Mơguah lơ 10/11, ƀơi tơring glông Ea Sup (Dak Lak), khua pơ ala git gai Ƀirô git gai Ling tơhan pơgang guai dêh čar tơring čar Dak Lak, Ƀirô pơdŏng ƀơi Gong phun jua pơhiăp dêh čar Việt Nam pơ̆ Dap Kơdư, Agribank ƀơi Kơdư Dak Lak, Sang bruă Honda Dak Lak, Sang bruă sĭ mơdrô kơmok pruai Vân Nguyên hrŏm hăng sa dua čô mơnuih gum djru pơphun ƀơk sang anô̆ pơđao guai dêh čar kơ sang anô̆ ƀun rin tơnap tap ƀơi să Ea Bung.

Sang prong rơbêh kơ 90m2 hmâo jao kơ rơkơi bơnai ơi Hoàng Minh Lý, ƀơi thôn 8, să Ea Bung. Sang hmâo abih bang prăk mă yua pơdŏng rơbêh kơ 150 klăk prăk, amăng anun rơbêh kơ 80 klăk prăk hmâo hơdôm bôh anom bơwih ƀong gum pơčruh djru; mrô prăk dô̆ glăi lĕ mơnuih amăng sang anô̆ gum hơgôp. Đại tá Đỗ Quang Thấm - Khua git gai Ping gah Ƀirô git gai khul ling tơhan pơgang guai dêh čar tơring čar Dak Lak brơi thâo, hơdôm thun rơgao, anom ngă tui jơlan hơdră “Sang pơđao guai dêh čar” hăng pơdŏng laih 5 bôh sang dô̆ djru hơdôm bôh sang anô̆ ƀun rin ƀơi să Ea Bung./.