Phrâo hrăm giong gưl ƀrô pơtô bruă mă samơ̆ aka ĕp hơmâo bruă mă djơ̆ găl ôh, amai H’Đoăi Ƀyă, dŏ ƀơi ƀuôn Êrang, phường Thành Nhất, tơring čar Dak lak hơmâo čih anăn nao hrăm ƀiă blan kơ hơdră tơlơi thâo hơtŭk riă tơnă hơbai hăng pơkra ming mơnong ƀong huă yua Phường gơñu pok anih hrăm. Amai H’Đoăi pơtong lĕ, anai jing tơlơi hrăm kiăng thâo pơhrua nao dơ̆ng, laih anun sa bruă mă či ngă pơ anăp tơdah aka ƀu ĕp hơmâo bruă mă djơ̆ tui tơlơi hơmâo hrăm laih.

“Hơdôm mông hrăm tui anai, brơi kơ ta tơlơi thâo tong ten hăng arăng pơtô ba djơ̆ rơ-ua hloh, tơdơi anai ta amra thâo hluh ten ƀiă kơ hơdôm mơta mơnong ƀong huă, hơmâo tơlơi thâo lu hloh kơ bruă hơtŭk riă tơnă hơbai asơi añăm, mơnong ƀong huă kiăng jơman hăng pơdă đĭ lăng hiam hloh. Anŏ kâo kiăng lĕ hrăm giong tal anai, amra dưi mut mă bruă amăng sang arăng sĭ mơdrô mơnong ƀong huă ƀudah amăng kông ty”.

Amai H’Đoăi Ƀyă lĕ sa amăng 60 čô mơnuih djuai ƀiă mut hrăm anih arăng pơtô Hơdră tơlơi thâo pơkra ming mơnong ƀong huă, hơtŭk riă tơnă hơbai djơ̆ rơ-ua yua Jơnum min mơnuih ƀôn sang phường Thành Nhất pô ngă hrŏm sang hră pơtô bruă mă gưl ƀrô Ƀuôn Ma Thuôt pơphun. Amăng dua blan hrăm, ƀing hrăm bruă, hmư̆ arăng pơtô pơčrâo brơi hơdră ruah mă khul añăm pơtam, hnă hnơi či pơkra ming mơnong ƀong huă, hơdră răk pioh kiăng huăi răm, huăi brŭ, dưi pơgang anŏ hơdjă rơgoh mơ̆ng ƀong huă laih anun pŭ asơi, pơdă đĭ kơ arăng huă ƀing kiăng lăng hiam rơguăt.

Tui hăng ơi Nguyễn Hữu Luật, Kơ-iăng khua Jơnum min mơnuih ƀôn sang phường Thành Nhất, tơring čar Dak Lak, anih hrăm anai dưi pok pơhai tui akŏ bruă anet mrô 3, Kơčăo bruă prong mrô 5 pơtrut anŏ pơđĭ kyar pơtô bruă mă hăng pwosir bruă mă kơ mơnuih kiăng hơmâo bruă mă amăng kual plơi pla djuai ƀiă hăng čư̆ siăng. Anai lĕ anih pơtô bruă mă blung a yua phường pok pơhai mơ̆ng rơnoh prăk djru thun 2026, tơdơi kơ ngă tui gong gai kơnuk kơna dua gưl ƀơi tơring čar. Bruă ruah mă bruă či hrăm ƀơi plơi pla, hơmâo să, phường sem lăng anŏ či kiăng mơ̆ng mơnuih ĕp bruă mă, hrăm bruă hơgĕt djơ̆ găl laih hrăm đah mơ̆ng dưi ngă tui mơtam. Hơdôm anih hrăm tŏ tui dơ̆ng, amra jŭ yap glăi, kiăng pơtong rơđah djơ̆ lăp hăng anŏ kiăng hloh, či pơtô hrăm hăng pơsir bruă mă.

