hiam kơ mơnuih ƀon sang, anom bơwih ƀong.

Khua git gai pơ ala mơnuih ƀon sang ơi Vương Đình Huệ đăo gơnang, hăng gru grua hing ang 76 thun rơgao mơng Ƀirô khua pơ ala mơnuih ƀon sang dêh čar Việt Nam, hơdôm tơlơi dưi ngă mơng Khua pơ ala mơnuih ƀon sang dêh čar tal 15 hơmâo ngă amăng thun blung a mơng rơwang thun ngă bruă, ƀing khua, mơnuih mă bruă amăng ƀirô khua pơ ala mơnuih ƀon sang amra gum pơgôp sa pran, pơtrut tui tơlơi rơgơi ngă bruă, đah mơng dưi ngă djŏp bruă hơmâo Ping gah, Kơnuk kơna, mơnuih ƀon sang jao, gum pơgôp akŏ pơdong lŏn ia Việt Nam jai hrơi kơdrưh kơ-ang, pơdrong asah, mơnuih ƀon sang jai hrơi trơi pơđao yâo mơ-ak, djơ̆ hăng tơlơi khăp kiăng, tơlơi čang rơmang mơng Ping gah, Kơnuk kơna, kư tri hăng mơnuih ƀon sang.

VOV1: Čih - Siu H’Mai: Pơblang