Lơm bruă yua boh thâo phrâo hăng pơplih mrô ƀu djơ̆ tơlơi ataih ayaih dong tah, mơ̆ jing gơnam juăt yua klă biă mă, lu đah kơmơi djuai ania ƀiă tañ mă yua tơlơi anai. Hăng tơlơi pơčeh phrâo, ƀu djơ̆ kơnong ngă pơdrong asah amăng sang anŏ đôč ôh mơ̆ ăt ngă lar hyu rơnoh yôm gru grua phara mơng djuai ania pô, pơgôp ngă tui hơdôm hơnong pơkă mơng akŏ bruă mrô 8 “Ngă tui bruă bơkơnar đah rơkơi đah kơmơi hăng pơsir hĭ hơdôm bruă ječ brơi đah kơmơi hăng čơđai” amăng jơlan hơdră tui hơnong pơkă dêh čar pơđĭ kyar bơwih ƀong huă mơnuih mơnam kual mơnuih djuai ania ƀiă hăng čư̆ siăng.

Sa amăng hơdôm tơlơi bơră ruai ngă pơtrut pơsur mơnuih mơnam anun lĕ bruă mă mơng amai Khà Thị Hạnh, djuai ania Thái, dŏ ƀơi tơring čar Lai Châu. Hơdip truh prong ƀơi kual čư̆ siăng, amai Hạnh hluh rơđah tơlơi yôm mơng hơdôm phun kyâo jrao jum dar plơi pla. Hluh rơđah bruă pơjrao hăng kyâo pơtâo ƀiă mơnuih thâo, ñu gir run nao hrăm rơđah dong ƀơi Sang hră Y Dược Lê Hữu Trác. Hăng hơdôm boh thâo nai pơtô brơi, amai Hạnh ƀu djơ̆ kơnong thâo tong ten hơdôm phun kyâo jrao hơđăp đôč ôh mơ̆ ăt thâo mă yua boh thâo phrâo kiăng kơ pơkra hơdôm djuai jrao mơng akha kyâo yua anun ngă jê̆ giăm hăng amuñ mă yua ƀiă.

Hluai tui glông lar hyu kơtang mơng Tiktok, amai Khà Hạnh hơmâo pok anih pơdah ƀuh anăn “Tây Bắc TV”. Hơdôm video jê̆ giăm dar mă lơm hyu ĕp, pĕ koh glăi, pơkra kyâo jrao hrŏm hăng tơlơi pơblang rơđah rơđông kơ anŏ pơglăi hơmâo pơhưč lu mơnuih mut lăng, ngă kyâo jrao Tây Bắc hơmâo lu mơnuih thâo.

“Lơm pok anih pơdah ƀuh online anăn Tây Bắc TV, blung hlâo ƀing gơmơi pok sa anăn pơdah hlâo. Tơdơi kơ ƀiă hrơi, ƀing gơmơi hơmâo pơsit tong tơlơi hmư̆ hing mơng ƀing gơmơi hăng dưi blơi pơhrui lu gơnam đang hmua, phun kyâo jrao. Kâo ƀuh, tơdah kơnong hajăn ƀing gơmơi dưi ngă mơ̆ neh met wa pơkŏn hiưm ñu ? Laih anun ƀing gơmơi pok lu anăn pơdah hăng črâo brơi lu adơi amai kual ataih, asuek kah hăng hơdôm anih hơmâo gơnam OCOP kiăng gơñu thâo ngă hiưm pă kiăng ba gơnam mơng ƀing gơñu pơƀuh amăng plang internet”.

