Sa tơlơi pơphô pơphun amăng mông jơnum, tơdơi kơ hmư̆ Khua Ding jum pơtô pơhrăm pơblang kơ bôh than ba truh mơ̆ng tơring čar tơlơi taih amang gah čơđai sang, Khua pơ ala Đậu Khắc Gia Bảo rai mơ̆ng Grŭp khua pơ ala mơnuih ƀôn sang čơđai muai tơring čar Quảng Trị, tơlơi ba tơbiă amăng mông tơña:

“Ơ Khua Ding jum pơtô pơhrăm, kâo hmâo lăng hmư̆ tŏng ten tơlơi pơblang mơ̆ng Khua Ding jum kơ bôh than ba truh tơlơi taih amang amăng sang hră. Khă hnun hai kâo ƀuh Khua Ding jum akă pơsit djơ̆ ôh rơnoh bơdjơ̆ nao tơlơi pơmin amăng tơlơi taih amang ƀơi sang hră anih hrăm?”.

Khua pơ ala kơ Ding jum pơtô pơhrăm dêh čar lăi glăi tơlơi tơña:

“Kâo bơni biă hăng tŭ ư hrŏm hăng khua pơ ala mơnuih ƀôn sang dêh čar Đậu Khắc Gia Bảo, anai ăt lĕ tơlơi akă dưi ngă, yua anun pơ̆ anăp anai, ƀing gơmơi amra gum hrŏm kơjăp hăng Gơnong bruă ia jrao kiăng pok pơhai dong hăng pơsir hmao tlôn hloh hơdôm tơlơi pơmin phrâo hmâo mơ̆ng ƀing čơđai sang hră”.

Pơhiăp amăng mông jơnum pơphô kơ “Pơgang, pơgăn tơlơi taih amang amăng sang hră”, Khua Ding jum pơtô pơhrăm Nguyễn Kim Sơn lăi lĕ:

“Lăi glăi tơlơi tơña phrâo lăi anun, lăi lĕ pơphô samơ̆ tơlơi anun ƀu dưi pơphô ôh, anun lĕ tơlơi hmâo sit. Kâo ƀuh ƀing čơđai hmâo tơña hăng pơdah tơlơi thâo hluh kơ mrô ăt kah hăng hơdôm jơlan pơsir mơ̆ Ding jum pơtô pơhrăm sit hmâo lăi nao, pok pơhai. Ƀing ta khom gum hrŏm pơtŏng sit khut khăt lĕ, sang hră yâo mơ-ak ƀu dưi hmâo anih kơ tơlơi taih amang, tơlơi črih čruai hăng hơdôm tơlơi amra hmâo hăng ƀing čơđai sang hră”.

Bơ̆ hăng Khua Ding jum ia jrao Đào Hồng Lan, khă nao pơhmư̆ mông jơnum pơphô Khua pơ ala mơnuih ƀôn sang čơđai muai, samơ̆ Khua Ding jum glăi mưn ƀuh kah hăng glăk gum hrŏm sa mông tơña sit nik:

“Hơdôm tơlơi gum pơhiăp tơña ăt kah hăng tơlơi lăi glăi mơ̆ng ƀing Khua pơ ala čơđai muai tơpă ară hăng hmâo gru gơgrong, pơdah tơlơi đing nao truh hơdôm tơlơi mơ̆ng čơđai muai. Ƀing gơmơi ƀuh sit nik wot čơđai ră anai. Hơdôm tơlơi bơdjơ̆ nao bruă mă yua hot djup, biă ñu hot djup phrâo, hot djup điện tử, hot djup kơhul pơ-iă hăng hơdôm gơnam ngă pơsuh pran jua kah hăng tơpai ƀiêr, đa lĕ hmâo wot hot jrao ăt lĕ tơlơi pơhuĭ prong biă truh tơlơi suaih pral mơ̆ng čơđai muai lăi hrŏm, ăt kah hăng anô̆ klă mrô mơnuih, kơnung djuai mơ̆ng lŏn ia ƀing ta”.

Hăng kơnuih lĕ Khua pơ ala mơnuih ƀôn sang čơđai muai mơ̆ng Grŭp Khua pơ ala mơnuih ƀôn sang dêh čar ƀôn prong Hà Nội, adơi Nguyễn Trà My, hrăm anih 8 B3, Sang hră gưl 2 Vinschool Times City pơdah pran jua:

“Amăng mông jơnum hrơi anai, djop mơnuih hmâo bơkơtuai hur har laih hăng ăt hmâo lu mơn bruă bơrơjah yôm hăng klă. Kâo čang rơmang, hơdôm tơlơi gum pơhiăp hăng tơlơi pơhiăp mơ̆ng kâo amra dưi hmâo hơdôm ding jum, gơnong bruă hmư̆ lăng hăng tơlơi đing nao hloh, hmâo hơdôm bruă pơsir mơ̆ng hơdôm tơlơi gum pơhiăp mơ̆ng ƀing gơmơi, kiăng dưi pơđut hơdôm tơlơi amăng hnưr thun mơ̆ng ƀing čơđai”.

Tơdơi kơ nao pơhmư̆ mông tơña hăng lăi glăi tơña pơphô, Khua git gai wai lăng pơ ala mơnuih ƀôn sang dêh čar ta ơi Trần Thanh Mẫn bơni hăng pơsit yôm Khul hlăk ai dêh čar, Khul čơđai muai dêh čar hmâo laih tơlơi pơčeh phrâo hăng hơdôm bôh ƀirô pơphun mông Jơnum pơphô “Khua pơ ala mơnuih ƀôn sang čơđai muai”. Hrŏm hăng anun lăi rơđah, Ping gah, Kơnuk kơna pioh na nao tơlơi lăng ba, bơwih brơi phara truh bruă pơgang, bơwih brơi, pơtô pơhrăm čơđai muai. Tui hăng Khua git gai wai lăng pơ ala mơnuih ƀôn sang dêh čar, mông jơnum  pơphô “Khua pơ ala mơnuih ƀôn sang čơđai muai” tal 2 hmâo ruah laih 2 anăn akô̆ ñu lĕ “Pơgang, pơgăn tơlơi taih amang ƀơi sang hră” hăng “Pơgang, pơgăn sat răm mơ̆ng hot djup, hot jrao, biă ñu amăng anih hrăm sang hră” sit nik hloh, dưi hmâo lu mơnuih đing nao./.