Khua git gai pơ ala mơnuih ƀôn sang dêh čar ơi Trần Thanh Mẫn brơi thâo, tal 1, jơnum lok 9 hơmâo pơphun hăng pran jua mă bruă tơpă hơnơ̆ng, glăm ba sit nik, hmar laih anun pơsit pran jua kơđi čar tong ten biă mă, pơjing rai tơlơi bơtŭ ư hrŏm mơ̆ng abih bang ƀing pơ ala mơnuih ƀôn sang dêh čar. Amăng anun, boh yom phun yom kơ bruă kơđi čar-tơlơi phiăn pơkă yom phara amăng tal jơnum anai, yua hơmâo pơsit hĭ hơdôm pok hră pơtrun sem lăng čih pơkra glăi, pơhrua nao hơdôm mơta tơlơi amăng Phiah phăn thun 2013 kiăng ăt ngă tui jơlan hơdră dăp glăi, pơhrŏ hơbôt sang bruă kơnuk kơna amăng glông bruă kơđi čar. Ngă tui tơlơi pơtrun anai, rơwang hrơi tơjuh laih rơgao, Khul khua mua Jơnum min djop djuai ania mơnuih mơnam dêh čar Việt Nam ăt hơmâo pơphun jơnum mă hiăp mơnuih ƀôn sang, djop anom bruă djru pơgôp hiăp kơ Hră pơtrun brơi pơblih čih pơhrua glăi hơdôm mơta tơlơi amăng Phiah phiăn thun 2013. Git gai jơnum, Kơ-iăng khua Jơnum min djop djuai ania mơnuih mơnam Việt Nam ơi Hoàng Công Thủy lăi:

“Anŏ čih pơkra pơblih phrâo, pơhrua nao Phiah phiăn tal anai kơnong ƀiă đôč, pơtum nao amăng 8/120 mơta tơlơi pơkă amăng Phiah phiăn thun 2013 kiăng ngă pơrơđah hloh hmao kru jơlan hơdră ping gah pơtrun kơ dăp glăi sang bruă mơ̆ng Jơnum min djop djuai ania mơnuih mơnam Việt Nam, djop khul grup sang bruă kơđi čar-mơnuih mơnam, khul mut phung mơ̆ng mơnuih ƀôn sang yua Ping gah hăng Kơnuk kơna jao brơi bruă mă; ngă pơgiong hơbô̆ bruă gong gai kơnuk kơna ƀơi tơring čar dŏ glăi 2 gưl đôč, anăp nao jĕ giăm ană plơi, tong ten, bơwih brơi klă hloh kơ mơnuih ƀôn sang”.

Khua git gai pơ ala mơnuih ƀôn sang dêh čar ơi Trần Thanh Mẫn brơi thâo: Kơčăo bruă čih pơkra Hră pơtrun mơ̆ng sang bruă khua pơ ala mơnuih ƀôn sang dêh čar kơ tơlơi phiăn pơkă bruă mă, jơlan hơdră phara pơtrut pơđĭ kyar bơwih ƀong huă yua mơnuih ƀôn sang ngă pô hơmâo 7 črăn hăng 17 mơta tơlơi, amăng anun pơkă hrŏm pơdjơ̆ nao brơi pơblih anih anom ngă bruă sĭ mơdrô; djru brơi ĕp lŏn ngă anih mă bruă, pơdong sang bruă sĭ mơdrô; djru prăk kăk, čan prăk blơi gơnam či mă bruă; djru boh thâo ia rơgơi phrâo, pơblih tơlơi pơčeh phrâo, ba yua ia rơgơi mrô hăng pơtô hrăm mơnuih mă bruă; djru sang bruă mơdrô anet hăng man ƀrô kơsung nao hlâo amăng bruă mă:

