Ră anai, ƀing čơđai muai ĕp lăng tơlơi pơhing amăng internet hăng facebook tañ biă mă. Tơlơi hrăm hră pơar, tơlơi ngui ngor mơak ƀudah pơhiăp nao rai amăng internet juăt lăi pơhiăp nao rai online, amuñ biă ngă kơ gơñu mơ-it nao rai rup, anih dŏ, plơi pla, sang hră ƀudah lu tơlơi pơhing gơñu pô kơ arăng lăng, samơ̆ aka ƀu pơsit tong ten ôh hơgĕt tơlơi či truh hơmâo.

Tơlơi lăp bơngơ̆t hloh lĕ ƀing čơđai jing ƀing bơbeč yua mơ̆ng tơlơi arăng plư pleč, ngă sat pơhŭi drơi jăn, ƀudah arăng mă rup, mă ană pioh djip djak pơhŭi ngă sat, ngă mlâo. Ƀu kơnong ƀing čơđai đôč ôh, amĭ ama ƀing čơđai ăt hơmâo lu mơnuih hor pơdah đĭ rup bruă ngă mơak mơ̆ng sang anŏ brơi arăng lăng, kah hăngvideo ƀudah tơlơi pơhing anih dŏ pơthâo abih amăng facebook, anun ta ƀu thâo ôh tơlơi sat či truh kơ ta. Kơnong sa pok rup ƀudah anăn ten mơ̆ng ta pơdah thâo, rup ta čut eng ao ƀudah rup ană bă buh eng ao pơ sang hră, arăng čih ană anăn, pơmut mă rup laih anun arăng krăp lăng anih dŏ, sang hră ană bă hrăm, hrơi mông mut tơbiă pơ sang hră. Tui hăng ƀing mơnuih rơgơi amăng plang internet, lu mơta mrô rơnoh anun ta pơmin ƀu hơmâo tơlơi hơgĕt ôh, samơ̆ sit ƀing soh sat hơmâo mă lĕ gơñu amra ngă lu mơta sat pơhŭi kơ ta.

Yua kơ anun, tơlơi phiăn pơkă pơgang brơi mrô čih anăn ƀing čơđai amăng Tơlơi phiăn pơgang mrô rơnoh djop pô hơmâo tơlơi pơkă lu hloh hăng djop sang bruă, anom bruă mơdrô kiăng kơđiăng lơ̆m ngă tui. Nai thâo kơđi Nguyễn Đức Long-mơnuih hơmâo mă hră pơsit jar kmar pơgang anŏ hơgom tơlơi dưi djă pioh anăn mrô kơ djop pô, ñu lăi:

“Lơ̆m čơđai mơ̆ng 7 thun pơngŏ kiăng hơmâo tơlơi tŭ ư mơ̆ng gơñu pô hrŏm hăng mơnuih prong pơ ala sit nik kah hăng amĭ ama lăi pơthâo mrô rơnoh kơ tơlơi hơdip mơda anăn păn, thun tơkeng kơ čơđai anun ƀudah lăi pơthâo hnun kah hăng pơthâo brơi djop tơlơi pơhing amăng tơlơi hơdip mơ̆ng rim pô, tơlơi hơgom lĕ jing kiăng lăi nao lu mơta. Kah hăng phung anăn, thun tơkeng, anih dŏ, rup ƀô̆ mơta drơi jăn, plơi pla, anih čơđai anun dŏ, plơi pla tơring tơrang,...abih bang tơlơi anun arăng lăi tơlơi pơhing  hơjăn mơ̆ng pô aun. Kĭ hră pơhlom nua pô tŭ mă anŏ tŭ yua ƀudah mơnuih hră pơhlom nua pogang ba lĕ čođai muai thâo, ƀing ta khom lăng tơlơi pơhing mơ̆ng pô čơđai anun, tơlơi pơhing hơjăn, hơgŏm drơi jăn ñu, arăng lăng ten kiăng huăi ngă soh glăi tơlơi pơkôl pơkă”.

