Grup hyu mă bruă mơng tơring čar Gia Lai yua Kơ-iăng Khua Jơnum min mơnuih ƀôn sang tơring čar Nguyễn Thị Thanh Lịch ba jơlan hlâo hơmâo nao čuă, pơpŭ thun phrâo hơdôm anih anom hăng sang anŏ mơnuih djru hơkrŭ ba gru ƀơi sa, dua boh ƀon lan gah yŭ tơring čar. Grup hyu mă bruă hơmâo pơpŭ thun phrâo 25 boh sang anŏ djru hơkrŭ ba gru ƀơi hơdôm boh să: Ia Rbol, Ia Rsai, Uar, Ia Dreh hăng Phú Túc, rĭm boh sang anŏ hơmâo ƀơi 1 anung gơnam hăng 2 klăk prăk. Tha plơi Ksor Chuel, dŏ amăng ƀôn Rưng Ama Nhiu, să Ia Rbol, Gia Lai brơi thâo:

“Sang anŏ gơmơi wŏt hăng neh met wa amăng plơi pla, tơlơi hơdip jai hơđong hăng jơnap ƀiă yơh, djop sang anŏ lêng kơ anăp nao tơlơi hơdip trơi pơđao, yâo mơ-ak. Hrŏm hăng anun, Ping gah hăng kơnuk kơna lêng kơ đing nao, bơwih brơi tơlơi hơdip kơ mơnuih djuai ania ƀiă ƀơi kual Dap kơdư, djru brơi neh met wa ƀơƀrư̆ pơđĭ kyar bơwih ƀong huă, hrưn đĭ tơlơi hơdip. Pơ anăp anai, kâo čang rơmang Ping gah hăng Kơnuk kơna tŏ tui đing nao lu ƀiă dong, hơmâo hơdră djru sit nik kiăng mơnuih djuai ania ƀiă hơđong bơwih ƀong, ngă hmua, hơđong tơlơi hơdip sui pơ anăp”.

Hăng neh met wa M’nông ƀơi să Nâm Nung (tơring čar Lâm Đồng) - kual ngă hơkrŭ blah ngă ră anai hơmâo lu tơlơi pơplih phrâo. Ră anai, neh met wa amăng să glăl bơwih ƀong ngă pơdrong mơ̆ng phun kơphê, tiu, pơdai hăng djă pioh gru hiam đưm hlâo. Ƀơi ƀon Ja Rah, neh met wa djuai ania M’nông dŏ djă pioh 20 ring čing hăng 30 čô juăt atông čing amăng djŏp hrơi ngui ngor plơi pla; 30 čô mơnuih juăt mơñam eng ao, mơñam hơkă bai. Abih bang sang anŏ leng kơ dŏ tơkong rơyă tơpai čeh mơn. Hơdôm bruă ngui ngor mơ̆ng djuai ania M’nông kah hăng adoh, akhan, pơkra goong brô̆ ăt dŏ djă pioh mơn. Ơi Y’ Nkrơm (djuai ania M’nông) dŏ pơ ƀon Ja Rah, să Nâm Nung, tơring čar Lâm Đồng pơsit, tơlơi hơdip phrâo trơi pơđao, rơnuk rơnua anun pơsit brơi boh tŭ yua pran jua gum pơgôp, gir kơtir mơ̆ng djuai ania ƀiă pơ lŏn ngă hơkrŭ đưm.

“Thun anai bơwih ƀong phrâo anun jing hơmâo hloh kơ thun hlâo. Sang anŏ hơmâo 1 sao pơdai ia jing hơmâo 20 kơsăk. Bơ kơphê hơmâo 5 tơn, lu hloh tui anai ta tlao hok yơh. Thun anai sĭ hơmâo rơbêh 100 klăk prăk, kah hĭ prăk hơbâo prăk apah arăng ngă hmua dŏ dŏ dăi mơn či blơi gơnam, pioh či ngă hmua amăng thun tơdơi dong, dŏ glăi 20-30 klăk lĕ pioh ƀong tê̆t hăng neh met wa amăng plơi pla. Tê̆t tui phiăn ta lĕ juăt iâu neh met wa sang anŏ iao gah nao ngui; hơdôm boh sang anŏ juăt bơblĭu năng ai 10 boh sang, iâu adơi ayong, gơyut gơyâo rai ngui, kiăng mơak phun phrâo, bơni hơ-ơč bơwih ƀong đĭ, hơmâo lu tơlơi tơphă amăng thun phrâo”.