Hrơi blan ngă tui mơ̆ng thun 2026-2027, amăng rơnoh prăk rơbêh 215 klai prăk phrâo pơhrua nao, hơmâo 184 klai prăk mơ̆ng Gơnong dlông, rơbêh 31 klai prăk ngăn drăp tơring čar.

Jơnum min mơnuih ƀôn sang tơring čar Dak Lak brơi pơhrua nao man pơdong sang hră đôm lăm dua gưl ƀơi să Ia Lôp 68 klai prăk; sang hră đôm lăm dua gưl ƀơi să Ia Rvê 59 klai prăk; Sang hră đôm lăm dua gưl ƀơi să Ƀuôn Đôn 89 klai prăk. Rơnoh prăk anai ba yua tuh pơ alin pơhrua nao djop ring bruă man pơdong kah hăng anih khua sang hră dŏ mă bruă, sang pơđok hră, sang ƀing nai pơtô dŏ hăng mă bruă laih anun lu ring bruă pơkŏn pioh bơwih brơi kơ bruă pơtô hăng hrăm klă hloh. Mơ̆ng thun 2025-2027, tơring čar Dak Lak pok pơhai man pơdong 3 boh sang hră đôm lăm dua gưl ƀơi kual giăm guai dêh čar, kah hăng Ia Lôp, Ia Rvê hăng Ƀuôn Đôn, abih tih rơnoh prăk tuh pơ alin črăn I rơbêh 390 klai prăk. Djop sang hră khom ngă giong hăng ba yua amăng thun hrăm phrâo 2026-2027. Thun hrăm phrâo 2026-2027, djop sang hră đôm lăm kơnuk kơna čem rông ba čơđai sang hră mơnuih djuai ƀiă dua gưl ƀơi guai dêh čar tơring čar Dak Lak amra čơkă truh 3.100 čô čơđai sang hră mơ̆ng anih 1 truh anih 9.