Ơ yă, tơdơi kơ 5 thun pok pơhai kơčăo bruă 8, rơkâo kơ ih pơtong glăi boh tơhnal dưi ngă hăng hơdôm tơlơi thâo thăi tom găn rơgao amăng bruă pok pơhai kơčăo bruă anai hơgĕt ?

Yă Nguyễn Thị Minh Hương: Boh tơhnal mơ̆ng kơčăo bruă 8 hăng 9 tơhnal pơkă hơmâo 4 črăn laih dưi ngă laih anun lu hloh rơnoh pơkă, ƀơi anŏ hơmâo lu boh tơhnal pơkă đĭ hloh 200%. Dŏ glăi kơnong 5 tơhnal pơkă ƀing gơmơi him lăng ngă djop amăng rơnuč thun 2025, jing abih čăl tal 1 amra ngă giong. Kơnong dŏ sa tơhnal pơkă tơnap tap hloh aka ƀu dưi ngă. Tơlơi anai brơi ƀuh boh tŭ yua mơ̆ng kơčăo bruă anai prong mơ̆n, hăng črăn bruă prong tui tơhnal pơkă lu hloh hơmâo dưi ngă.

Hơdôm boh tơhnal dưi ngă lu, juăt ñu lir hơbit hăng hơbô̆ bruă djru mơnuih ƀôn sang plơi pla, bơhmutu hơbô̆ bruă “Anih sang dŏ đăo kơnang” ƀudah hơdôm grup hyu pơtô ană plơi pla. Tơlơi anai brơi ƀuh, tơlơi thâo hluh hăng ngă tui mơ̆ng mơnuih ƀôn sang yơh gru tơhnal djru kơ bruă mă pok pơhai kơčăo bruă anai ba glăi boh tơhnal tŭ yua lu hloh. Sa amăng hơdôm tơlơi hrăm tŭ dưi ba glăi boh tơhnal klă hiam mơ̆ng čăl tal 1 kơčăo bruă anai lĕ, hơmâo tơlơi ngă hrŏm mơ̆ng gong gai kơnuk kơna hăng mơnuih ƀôn sang yơh phun. Yua kơ anun, mơnuih ƀôn sang djru hrŏm amăng kơčăo bruă hăng tơlơi kiăng laih anun anŏ čang rơmang mơ̆ng gơñu, mơ̆ng anun djru gơmơi ăt ƀư̆ pơkra tui bruă mă brơi djơ̆ găl hloh.

Amăng čăl dŏ glăi mơ̆ng thun 2026-2030 mơ̆ng Jơlan hơdră dêh čar pơtrun, Kơčăo bruă 8 hơmâo tơlơi pơblih pơkra glăi hăng đing nao hlâo hloh hơgĕt lĕ, ơ yă ?

Yă Nguyễn Thị Minh Hương: Ră anai, pơkă hơnơ̆ng kơ Jơlan hơdră mơ̆ng dêh čar pơtrun ăt amra hơmâo mơ̆n anŏ pơblih tui. Khă hnun, mah hiư̆m pă hai, Khul đah kơmơi mut phung Việt Nam ăt pơtong rơđah lĕ, tơlơi hơdai gum hrŏm pơtô kơ tơlơi thâo hluh bơkơnar rơkơi bơnai yơh phun amăng djop bruă mă mơ̆ng Jơlan hơdră tơhnal dêh čar pơkă, pơtrut pơđĭ kyar bơwih ƀong huă mơnuih mơnam amăng kual djuai ƀiă hăng čư̆ siăng. Tơlơi anun kiăng lăi, mah hơmâo kơčăo bruă 8 ƀudah ƀu hơmâo hai, djop bruă mă ăt amra kiăng pơtlep hrŏm, hơdai gum hơbit pơtô lăi bruă bơkơnar rơkơi bơnai mơ̆n anŏ yom hloh.

Bơhmutu, hăng bruă mă pơđĭ kyar bơwih ƀong huă mơnuih mơnam, ăt jing hơdôm bruă mă djru phara kơ ƀing đah kơmơi, kah hăng khul ngă hrŏm ƀudah sang bruă mơdrô yua kơ đah kơmơi ngă pô. Ƀudah hăng hơdôm tơlơi pơdjơ̆ nao wai pơgang tơlơi suaih pral, khom hơmâo boh yom phun phara pioh djru kơ ƀing đah kơmơi pơgang tơlơi suaih pral, tơkeng ană bă, čem rông ană bă, pơtô ba amĭ hăng čơđai muai. Klah čun glăi, ƀing gơmơi ăt pơtrut bruă hơdai gum hrŏm pơtô tơlơi bơkơnar rơkơi bơnai amăng djop bruă mă mơ̆ng kơčăo bruă hăng pơđĭ tui tơlơi thâo, bruă ngă kơ ƀing đah kơmơi hrơi ăt kah hăng khua mua apăn bruă ƀing đah kơmơi amăng plơi pla, djop tơring čar.

-Hai, bơni kơ ih hŏ!