Tlam kơnôl 4/8, Khul khua pơ ala mơnuih ƀôn sang tơring čar Dak Lăk pơgôp hiăp kơ jơlan hơdră djru ba hơdôm boh sang hră gah guai mă bruă tŭ yua, hơđong, sui thun. Ră anai sang hră kơnuk kơna čem rông pơƀut lu gưl hrăm ƀơi hơdôm boh să pơ guai tơring čar pơhlom laih bruă man pơdong, him lăng ba mă yua amăng thun hrăm 2026-2027 anai mơtăm yơh. Khă hnun, hơdôm ring bruă pơkŏn kah hăng măi mok, gơnam yua pơtô hrăm, bruă prăp rơmet nai pơtô, mơnuih mă bruă, hrŏm hăng tơlơi pơkă ruah čơđai mut hrăm, hơdră djru ăt kiăng čih pơkra pơgiong hĭ mơn. Yă Cao Thị Hòa An, Khua Jơnum min pơ ala mơnuih ƀôn sang tơring čar lăi, tuh pơ alin sang hră kơnuk kơna čem rông pơ guai dêh čar ƀu kơnong man pơdong anih anom, prăp rơmet gơnam yua đôč ôh, ăt khŏm pơhlom brơi čơđai pơ plơi pla tơnap tap dưi nao sang hră, pơtrut tŭ yua ring bruă; kiăng Jơnum min mơnuih ƀôn sang tơring čar git gai hơdôm anom bruă bơdjơ̆ nao man pơdong tañ sang hră pơ guai, čih pơkra giong Hră pơtrun hơdră djru kơ čơđai sang hră hăng hơdôm boh sang hră kơnuk kơna čem rông.

Kơnôl 4/8, Jơnum min mơnuih ƀon sang tơring čar Gia Lai ba tơbiă hơdră bruă dưm dăp glăi sang hră čơđai muai hăng sang hră gưl tlâo kơnuk kơna pơdong kiăng hrưn đĭ tŭ yua amăng bruă wai lăng, yua ƀing nai pơtô, gơnam măi mok, lăp djơ̆ tơlơi rơkâo pơđĭ kyar pơtô pơjuăt amăng rơnuk phrâo. Tui akŏ bruă anai, mrô sang hră čơđai muai hăng gưl tlâo kơnuk kơna pơdong amăng tơring čar amra hrŏ trun mơng 1.267 boh sang hră dŏ 699 boh sang hră (hrŏ 568 boh sang hră). Bruă dưm dăp glăi amra ngă tui ƀơƀrư̆, lăp djơ̆ hăng tơlơi gal sit nik ƀơi ƀon lan; amăng anun, ƀơi 61 boh să, phương kual gêh gal, mrô hrŏ trun truh rơbêh 51%, bơ ƀơi 74 să, phương dŏ glăi hrŏ trun rơbêh 37%. Gơnong bruă pơtô pơjuăt Gia Lai brơi thâo, bruă dưm dăp amra pơlir hăng pơhlôm brơi tơlơi dưi hrăm hră kơ ƀing čơđai, sit biă ñu ƀing čơđai kual tơnap tap, kual mơnuih djuai ania ƀiă./.