“Phường Thành Nhất ăt amra pok dơ̆ng anih hrăm pơtô kơ bruă mă yua ia rơgơi mrô brơi djơ̆ găl hăng bruă hơmâo sit nik ră anai, djru kơ mơnuih ƀôn sang thâo hluh rơđah, pơtong glăi bruă mă djơ̆ lăp, kiăng mơ̆ng anun ƀing hrăm ruah mă sa bruă či hrăm tui anŏ či kiăng mă bruă tơdơi anai pơđĭ tui rơnoh pơhrui glăi hăng pơđĭ kyar tơlơi hơdip mơda”.

Pok pơhai ngă tui kơčăo bruă anet mrô 3 gah kơčăo bruă prong mrô 5 mơ̆ng Jơlan hơdră tơhnal dêh čar pơkă mrô 1719, djop plơi pla amăng tơring čar Dak lak ăt hyu ĕp lăng anŏ či kiăng, ngă hrŏm djop sang hră pơtô bruă mă, pok anih hrăm brơi djŏ hăng khul mơnuih mă bruă či kiăng. Bruă pơtô hrăm ƀu dŏ glăi ƀơi hơdră pơtô ba tơlơi thâo đôč ôh, pơtô brơi mă hơmâo rim hrơi amăng plơi pla, dưi ĕp bruă či ngă, pơsir mă bruă kơ pô hăng ĕp prăk kăk tơdơi kơ sa tal hrăm.

Ƀơi phường Tân An, amai H’Ju Êban, dŏ ƀơi ƀuôn Kmrơ̆ng Prŏng, hơmâo pok anih ngă pơhiam ƀô̆ mơta, prăp brơi kơ ƀing adơi amai đah kơmơi amăng plơi, tơdơi kơ ñu hrăm bruă pơtô pơhrôp, pik ia phong pơhiap ƀô̆ mơta yua phường pơphun. Ră anai, amai H’Ju hơmâo laih prăk pơhrui glăi hơđong.

“Kâo hơmâo mut hrăm amăng anih arăng pơtô bruă mă make up yua phường Tân An pok hăng pơtô. Mơ̆ng akŏ thun 2026, kâo hơmâo pok anih apah ngă pơhiam, pik ia phong kơ ƀing adơi amai đah kơmơi, hơmâo pơhrui glăi prăk hơđong kơ sang anŏ”.

Ngă tui jơlan hơdră tơhnal pơkă mơ̆ng dêh čar, djru pơhrŏ hĭ tơlơi ƀun rin, man pơdong plơi pla phrâo hăng pơđĭ kyar tơlơi hơdip mơda mơnuih mơnam kual djuai ƀiă, mơ̆ng thun 2016-2024, tơring čar Dak Lak hơmâo pơtô pơhrăm bruă mă brơi kơ 34.000 čô mơnuih mă bruă amăng kual plơi pla. Tơdơi kơ pơmut glăi tơring čar, thun 2025 hơmâo năng ai 5.400 čô mơnuih ăt dưi hrăm bruă. Truh abih thun 2025, mrô mơnuih hrăm giong bruă ƀiă blan ƀơi plơi pla hơmâo hrăm 70%, amăng anun 27% hơmâo hră pơsit hrăm truh kih.

Kiăng hơdôm anih pơtô bruă mă ƀiă blan anun dưi djru pơsir bruă mă, boh yom phun pơtô hrăm ăt khom jŭ yap, ĕp lăng anŏ či kiăng apah mơnuih mă bruă tơdơi kơ hrăm bruă. Hăng djop sang hră pơtô bruă mă, hrơi mông hrăm bruă ngă hơbôt tui, ƀiă hrơi hloh samơ̆ črăn hră ngă tui hlao lĕ đing nao pơtô brơi ƀing hrăm khom thâo ngă tui hơgĕt tơlơi hơmâo hrăm giong.

