Sa phrâo man pơkra lĕ ring bruă blung a amăng akŏ bruă mrô 214 kơ ruh pơkra glăi sang dŏ jang jai, sang tơ̆i rơ̆i yua Khul apăn bruă Ping gah hăng Jơnum min mơnuih ƀôn sang tơring čar Dak Lak jao kông ang tơring čar git gai. Sang man pơdong jao sang anŏ ơi Y Thăn Ksơr, dŏ amăng ƀuôn Kmiên, să Ea Drông. Amai H’En Niê, ană đah kơmơi ơi Y Thăn brơi thâo.

“Ama kâo ruă kă sui 8 thun anai laih, amĭ kâo ăt kơnong dŏ pơ sang kiăng wai lăng. Dua rơkơi bơnai gơmơi ngă hmua, gơnang nao mă bruă arăng apah kiăng kơ hơmâo prăk yua amăng sang anŏ. Sang gơmơi tơ̆i phŏ laih, anai hơmâo arăng djru man pơdong phrâo, mah anet samơ̆ yôm biă mă, ăt hơmâo pơging pơ-iă hơjan yua anun ƀing gơmơi hok mơ-ak biă mă”.

Akŏ bruă mrô 214 mơ̆ tơring čar jao kông ang tơring čar ngă tui, amra man pơdong 4.285 boh sang hăng abih tih rơbêh 342 klai prăk; rơnoh prăk djru rĭm boh sang lĕ 80 klăk prăk. 3 akŏ bruă pơkŏn amra man 1.120 boh sang amăng thun 2025.