Tui hăng Mơta tơlơi 24 Tơlơi phiăn Pơgang mrô rơnoh djop pô, bruă sem lăng mrô rơnoh djop pô čơđai muai khom ngă djơ̆ tơlơi pơkă, khom yua boh tŭ yua kơ čơđai muai yơh mrô sa. Hăng čơđai djop ơ̆ng 7 thun pơngŏ, sit čih anăn sem lăng mrô rơnoh pơdjơ̆ nao kơ tơlơi hơi hơdip ƀing gơñu, khom hơmâo tơlơi tư̆ mơ̆ng pô čơđai hăng amĭ ama pô pơ ala kơ čơđai djơ̆ tơlơi phiăn. Tơlơi anai kiăng lăi djop anom bruă, sang bruă mơdrô ƀudah djop bơnah čih tơlơi pơhing mrô kiăng čih pioh djop tơlơi pơhing kơ čơđai ƀu dưi tŭ mă čih ba tă tăn ôh. Tơlơi pơkă amăng tơlơi phiăn ăt brơi ƀuh, tơlơi phiăn pơkă kiăng pơgang ba čơđai muai, pơpŭ tơlơi pơhing hơgŏm mơ̆ng gơñu laih anun khom hơmâo tơlơi ŭ ư mơ̆ng ƀing gơñu kah dưi čih pơmut amăng hră pơhing tơlơi pơhing mrô.

Hrŏm hăng anun, Tơlơi phiăn pơgang pioh tơlơi pơhing mrô hơjăn ăt pơkă ten hloh hăng djop tơlơi pơhing kơ drơi jăn djop mơnuih. Ơi Phạm Hoàng Lâm-mơnuih kơhnăk bruă ngă amăng jar kmar kơ bruă wai lăng tơlơi pơhing, brơi thâo:

“Tơlơi phiăn hơmâo pơkă, tơlơi pơhing čih anăn rim čô mơnuih tơdơi kơ lŏm hĭ anŏ thâo krăn amra ƀu dưi sem tơlơi pơhing pô anun dơ̆ng tah hăng yua kơ anun yơh hnơ̆ng pơkă mơ̆ng tơlơi phiăn anai ƀu hơmâo dơ̆ng tah. Tui hăng tơlơi phiăn, lŏm lui anŏ thâo krăn kiăng lăi pơblih hĭ, lŏm lui tơlơi pơhing kiăng čih tơlơi pơhing phrâo mơ̆ng anun ƀu thâo pơsit ƀudah dưi mut ĕp lăng ôh tơlơi pơhing kơ pô anun rơđah rơđong. Tơdơi kơ sem lăng tong ten hơdôm tơlơi pơkă mơ̆ng Tơlơi phiăn pơgang pioh mrô rơnoh anăn rim čô mơnuih thun 2025 hăng biă mă ñu Mơta tơlơi 14 pơdjơ̆ nao lŏm lui hĭ, lui anŏ thâo krăn pô, tui hăng tơlơi gơmơi ƀuh Tơlơi phiăn kah hăng anăp nao tơlơi pơkă ngă hơgŏm hĭ tơlơi pơhing, pơhrua nao ƀu kơnong lŏm anŏ thâo krăn”.

Hăng tơlơi pơhing ƀudah mrô rơnoh anăn čơđai-ƀing kiăng dưi pơgang tong ten-bruă pơhlom hơđong tơlơi pơhing dưi pơgang rơnuk rơnua hơđong jing sa tơlơi lăng yom, kiăng pơgăn anŏ ngă tơbiă tơlơi pơhing ƀudah arăng mă tơlơi pơhing anun tă tăn amăng atur mrô. Hơdôm tơlơi phrâo amăng tơlơi phiăn pơgang tơlơi pơhing rim čô mơnuih hlăk tŭ mă djop tơhnal pơkă mơ̆ng jar kmar kơ bruă pơgang tơlơi dưi pô hơjăn mơ̆ng rim čô mơnuih, amăng anun pioh tơlơi đing nao yom phara kơ čơđai muai.