Phrâo ngă giong hơdôm mơta hră pơ-ar či kiăng ƀơi sa bah amăng ƀơi Anom mă bruă Jơnum min mơnuih ƀôn sang să Ea Tiêu, tơring glông Čư̆ Kuiñ, tơring čar Dak Lak, ayong Trần Vũ Hải Đăng brơi thâo, ñu kơnong kơ rơngiă năng ai ñu 30 mơnit kơ bruă mă ngă hră pơ-ar:

 “Hrơi anai kâo nao pơ̆ să Ea Tiêu kiăng ngă hră pơ-ar pơsit pô dô̆ soh akă dô̆ rơkơi bơnai lĕ, kâo ƀuh mơnuih mă bruă ƀơi anai djru brơi hur har pran jua biă, pơtô brơi rơđah tơlơi pơhing hiưm ñu, pơsir hră pơ-ar tañ pioh mơnuih ƀôn sang huăi rơngiă mông lom nao ngă hră pơ-ar”.

Tui mrô lăi pơthâo glăi mơ̆ng Jơnum min mơnuih ƀôn sang tơring glông Čư̆ Kuiñ, rim thun rim să ƀơi anai tŭ mă mơng 13.000 truh kơ 16.000 wot pok hră pơ-ar. Kiăng gal brơi kơ khul grŭp, mơnuih lơm nao ngă hră pơ-ar, hơdôm bôh să hmâo phuă pơđah Hơdôm hră pơ-ar gah pô dưi pơsir ƀơi hră phuă mơ̆ng ƀirô mă bruă hăng amăng plăng internet mơng să; pơpha mơnuih mă bruă gah bruă jao hăng khua sang să ngă tui bruă jao ƀơi Anih tŭ mă hăng ba glăi hră pơ-ar. Hơdôm bôh să ăt mă yua mơn hơdră “Bôh thâo phrâo hră pơ-ar” nao hrŏm hăng “Hrơi 4 mơnuih ƀu čih, gong gai ƀu ƀuan” ba glăi hơdôm bôh tơhnal klă. Ơi Nguyễn Kim May, Kơ-iăng Khua git gai Ping gah, Khua Jơnum min mơnuih ƀôn sang să Ea Ktur, tơring glông Čư̆ Kuiñ brơi thâo:

 “Ƀing gơmơi hmâo pơkă anih dưm camera lăng tui mơnuih mă bruă sa bah amăng ăt kah hăng thâo tơlơi mơnuih ƀôn sang nao ngă hră pơ-ar, mơ̆ng anun đĭ tui bruă gơgrong mơnuih mă bruă amăng ƀirô. Sa dua jơlan gah pơsir hră pơ-ar ƀing gơmơi pơplih tañ, ngă gal brơi klă hloh, pơhlôm brơi kơ mơnuih ƀôn sang amăng tơlơi ngă tui ngă pơ-ar, anun lĕ tơlơi hơdôm hrơi ƀing gơmơi hơdư̆ hĭ hrơi ƀuan hlâo tui tơlơi pơkă amăng tơlơi phiăn, ngă gal brơi kơ mơnuih ƀôn sang lĕ ƀing gơmơi hơneč pơsir mă...”.

Ơi Võ Tấn Huy, Khua Jơnum min mơnuih ƀôn sang tơring glông Čư̆ Kuiñ brơi thâo, tơlơi pơjing phun akha bruă ngă pơ-ar juăt bruă, tŭ yua, ba glăi bôh tơhnal, Jơnum min mơnuih ƀôn sang tơring glông hmâo mă yua laih kơčăo bruă kơ pơplih bruă ngă hră pơ-ar kơnuk kơna mơ̆ng rim thun. Rim thun, Jơnum min mơnuih ƀôn sang tơring glông pơphun klah čun ƀơƀiă, črông lô bruă pơplih ngă hră pơ-ar kiăng lăi pơthâo abih jơlan hơdră, kơčăo bruă, pơsit hơdôm bôh tơhnal dưi ngă, hơdôm bruă akă dưi ngă kiăng ba tơbiă hơdôm jơlan pơsir, bruă jao djơ̆ hăng hrơi tô̆ tui. Hrŏm hăng anun, tơring glông pok pơhai bruă kĭ pơkôl ngă tui bruă jao pioh kơ Khua Jơnum min mơnuih ƀôn sang hơdôm bôh să ƀơi tơring glông. Tơring glông ăt pơdŏng mơn kơčăo bruă yua plăng Zalo pioh ngă jơlan mă bruă kơplah wah mơnuih ƀôn sang hăng gong gai tơring glông... Ơi Võ Tấn Huy brơi thâo:

 “Sa amăng hơdôm bôh yôm mơ̆ tơring glông đing nao anun lĕ pơplih prăk kak yua bruă hrom, pơplih tuh pơplai hơdôm măi mok mơ̆ng tơring glông truh să tui jơlan gah gêh gal, rơnuk anai kơ mơnuih ƀôn sang. Hrŏm hăng anun gum hrŏm hăng Dăng kông pioh lăi pơthâo hơdôm phun akha kiăng ngă tui hơdôm bruă ngă hră pơ-ar tui jơlan măi mok telephone. Tơring glông ăt hmâo črâo ba mơn amăng bruă ngă tui hơdră pơkă bruă hrŏm, pơdŏng khul mơnuih apăn bruă hmâo bôh thâo, hur har pran jua, hmâo pran jua gơgrong amăng bruă mă, hluai tui hơdôm bruă pơplih ngă hră pơ-ar, bruă phun akha lĕ anăp nao gong gai măi mok, gong gai mrô, kiăng ngă klă bruă anai anun lĕ bruă pơplih mrô”.

Hơdôm hrơi rơgao, Bruă pơplih ngă hră pơ-ar tơring čar Dak Lak dưi pok pơhai abih bang amăng 6 bôh yôm mơ̆ng Jơlan hơdră pơplih abih bang hră pơ-ar kơnuk kơna rơwang 2021-2030 mơ̆ng Gong gai dêh čar. Tơring čar hmâo lu pơplih amăng črâo ba, git gai kiăng pơđĭ tui pran jua lăng djơ̆ mơ̆ng mơnuih ƀôn sang, anom bơwih ƀong. Biă ñu lĕ bruă pơtrut kơtang ngă tui rơnoh 3, rơnoh 4. Amăng thun 2022, tơring čar Dak Lak hmâo đĭ laih 32 črăn gah mrô lăng djơ̆ pran mơ̆ng mơnuih ƀôn sang, dăp tal 27 amăng đơ đam dêh čar. Kiăng bruă pơplih hră pơ-ar ba glăi bôh tơhnal klă pơ̆ anăp anai, ơi Nguyễn Tuấn Hà, Kơ-iăng Khua Jơnum min mơnuih ƀôn sang tơring čar Dak Lak brơi thâo:

 “Khul mơnuih mă bruă, biă ñu mơnuih apăn akô̆ khom hur har pơčeh phrâo, pơsir khut khăt bruă mă. Dua lĕ ding kơna amăng Grŭp črâo ba kơtưn pel ĕp bruă pơplih ngă hră pơ-ar, pơsir hră pơ-ar, ngă tui tơlơi pơkă, pơsir bruă akă ngă giong, ƀu dưi ngă. 3 lĕ pel ĕp glăi kiăng hrŏ trun, ngă amuñ hră pơ-ar, pơplih phrâo bruă ngă tui hơdră pơkă ha bơnah bah amăng, sa bơnah jơlan nao amăng pơsir hră pơ-ar tui jơlan gah pơđĭ tui bruă bơwih brơi hră pơ-ar”.

Hăng bruă pok pơhai ha amăng plĕ hơdôm jơlan gah pơsir, hrŏm hăng hơdră ngă pơčeh phrâo, bruă pơplih hră pơ-ar ƀơi tơring čar Dak Lak hmâo laih yak pơplih lăp yap ba; mơ̆ng anun ngă gal brơi, ba glăi tơlơi djơ̆ pran jua kơ khul grŭp, mơnuih lơm nao ngă hră pơ-ar, djru pơdŏng phun kha gong gai hreč bruă, rơnuk anai, tŭ yua, ba glăi bôh tơhnal, djơ̆ hăng tơlơi kiăng, bruă jao amăng rơnuk phrâo./.