Kơnong amăng thun 2025, tơring čar gir run ba 2.500 čô mơnuih nao mă bruă pơ tač rơngiao, đĭ dua wŏt ha mơkrah pơhmu hăng thun hlâo. Kiăng dưi ngă tui tơlơi pơkă, Dak Lak hơmâo git gai anom bruă hơduah ĕp bruă mă gum hrŏm hăng hơdôm anom bơwih ƀong sĭ mơdrô ba mơnuih nao mă bruă pơ tač rơngiao, pơphun pơtô pơblang, črâo brơi ƀơi hơdôm boh plơi pla hăng ƀut plơi pla amăng ƀon lan. Laih dong, tơring čar ăt pok pơhai kĭ pơkôl jơlan hơdră gum hrŏm anom bruă git gai ling tơhan tơring čar kiăng pơphun črâo brơi ƀing tơhan prap pot glăi tơdơi kơ pơgiong ngă tơhan.

Ơi Nguyễn Quang Thuân, kơ-iăng khua anom wai lăng bruă mă tơring čar Dak Lak brơi thâo, ƀon lan hơmâo pok pơhai tŭ yua hơdôm hơdră djru brơi mơnuih mă bruă dưi hrăm bruă hăng nao mă bruă pơ tač rơngiao; sit biă ñu lĕ mơnuih djuai ania ƀiă hơmâo djru brơi nơng 12-16 klăk prăk brơi rĭm čô mơnuih kiăng hrăm bruă, hrăm tơlơi tač rơngiao hăng ngă visa:

“Anai lĕ ngăn rơnoh prong prin kiăng djru ngă gêh gal ĕp brơi bruă mă kơ ƀing čơđai, sit biă ñu lĕ mơnuih djuai ania ƀiă. Bruă anai ƀing gơmơi ăt git gai hơdôm anom bruă pơtô bruă mă, sang hră pơtô rĭse amăng tơring čar kiăng gum hrŏm ha amăng plĕ. Ră anai gơnong bruă ăt glăk tŏ tui bruă mă hăng hơdôm anom bruă bơdjơ̆ nao kiăng hơmâo hơdjă lăp djơ̆ amăng pơtô bruă mă brơi ƀing hlăk ai djuai ania ƀiă kah hăng ĕp brơi bruă mă mơng ƀing pô anai”.