Mơguah lơ 28/6, Khul mut phung tơring čar Dak Lak pơphun jơlan hơdră bưp ƀô̆ mơta, ƀơk prăk djru hrăm hră kơ ană bă mơ̆ng khul hmâo tơlơi hơdip tơnap. Jơlan hơdră hmâo ƀơk laih 103 anung prăk djru hrăm hră hăng rơnoh 1 klăk prăk ƀơk kơ čơđai sang hră hmâo tơlơi hơdip tơnap tap hrăm hră rơgơi, rơnoh ñu 1,5 klăk prăk hăng čơđai drit druai. Anai lĕ ƀing čơđai dưi ruah mơ̆ng 21 khul mut phung gưl dlông ƀơi anăp.

Dưi čơkă mă prăk djru hrăm hră yak rơgao tơlơi tơnap hrăm hră rơgơi tal anai, adơi Lâm Tâm Như, čơđai sang hră anih 9D, Sang hră gưl 2 Nguyễn Văn Cừ, plơi prong Buôn Ma Thuột, hmâo amĭ glăk dô̆ mă bruă ƀơi Sang bruă bơwih ƀong mơnuih ƀôn sang Rơhuông adai Đông Phương lăi lĕ: Črăn prăk djru hrăm hră anai djru laih kơ ñu hmâo dong pran pơtrut hloh pioh hrăm hră klă hloh jing mơnuih hmâo yua kơ mơnuih mơnam, djru amĭ ama hơđong pran jua mă bruă. Ăt amăng jơlan hơdră anai mơn, ƀing čơđai dưi lăng hơdôm črăn pơdah xiếc, gum hrŏm bruă mă gah rơngiao hăng bơkơtuai hăng lu gơyut ha hnưr thun./.