“Tơlơi lăp đing nao biă mă lĕ Hră pơtrun kơ tơlơi bơwih ƀong huă, yua mơnuih ƀôn sang ngă pô sang mơdrô prong, hră pơtrun mơ̆ng Ping gah phrâo kĭ lơ 4/5 lĕ Kơnuk kơna, Khua dêh čar ăt jơnum dua wơ̆t prăp lui ngă hră pơtrun pơdah brơi ƀing pơ ala mơnuih ƀôn sang ĕp glăi. Ping gah pơčrâo brơi jơlan laih, ƀing ta kiăng ngă hiưm pă, pơrơđah hloh ngă tui tơlơi anai. Kâo jao kơ Jơnum min bơwih ƀong huă, prăk kăk ngă hrŏm tong ten hăng Ding jum prăk kăk ăt kah hăng hơdôm sang bruă pơdjơ̆ nao pơphun tañ, mơ̆ng ataih”.

Khua git gai pơ ala mơnuih ƀôn sang dêh čar ơi Trần Thanh Mẫn ăt pơtă pơtăn, Hră pơtrun kơ hơdôm tơlơi pơkă, jơlan hơdră yom hloh pơtrut bơwih ƀong huă, sang bruă yua mơnuih ƀôn sang ngă pô kiăng pơblih anih anom, sang bruă tuh pơ alin bơwih ƀong huă, sĭ mơdrô; djru brơi tŭ mă tơlơi djru lŏn tơnah, anih pơdong sang bruă pơkra ming; djru prăk kăk, prăk čan, blơi gơnam yua mă bruă; pơtrut bruă ngă hrŏm plah wah kơnuk kơna hăng ană plơi laih anun čih rơkâo blơi gơnam sĭ mơdrô mơ̆ng sang bruă pơkra ming; djru boh thâo ia rơgơi, tơlơi pơhing phrâo, pơblih yua mrô, pơčeh phrâo tañ hăng pơtô hrăm mơnuih mă bruă; djru akŏ pơdong sang bruă sĭ mơdrô man ƀrô hăng anet, sang bruă mơdrô prong, ba jơlan hlâo.....Khua Jơnum min mơnuih ƀôn sang dêh čar ơi Trần Thanh Mẫn lăi pơtong:

“Ƀing ta khom pơblih tơlơi pơmin dăp hơdră, Kơnuk kơna pơsit phrâo pơhrua lui bruă kơnong wai lăng đôč đač tui hăng tơlơi Khua git gai ping gah ơi Tô Lâm hơmâo pơñă nao rai lu wơ̆t laih. Anŏ pơhlôm tong ten mơ̆ng tơlơi phiăn pơkă hăng djru pơblih yua ia rơgơi mrô, pơblih anŏ pơčeh phrâo,jing jơlan hơdră kơnuk kơna gum hrŏm hăng mơnuih ƀôn sang amăng bruă ngă pơđĭ kyar.....Kâo rơkâo jŭ yap glăi tong ten hloh djop pô, tơlơi gêh găl tŭ mă tơlơi mơ̆ng jơlan hơdră, pơhlôm pơgang bruă mă khom dưi, tŭ yua mơ̆ng jơlan hơdră kơnuk kơna pơtrun pok pơhai amăng bruă mă rim hrơi”.

Pioh prăp lui boh yom phun kơ tal 2 jơnum lok 9, rơwang hrơi tơjuh rơgao, Jơnum min apăn bruă phun pơ ala mơnuih ƀôn sang dêh čar ăt brơi pơgôp hiăp kơ 3 mơta tơlơi či mă bruă, pơdah thâo kơ ƀing pơ ala mơnuih ƀôn sang dêh čar amăng lơ 19/5, hơmâo hơdôm mơta : jơlan hơdră tuh pơ alin kơčăo bruă tuh pơ alin čuk pơkra jơlan rơdêh đuăi hmar mơ̆ng Quy Nhơn-Plei Ku; jơlan hơdră tuh pơ alin Kơčăo bruătuh pơ alin čuk pơkra jơlan ter 4 ƀôn prong Hồ Chí Minh.