Pơhiăp amăng mông jơnum, Khua git gai pơ ala mơnuih ƀôn sang dêh čar ơi Trần Thanh Mẫn brơi thâo, ƀơi mông jơnum anai, Jơnum min apăn bruă phun pơ ala mơnuih ƀôn sang dêh čar pơgôp hiăp čih pioh, pơkra glăi 28 mơta tơlơi phiăn, hră pơtrun hơmâo pơčrong sai laih tal sa jơnum lok anai, amra pơdah thâo hăng ƀing pơ ala mơnuih ƀôn sang pơsit hĭ jơnum tal 2 lok anai. Tal jơnum anai ăt pơgôp hiăp blung a kơ boh yom phun lăi pơthâo ƀing pơ ala mơnuih ƀôn sang amăng mông jơnum tal 2 lok anai, hơmâo tơlơi phiăn čih pơkra glăi, pơhrua nao hơdôm tơlơi amăng tơlơi phiăn gah ling tơhan; Hră pơtrun mơ̆ng ƀing pơ ala mơnuih ƀôn sang dêh čar kơ bruă čih pơkra glăi ƀudah lui hlao tơlơi phiăn pơkă kơ prăk kăk, rơnoh prăk pơhrui glăi phar mơ̆ng sang bruă, anom bruă kơnuk kơna; akŏ bruă dăp glăi sang bruă kơnuk kơna gưl tơring čar thun 2025. Khua git gai pơ ala mơnuih ƀôn sang dêh čar ơi Trần Thanh Mẫn rơkâo:

“Rim kơ boh yom phun sem glăi ƀu kơnong amăng bruă ngă giong tơlơi phiăn đôč ôh, dŏ djru amăng bruă pơtrut pran jua phrâo pioh pơđĭ kyar lŏn ia hăng pơhlôm brơi bruă ngă hruaih amăng glông bruă kơnuk kơna rơnuk phrâo. Djop sang bruă lăi pơthâo, pơtong rơđah hăng djop sang bruă pơdjơ̆ hrŏm hơdai gum nao rai tong ten, ngă pơrơđah hloh boh yom phun aka phara anŏ kiăng, ngă hiư̆m pă abih bang hră pơar dưi pơsit amra pơhưč pran jua hăng dưi ngă tui sit nik”.

Ƀơi mông jơnum, ƀing ding kơna mơ̆ng jơnum min apăn bruă phun pơ ala mơnuih ƀôn sang dêh čar pơgôp hiăp kơ tơlơi phiăn pơphun bruă mă gong gai kơnuk kơna plơi pla čih pơkra glăi. Jơnum min apăn bruă phun tŭ ư mơ̆n hăng boh yom phun čih pioh, ming pơkra glăi mơ̆ng kơnuk kơna pô gơgrong ba. Samơ̆, rơkâo sem glăi tong ten tơlơi pơtrun kơ khul pơ ala mơnuih ƀôn sang gưl tơring čar, dưi pơpha brơi kơ jơnum min mơnuih ƀôn sang sa gưl ƀudah khul pơ ala mơnuih ƀôn sang pơ să hai. Khua Jơnum min Tơlơi phiăn hăng wai lăng bruă tơlơi phiăn ơi Hoàng Thanh Tùng brơi thâo:

“Khul pơ ala mơnuih ƀôn sang lĕ anom bruă pơ ala brơi anŏ kiăng, tơlơi pơmin mơ̆ng mơnuih ƀôn sang hăng tơlơi dưi ngă pô mơ̆ng mơnuih ƀôn sang ƀơi plơi pla. Yua kơ anun, bruă jao tơlơi dưi, bruă mă mơ̆ tơlơi phiăn pơkă gah tơlơi dưi, anŏ glăm ba mơ̆ng khul pơ ala mơnuih ƀôn sang brơi kơ sang bruă Jơnum min mơnuih ƀôn sang pô ngă tui bruă jao tui tơlơi phiăn samơ̆ aka ƀu djơ̆ hăng boh tŭ yua, bruă mă sit nik laih anun hơdră mă bruă mơ̆ng rim sang bruă, anun ba truh lu anom bruă kơnuk kơna ngă pơhrua brơi bruă mă pô pơkŏn, pơ ala wơ̆t tơlơi dưi mơ̆, anom bruă mơnuih ƀôn sang kơnang ƀơi plơi pla, ƀu djơ̆ găl hăng tơlơi phiăn pơkă kơ bruă mă tơlơi dưi gong gai kơnuk kơna hơmâo pơpha bruă mă, lir hơbit hăng pel ĕp tơlơi dưi amăng bruă mă”.

