Jơlan hơdră yua Khul đah kơmơi Việt Nam pơphun kiăng djru, čem rông ba čơđai drit droai, tơnap tal. Tơdơi kơ giăm 5 thun pơphun ngă, ƀơi Gia Lai hơmâo 172 čô amĭ čơkă čem rông dŏ hrŏm mơtăm hăng 150 čô amĭ čem rông ba čơđai mơ̆ng ataih. Ƀing čơkă čem rông ƀing čơđai glăk djru, wai lăng, rông ba 407 čô čơđai drit droai. Hăng lu hơdră gum djru, jơlan hơdră anai hơmâo brơi rơbêh 57.000 anung gơnam, 580 anung prăk, 185 boh rơdêh tang wang, djru pơkra sang dŏ kơ ƀing čơđai drit droai...nua ñu giăm 10 klai prăk.

Ƀơi mông ngă lơphet, ƀing khua hơmâo lăi nao rai hơbô̆ bruă klă hiam amăng bruă pơtruh abih bang mơnuih, jak iâu khul grup, mơnuih mơnam hrŏm hăng gum čem rông ba ƀing čơđai drit droai; lăi nao tơlơi dŏ bơngơ̆t mơ̆ng ƀing khua amăng Khul lơ̆m pơphun ngă; tơlơi khăp ƀu-eng mơ̆ng ƀing amĭ lơ̆m čem rông ba čơđai, lăng kar hăng ană gơñu pô, kiăng čơđai hơmâo sang anŏ mơ-ak.