Mơ̆ng bruă hyu hơduah ĕp sem lăng, tơring čar hơmâo 44 boh sang anŏ kiăng djru, hơmâo 24 boh sang kiăng man phrâo laih anun 20 kiăng pơkra glăi. Đại tá Đinh Văn Hưng, Khua ping gah Anom bruă khua git gai tơhan tơring čar Dak Lăk brơi thâo, rơngiao kơ prăk djru mơ̆ng Kơnuk kơna, tơhan blah ngă tơring čar iâu pơthưr pơčruh thim prăk kăk truh 100 klăk hăng sang man phrao laih anun 50 klăk hăng sang pơkra glăi.

Pơhiăp ƀơi mông ngă yang man pơdong, Kơ-iăng khua jơnum min mơnuih ƀôn sang tơring čar Dak Lăk Đào Mỹ lăi, anai jing bruă yom biă gah kơđi čar, thâo hơdor amăng tơngia biă mă, pơƀuh tơlơi pơpŭ prong hăng sang anŏ djru hơkrŭ lŏn ia ta; laih dong kiăng hơdôm anom bruă bơdjơ̆ nao ngă hrŏm kjăp, pơhlom man pơkra djơ̆ hrơi pơkă, djơ̆ pô kiăng djru laih anun djơ̆ tơlơi phiăn./.