Blung hlâo, amai Khà Hạnh pơmĭn kơnong pơblang brơi tơlơi thâo mơng ñu. Samơ̆ hơdôm tơlơi lăi glăi mơng mơnuih blơi yua, hơdôm tơlơi bơră ruai kơ bruă gơnam tam ñu pơkra rai djru pơhlôm brơi tơlơi suaih pral hơmâo pơtrut pran jua ñu ngă bruă. Amai Hạnh brơi thâo:

“Kâo ƀuh ană mơnuih ta pơplih hăng plơi pla pơplih tui mơn. Tơdah anom bơwih ƀong sĭ mơdrô ƀing gơmơi ƀu pơplih amra dŏ glăi gah tlôn. Laih dong Lai Châu lĕ sa kual lŏn hơmâo lu gơnam đang hmua yôm phara, sit biă ñu lĕ hơdôm phun kyâo jrao yôm. Samơ̆ tơdah dŏ tơguăn mơng tuai čuă ngui nao tơl anih amra tơnap tap biă, bruă sĭ mơdrô amra kaih biă mă. Hăng kâo ƀuh tuai čuă blơi gơnam amăng plang internet yua anun mơnuih blơi yua pơ hơpă ƀing ta kiăng sĭ gơnam ƀơi anun”.

Kual mơnuih djuai ania ƀiă hăng čư̆ siăng lĕ anih dŏ hơdip kơ rơbêh 14,6 klăk čô mơnuih, dưm dưm giăm 15% mrô mơnuih đơ đam dêh čar, hăng mrô sang anŏ djuai ania ƀiă giăm 22%, lu hơdôm wŏt pơhmu hăng jŭ yap bơkơnar hrŏm đơ đam dêh čar. Đah kơmơi djuai ania ƀiă lĕ ƀing mơnuih bơdjơ̆ nao kơtang hloh mơng rin rơpa. Laih anun dong, bruă mă yua boh thâo phrâo ăt phara tong ten: Mrô mơnuih djuai ania ƀiă mă yua Internet hăng hơmâo măi komputơr dŏ aset pơhmu hăng djop anih, ngă tơnap tap amăng bruă bơwih ƀong yua boh thâo phrâo.

Samơ̆, amăng tơlơi lông dŏ hơgŏm lu tơlơi dưi. Đah kơmơi djuai ania ƀiă lĕ ƀing mơnuih djă pioh boh thâo yôm phăn amăng ƀôn lan, anai lĕ ƀing ngă pô mơng gơnam đang hmua yôm phara, gơnam pơkra mă. Anai lĕ gơnam tam yôm, jing “mah” tơdah dưi mă yua lăp djơ̆ amăng tơlơi bơwih ƀong phrâo. Tơlơi bơră ruai mơng amai Khà Hạnh lĕ pơƀuh brơi tong ten kơ bruă sa čô đah kơmơi djuai ania ƀiă dưi pơlir gru grua hơđăp hăng tơlơi pơplih phrâo kiăng ba glăi hơdôm tơlơi yôm phăn amăng plơi pla ala ƀon. Mơng bruă pok mă anih pơdah ƀuh anăn “Tây Bắc TV” hăng gêh gal sĭ mơdrô gơnam đang hmua, phun kyâo jrao, ñu ăt gơgrong pok dong lu anih pơƀuh brơi pơkŏn dong, črâo brơi adơi amai kual ataih, asuek hăng hơdôm anih hơmâo gơnam OCOP ba gơnam sĭ online.

Ƀuh tong ten hơdôm tơlơi lông hăng tơlơi dưi anai, Kơnuk kơna hơmâo pok pơhai khut khăt. Akŏ bruă mrô 8 amăng Jơlan hơdră tui hơnong pơkă dêh čar lĕ sa tơlơi pơhmutu tong ten. Khua khul pơlir hơbit đah kơmơi Việt Nam Nguyễn Thị Tuyến pơsit tong: “Hơnong pơkă mơng akŏ bruă mrô 8 lĕ hrưn đĭ tơlơi pơmĭn, lăng phara dong, bơwih brơi tơlơi hơdip mơda, wai pơgang, bơwih brơi đah kơmơi hăng čơđai, ngă tui hơnong pơkă bơkơnar đah kơmơi đah kơmơi hăng ngă tui pran gơgrong mơng đah kơmơi amăng pơđĭ kyar bơwih ƀong huă-mơnuih mơnam”./.