Ơi Trần Quốc Cường, Kơ-iăng khua sang hră gưl ƀrô pơtô bruă Ƀuôn Ma Thuột, tơring čar Dak Lak brơi thâo, tơdơi kơ hơđong khul mơnuih mă bruă, sang hră ăt ngă hrŏm djop să, phường hyu ĕp lăng anŏ či kiăng, pok anih pơtô bruă mă djơ̆ găl hăng tơlơi hơmâo sit nik:

“Đing nao anŏ mơnuih mơnam či kiăng, ră anai sang bruă mơdrô kiăng hơgĕt, mơnuih mơnam kiăng bruă či ngă hơgĕt, sang hră ngă hrŏm djop jơnum min mơnuih ƀôn sang să, phường pok anih pơtô hrăm, djru ƀing mut hrăm bruă ƀiă hrơi blan samơ̆ djop tơlơi thâo lơ̆m sa bruă či kiăng ngă kah hăng pơtô hrăm sit nik, juăt ñu sui mơ̆ng 3-6 blan. Ƀing gơmơi pơƀut glăi hrăm amăng anih ƀiă hrơi, pioh lu mông ngă tui mơtam amăng 2 blan đôč, pioh djru kơ mơnuih hrăm bruă lơ̆m tơbiă mơ̆ng sang hră dưi hyu ĕp bruă mă, hlong ngă bruă apah pơ sang bruă hlăk kiăng ră anai”.

Tui hăng akŏ bruă pơblih phrâo, pơđĭ tui boh tŭ yua amăng bruă pơtô hrăm bruă mă ƀơi plơi pla truh thun 2030, Dak Lak pơkă tơhnal ngă tui rĭm thun či pơtô hrăm tơlơi thâo amăng bruă mă kơ năng ai 10.000 čô mơnuih dŏ amăng plơi pla, mrô dưi hơmâo bruă mă tơdơi kơ hrăm giong bruă truh 85%; đing nao hlâo hloh pơsir bruă mă amăng kual plơi pla mơnuih djuai ƀiă, kual ataih, kual asuek.

Ơi Nguyễn Quang Thuân, Kơ-iăng khua Gơnong bruă čar tơring čar Dak Lak lăi lĕ, kiăng kơ tơhnal pơkă anai dưi ngă tui sit nik, črăn bruă pơtruh nao rai plah wah sang hră pơtô bruă mă hăng anih apah mơnuih mă bruă lĕ hơmâo pơtong rơđah anŏ kiăng djơ̆ hrŏm yom biă mă.

“Djop sang hră, anih pơtô hrăm bruă mă hơmâo hơdai gum hrŏm djop sang bruă mơdrô, lir hơbit pơđĭ tui tơlơi tŭ yua pơtô hrăm amăng tơring čar hăng gah rơngiao kơ tơring čar, ƀơi anŏ djop sang bruă mơdrô mơ̆ng tač rơngiao pioh pơđĭ boh tŭ yua mơ̆ng bruă pơtô hrăm bruă mă, ăt kah hăng pơphun kơ mơnuih hrăm hơmâo anih nao hrăm ngă tui sit nik amăng bruă mă; kiăng tơdơi anai, giong hrăm hơmâo ƀăng baih hlong thâo ngă bruă, djơ̆ hăng tơlơi hrăm giong, ƀu tơguan pơtô hrăm glăi ôh sit nao mă bruă ƀơi sang bruă mơdrô pơkra ming gơnam sĭ mơdrô”.

Sa anih pơtô hrăm bruă mă kơnong hơdôm blan đôč, samơ̆ rơnoh tŭ yua mơ̆ng ñu ƀu dŏ glăi dơ̆ hră pơsit, mă ƀăng tơlơi hrăm ôh. Yom hloh dơ̆ng, mơnuih hrăm bruă anun, hơmâo tơlơi gêh găl či rơkâo ĕp bruă djơ̆ hăng tơlơi hrăm, pơphun mă bruă či ngă, ĕp prăk kơ sang anŏ pô. Lơ̆m bruă ruah mă hrăm hăng lir hơbit ĕp bruă mă mơ̆ng dêh čar djru prăk apah pơtô bruă mă anun, ba glăi boh tŭ yua sit nik amăng tơlơi hơdip mơda mơnuih ƀôn sang, pok brơi tơlơi gêh găl hiam klă, biă mă ñu mơnuih ƀôn sang djuai ƀiă, gir run hrưn đĭ pô amăng tơlơi hơdip mơda.