Pơblang kơ tơlơi anai, Khua ding jum bruă čar, yă Phạm Thị Thanh Trà brơi thâo:

“Ƀing gơmơi tui hluai nao atur bruă ngă, mơta sa lĕ atur bruă kơđi čar hăng sa pran jua kiăo tui jơlan hơdră mơ̆ng khul apăn bruă ping gah dêh čar pơtrun, mơ̆ng Ding jum kơđi čar, pơtum lăi nao bruă ngă tum teč khut khăt, pioh pơpha tơlơi dưi mă bruă plah wah Gơnong dlông hăng gong gai plơi pla laih anun plah wah amăng djop sang bruă gong gai ƀơi plơi pla. Dua lĕ, ăt tơbiă rai mơ̆ng anŏ kiăng sit nik khom pơblih mơ̆ng bruă git gai wai lăng anom bruă kơnuk kơna tơđar jing bruă wai lăng ƀơi tơring čar hăng tơlơi tơpă, mơnuih ƀôn sang ngă pô tŭ yua, bơwih brơi kơ mơnuih ƀôn sang sit nik. Tơdah kah hăng ră anai ƀu pok pơhư prong ôh khul pơ ala mơnuih ƀôn sang gưl tơring čar ăt tơnap mơ̆n”.

Pơhiăp amăng mông jơnum bơkơtuai nao rai, ơi Trần Thanh Mẫn, Khua git gai pơ ala mơnuih ƀôn sang dêh čar rơkâo, anom bruă čih pơkra hăng anom bruă pơtong glăi khom jŭ yap, pel ĕp tong ten pioh pơpha tơlơi dưi, jao bruă mă, kiăng tơdơi kơ tơlơi phiăn anai hơmâo ƀing pơ ala mơnuih ƀôn sang dêh čar pơsit hĭ, djop tơring čar plơi pla hlong ngă tui mơtam:

“Kâo rơkâo ăt khom sem glăi tong ten. Mơ̆ng anai truh kơ hrơi ƀing pơ ala pơsit hĭ, anŏ hơgĕt mơ̆ Kơnuk kơna ăt pơpha gưl mă bruă ƀơi tơring čar, plơi pla amăng tơlơi phiăn anai lĕ ƀing ta khom jŭ yap ĕp glăi lăng, kiăng pơgi kơdih anai sit ĕp glăi pơsit laih, tơring čar anăm lăi ôh, ƀu dưi ngă tui yua kơƀah, yua gun. Tơlơi phiăn hơmâo kơsem min čih pơkra pok jơlan kơ Kơnuk kơna dêh čar pơkă ƀudah pơtrun ngă ƀu dưi phara hăng Phiah phiăn dêh čar ôh, kiăng ƀing ta pok pơhai ngă tui sa hơnơ̆ng, abih bang dưi mă bruă hruaih nao pơ anăp”.

Ăt amăng tal jơnum anai mơ̆n, Jơnum min apăn bruă phun pơ ala mơnuih ƀôn sang dêh čar pơsit hĭ Hră pơtrun čih pơkra glăi mơta tơlơi 10 Hră pơtrun Mrô mơnuih. Tui hăng anun, rim krôp rơkơi bơnai, mơnuih ƀôn sang hơmâo tơlơi dưi pơsit mă thun blan či tơkeng ană, mrô ană bă či tơkeng rai hăng anŏ tơkeng ker ƀudah hui tui hluai gơñu, kiăng ngă djơ̆ găl thun, tơlơi suaih pral, anŏ gêh găl hrăm hră, mă bruă apah, mă bruă čar, rơnoh prăk pơhrui glăi mơ̆ng bruă mă hăng hơdră pơtô ba, ƀă ƀem čem rông ană đah mơ̆gn klă, krôp rơkơi bơnai khom pơčrong sai, bơtŭ ư tui hăng tơlơi pơkă bơkơnar đah rơkơi hăng đah kơmơi ƀu hơmâo hlơi pơgô̆ hăng pơgăn nao rai tơdruă ôh.