Hrŏm hăng bruă pơhlôm rơnuk rơnua, hơđong brơi tal pơplông, tơring čar đing nao biă mă bruă djru brơi ƀing čơđai kual ataih, asuek, kual mơnuih djuai ania ƀiă hăng ƀing čơđai tơnap tap, anăm brơi čơđai hơpă yua hơmâo prăk đĭ rơdêh nao rai bơdjơ̆ nao bruă nao pơplông. Tal pơplông thun anai, Dak Lak pơphun 64 anih pơplông sit nik, 55 anih prap lui hăng giăm 1.500 anih pơplông. Rơbêh 5.000 čô mơnuih apăn bruă, nai pơtô, mơnuih mă bruă mut hrŏm amăng bruă pơphun pơplông. Tơring čar hơmâo jao bruă tong ten brơi rĭm gơnong bruă, sang bruă, gong gai ƀon lan; laih dong pel ĕp glăi djop mơta tơlơi gal kơ gơnam măi mok, mơnuih mă bruă hăng pơsir hĭ bruă phrâo ƀuh.

Hăng hơdôm kual ataih, asuek hăng kual tơnap tap, djop ƀon lan gum hrŏm hăng hơdôm boh sang hră pel ĕp, hơmâo hơdră djru brơi lăi djơ̆ brơi ƀing čơđai. Jơlan hơdră anai “Pơsur pran amăng bơyan pơplông”  hơmâo pok pơhai djop anih hăng tơlơi mut hrŏm mơng ƀing hlăk ai hăng hơdôm tơlơi gal hloh amăng hơdôm hrơi pơplông. Hrŏm hăng anun, hơdôm anom bruă bơdjơ̆ nao pơhlôm rơnuk rơnua amăng jơlan glông, pơhlôm brơi apui yua, tơlơi pơhing djru brơi hăng hơdôm tơlơi gal djru brơi tal pơplông  amăng djop mơta bruă.