8 kơčăo bruă tơlơi phiăn hơmâo pơčrong sai, pơgôp hiăp, hơmâo: Tơlơi phiăn juăt nua (čih pơhrua); Tơlơi phiăn juă gơnam sĭ mơdrô (čih pơhrua); Tơlơi phiăn Sang dŏ (čih pơhrua); Tơlơi phiăn pơđĭ kyar sang bruă mơdrô anet hăng man ƀrô; Tơlơi čih pơkra pơblih glăi, pơhrua sa, dua mơta tơlơi mơ̆ng Tơlơi phiăn sĭ mơdrô, Tơlơi phiăn pơhno sĭ mơdrô, Tơlơi phiăn wai lăng bruă sĭ mơdrô hăng tač rơngiao, Tơlơi phiăn pơgang ba boh tŭ yua kơ mơnuih blơi gơnam sĭ mơdrô či yua; Tơlơi phiăn blơi glăi, ba yua kông ngăn; Tơlơi phiăn čih pơhrua sa, dua mơta tơlơi mơ̆ng Tơlơi phiăn pơhlom rơnuk rơnua, hơdjă mă bruă; hăng tơlơi phiăn čih pơkra pơhrua hơdôm mơta tơlơi amăng tơlơi phiăn pơrơguăt drơi jăn, tuai čuă ngui, sang pơđok hră, ngă phim silma, kông ngăn gru grua, pôr pơhưč, hră pơhing phrâo.

Hăng tơlơi phiăn juă nua kông ngăn čih pơkra pơhrua glăi, khua mua pơ ala gah Gơnong bruă Tơlơi phiăn tơring čar Dak Lak lăi lĕ, kơčăo bruă phrâo kiah čih pơthâo bruă jŭ yap mơ̆ng djop ding jum, anom bruă hăng jơnum min mơnuih ƀôn sang gưl tơring čar, aka ƀu ngă rơđah ôh rĭm sang bruă.

“Mơta tơlơi 9 lăi nao tơlơi gơgrong ba kơnuk kơna pô wai lăng bruă juă nua kông ngăn kiăng lăi rơđah hloh, pơhrua tơlơi pơkă jao kơ Kơnuk kơna pô pơtrun tum teč boh yom phun anai kiăng pơblang rơđah bruă wai lăng mơ̆ng kơnuk kơna, laih dơ̆ng ngă rơđah tơring čar, anom bruă pơpă glăm ba, djru Jơnum min mơnuih ƀôn sang tơring čar amăng bruă ngă tui bruă ngă anai”.

Pơgôp hiăp kơčăo bruă tơlơi phiăn čih pơhrua sa, dua mơta tơlơi amăng Tơlơi phiăn anom sĭ mơdrô prong, ƀing khua mua pơ ala rơkâo pơkă tum teč hloh, tơlơi gơgrong ba pơhaih tong ten, lăi pơthâo rơđah anăn gơnam sĭ mơdrô, bruă ngă bơwih brơi amăng bruă sĭ mơdrô amăng tơlơi dưi mơ̆ng kơnuk kơna pô wai lăng, pơhlom brơi rơđah tơlơi dưi hăng anŏ gêh găl amăng bruă pơphun ngă tui. Ơi Hồ Văn Dũng, Kơ-iăng khua anom bruă mă jia sĭ mơdrô hăng tač rơngiao kual XIV, rơkâo đĭ tui anai:

“Tơlơi pơkă tui anun lĕ kơnong dŏ glăi ƀơi bruă Ding jum hơmâo tơlơi glăm ba pơhaih rơđah anăn gơnam sĭ mơdrô, bruă bơwih brơi gah tơlơi dưi hơjăn, aka ƀu lăi nao ôh bruă anom bruă kơnuk kơna hơmâo tơlơi gơgrong ba lăi pơthâo anăn gơnam sĭ mơdrô, bơwih brơi bruă mă tơlơi dưi hơjăn, hơdôm tơlơi pơkă anun hăng hơdôm sang bruă anun. Rơkâo pơhrua nao dơ̆ng tơlơi pơkă tum teč kiăng pơhlom rơđah tơlơi dưi hăng bruă gơgrong ba ngă gêh găl amăng bruă pơphun ngă tui”.

Hăng kơčăo bruă čih pơhrua glăi hơdôm mơta tơlơi amăng Tơlơi phiăn pơkă kơ tơlơi rơnuk rơnua, hơdjă amăng bruă mă jing tơlơi mơ̆ lu khua mua đing nao brơi pok prong khul ngă hrŏm pơhlom nua sit hơmâo tơlơi truh amăng dŏ mă bruă, duăm ruă yua mơ̆ng bruă mă khom lir hơbit bruă pơjing tơlơi phiăn ngă tui djơ̆ găl. Tui hăng anun, kiăng kơsem min tong ten hloh, pơkă rơđah prăk djru mơ̆ng ngăn drăp kơnuk kơna ƀudah Keh prăk pơhlom nua tơlơi truh amăng bruă mă, duăm ruă yua mă bruă hăng rơnoh prăk pơčruh blơi hră pơhlom nua mơ̆ng khul mă bruă apah ƀu hơmâo hră pơkôl apah mă bruă gah sang anŏ ƀun rin, giăm ƀun rin ƀudah ƀing anun rai mơ̆ng plơi pla mơnuih ƀôn sang djuai ƀiă, djru jơlan hơdră mơ̆ng kơnuk kơna dưi ngă tui rơđah rơđong pơhaih tong ten.

Hrŏm hăng anun, ƀing khua mua ăt rơkâo sem glăi kơnôl ngă tui, jŭ yap rơnoh prăk blơi hră pơhlom nua kiăng dưi ƀong prăk nua sit hơmâo tơlơi truh amăng mông dŏ mă bruă, duăm ruă yuâ mơ̆ng bruă mă anun hăng mơnuih mă bruă apah rai mơ̆ng anih dŏ kual II, kual III, kual IV, amăng anun hơmâo tơring čar Dak Lak. Bruă čih pơkra pơkă rơnoh prăk pơhlưh kiăo tui rơnoh gơnam đĭ nua ƀudah rơnoh prăk djru boh ƀiă hloh kiăng kơsem min glăi, đah mơ̆ng dưi pơgang ba tơlơi dưi tŭ yua kơ mơnuih mă bruă apah, pơ-ai buai hĭ yua mơ̆ng tơlơi truh mă bruă ngă rai ƀudah hơmâo tơlơi duăm ruă mơ̆ng bruă mă anun. Ơi Nguyễn Phú Lập, Kơ-iăng Khua sang bruă mơnuih tơpuôl tơring čar Dak lak lăi pơthâo:

“Lơ̆m ƀing ta hơmâo pơkă rơnoh prăk blan boh ƀiă ñu tui hluai kual lĕ, ƀing ta jŭ yap brơi hơdôm črăn amăng ha rơtuh, amăng rơnoh prăk djru baa nun. Sit hơmâo tơlơi truh lơ̆m dŏ mă bruă tui hluai hnơ̆ng ruă nuă ƀing ta amra hơmâo rơnoh djru ba dơ̆ anun. Sit mơ̆n, lơ̆m ngă tui tơlơi phiăn pơhlom nua bruă mơnuih mơnam amra tla prăk gêh găl ƀiă, kiăng bĕ hĭ lơ̆m rơnoh prăk ƀiă đôč, samơ̆ ngă hră pơar tơnap tap, sit hơmâo hĭ tơlơi truh lơ̆m dŏ mă bruă ƀudah duăm ruă yua mơ̆ng bruă mă apah anun ngă”.