Ƀơi kual plơi pla mơnuih djuai ƀiă dŏ, lơ̆n pơdong sang, lơ̆n ngă hmua hăng pơsir bruă mă ăt jing hơdôm tơlơi mơnuih ƀôn sang đing nao, mơnuih ruah khua rơkâo. Mơnuih ƀôn sang ruah khua Kpuih Kơk, plơi Ia Grăng, să Ia Grai, tơring čar Gia Lai, rơkâo kơnuk kơna kiăng hơmâo jơlan hơdră, hră pơtrun djơ̆ găl djru brơi sang anŏ mơnuih ƀôn sang tơnap tap.
“čang rơmang kơnuk kơna đing nao djru ba lơ̆n ngă hmua, lơ̆n pơdong sang kơ mơnuih ƀôn sang, djru ba sang anŏ tơnap tap, pơsir brơi bruă mă ƀơi sang anŏ, plơi pla pioh pơđĭ kyar bơwih ƀong huă amăng plơi pla”.
Hrŏm hăng tơlơi đing nao anun, pơsir tơlơi bơwih ƀong huă, mơnuih ruah khua Rmah Nhiên, plơi Ia Grăng 2, să Ia Grai, tơring čar Gia Lai, čang rơmang hơmâo dơ̆ng bruă mă pơsir brơi kơ mơnuih ƀôn sang amăng plơi pla, boh nik ñu hơdôm sang anŏ tơnap tap. Kiăng ƀing hlăk ai huăi nao mă bruă apah pơ ataih.
“Bruă mă ƀơi plơi pla aka ƀu hơmâo ôh, lu hlăk ai ƀơi Gia Lai nao mă bruă pơ ataih lu biă mă, amăng plơi pla lĕ ƀu hơmâo bruă mă ôh. Čang rơmang Ping gah, kơnuk kơna đing nao hloh kơ tơlơi anai, pioh djru mơnuih ƀôn sang pơđĭ kyar bơwih ƀong huă kơñ pơgi”.

Mơnuih ruah khua ndong Brừm, djuai ania K’ho pơ să Dam Rông 3, tơring čar Lâm Đồng, čang rơmang ƀing pơ ala mơnuih ƀôn sang dêh čar, đing nao kơ bruă pơđĭ kyar amăng plơi pla mơnuih ƀôn sang djuai ƀiă, boh ñik ñu jơlan glông nao rai hăng jơlan hơdră djru ba tơlơi bơwih ƀong huă.
“Čang rơmang khua mua pơ ala mơnuih ƀôn sang dêh čar đing nao tuh pơ alin bruă čuk jơlan nao rai, djru ba bruă ia jrao, pơtô hrăm hăng pơsir tơlơi bơwih ƀong huă kơ mơnuih ƀôn sang; pơpha rơnoh prăk djơ̆ găl pioh ngă plai ƀiă anŏ pleh ploh hnơ̆ng pơđĭ kyar plah wah hơdômg kual, djru mơnuih ƀôn sang tañ pơklaih mơ̆ng ƀun rin hơđong kơjăp”.
Hơdôm tơlơi rơkâo đĭ mơ̆ng mơnuih ƀôn sang kiăng ngă pơgiong jơlan hơdră, hră pơtrun gah lơ̆n mơnai, pơgang ba anŏ tŭ yua kơ mơnuih ƀôn sang lăp djơ̆, pơsir hĭ anŏ gun lơ̆m ngă tui. Mơnuih ruah khua  H’ Nhip Ƀuôn Krông, djuai ania Êđê dŏ ƀơi Ƀuôn Čuôr, să Ea Mdroh, tơring čar Dak Lak, čang rơmang pơsir tañ bruă ngă hră pơar yua lơ̆n kơ mơnuih ƀôn sang.
“Amĭ ama pơpha brơi lơ̆n 4 ar giăm sang să pioh pla pơjing, samơ̆ truh ră anai, ngă hră pơar aka ƀu giong ôh, hră yua lơ̆n. Kâo čang rơmang dưi pơsir ngă brơi hră yua lơ̆n hơđong, kâo dưi hơmâo anăn hră yua lơ̆n, đah mơ̆ng hơđong pran jua mă bruă”.

Ơi Phạm Thanh Liêm, Khua Jơnum min mơnuih ƀôn sang să gong gai phara Trường Sa, tơring čar Khánh Hòa, rơkâo ăt ngă brơi giong jơlan hơdră pơđĭ kyar bơwih ƀong huă amăng kual ia rơsĭ hăng tơlơi phiăn pơkă kơ bruă git gai wai lăng gong gai phara amăng bul pơtâo plao ia rơsĭ.
“Čang rơmang ƀing pơ ala mơnuih ƀôn sang ăt khom ngă pơgiong jơlan hơdră bơwih ƀong huă amăng kual ia rơsĭ, djru mơnuih mă akan hơdang, tuh pơ alin kơ bruă hyu mă akan hơdang. Kơnong hơjăn kual ia rơsĭ Trường Sa, čang rơmang biă mă ƀing pơ ala mơnuih ƀôn sang dêh čar ăt đing nao, ngă pơgiong jơlan hơdră, hră pơtrun phara, kiăng pơhưč man pơdong ring bruă dưi ba yau dua mơta, bơwih brơi pơđĭ kyar bơwih ƀong huă-mơnuih mơnam hăng ngă kơjăp bruă pơgang lơ̆n ia”.
Mơnuih ƀôn sang ruah khua kual Dap Kơdư-Dơnung tong krah čang rơmang, boh tŭ yua jơnum lok anai ƀu kơnong jŭ yap ƀơi lu mơta hră pơar tơlơi phiăn dưi čih pơkra đôč ôh, dŏ pơđĭ tui anŏ ngă pơhruaih brơi mơnuih mă bruă, pơsir tơlơi bơwih ƀong huă hơđong hăng pơblih tui tơlơi hơdip mơda kơ mơnuih ƀôn sang.