Tui hăng anun, bruă pok pơhai ngă tui kơnang kơ hră pơtrun mrô 178 hăng mrô 67 pơhrua phrâo mơ̆ng Kơnuk kơna, hrŏm hăng lu hră pơar pơtô ba ngă tui mơ̆ng Ding jum bruă čar hăng jơnum min mơnuih ƀôn sang tơring čar. Jơnum min mơnuih ƀôn sang tơring čar Dak Lak hơmâo pơtrun hiăp djop ding jum anom bruă, pơtrut bruă pơtô pơblang, pơsit brơi djop boh yom phun pơtrun anai kơ abih bang khua mua, mơnuih apăn bruă čar thâo, kiăng ngă tui djơ̆ tơlơi pơkă mơ̆ng kơnuk kơna. Amăng hrơi blan dăp glăi bruă mă, tơdah hơmâo khua mua, mơnuih mă bruă pơpă kiăng pơdơi lĕ ngă hră rơkâo pơdơi abih thun bruă, ƀudah pơdơi bruă hlao, djop sang bruă khom sem lăng tong ten djơ̆ anăn, djơ̆ pô dưi brơi pơdơi, samơ̆ ƀu dưi brơi pơdơi ôh hăng ƀing mă bruă thâo, mơnuih hur har.

Hră pơar rơkâo brơi pơdơi lĕ khom pơdah thâo djop lain anun lăi pơthâo tum teč, djơ̆ akŏ bruă tui hăng hră pơtrun mơ̆ng tơring čar. Truh mông anai, Dak Lak hơmâo năng ai 1.086 čô khua mua, mơnuih apăn čar hăng mơnuih mă bruă apah ƀong prăk blan, pơdơi abih thun bruă tañ hloh, aka truh thun ƀudah rơkâo pơdơi bruă hlao. Amăng anun hơmâo 806 čô mơnuih rơkâo pơdơi hlâo kơ truh thun pơdơi abih thun bruă hăng 280 čô rơkâo pơdơi bruă hlao. Amăng mrô anai, hơmâo 28 čô mơnuih mă bruă gưl tơring glông, 198 čô mơnuih ngă khua, 131 čô mơnuih apăn bruă đôč, 714 čô mơnuih ngă khua yua mơnuih ƀôn sang ruah gưl să hăng 22 čô mơnuih mă bruă apah ƀong prăk blan jăng jai tui hluai thun blan pơkă pơkôl.