Ơi Nguyễn Văn Bang, Khua kông ti TNHH sa ding kơna Nhất Bang, plơi prong Pleiku brơi thâo, anŏ kơđŏm glăi mơng tơlơi pơtrun lĕ hơmâo jơlan gah pơplih bruă bơwih ƀong sĭ mơdrô tui jơlan rơđah rơđông, hơđong hăng jê̆ giăm hăng anom bơwih ƀong sĭ mơdrô. Sit biă ñu, bruă pơhrŏ mrô pel ĕp anom bơwih ƀong sĭ mơdrô trun ƀu rơgao 1 wŏt ha thun, pơtrut kơtang mă yua boh thâo phrâo, hơdư̆ pel ĕp ƀơi anăp hăng pơsir hĭ khut khăt hơdôm bruă ngă soh lĕ hơdôm tơlơi hơmâo anom bơwih ƀong sĭ mơdrô đing nao biă mă.

Bruă pơplih mơng hlâo pel ĕp hơdai nao tơdơi pel ĕp, lui lu tơlơi pơgăn amăng sĭ mơdrô amra pok rai tơlơi gal pơđĭ kyar sit nik ƀiă dong brơi anom bơwih ƀong sĭ mơdrô. Sit biă ñu lĕ bruă djru čan prăk mă kmlai ƀiă brơi hơdôm akŏ bruă mơtah, lui mă, hrŏ ƀiă jia brơi anom bơwih ƀong sĭ mơdrô pơphun bơwih ƀong pơčeh phrâo, hăng pơđut pơkă mă jia, prăk duh pơkŏn dong mơng thun 2026. Ơi Nguyễn Văn Bang lăng yôm tơlơi pơkă pơsir ngă hră pơ-ar tui jơlan gah đing nao hơdră pơsir phak prăk plih hĭ pơsir tui kơđi hình sự, ƀu ƀom kiơng, wai lăng kông ngăn mơng anom bơwih ƀong sĭ mơdrô mơ̆ tơlơi pơtrun mrô 198 hơmâo lăi rơđah:

“Hăng hơdră bruă ră anai, kâo đăo gơnang nao prăk čan brơi hơdôm anom bơwih ƀong sĭ mơdrô gap ƀrô hăng anet, sit biă ñu lĕ brơi hlăk ai pơphun bơwih ƀong, amra pơplih tong ten. Kâo čang rơmang bruă bơwih ƀong mơnuih ƀôn sang ngă pô amra pơđĭ kyar kơtang yua hơmâo Ping gah, Kơnuk kơna đing nao, hăng hơdôm khul grup brơi čan prăk, sang bruă prăk amra ngă gêh gal kiăng anom bơwih ƀong sĭ mơdrô dưi čan prăk tañ hăng gêh gal hloh”.

Tơlơi pơtrun mrô 198 pơdah tong ten tơlơi đing nao yôm phăn mơng Ping gah, Kơnuk kơna hăng hơdôm anih bơwih ƀong mơnuih ƀôn sang ngă pô, lăng anai lĕ tơlơi pơtrut pơđĭ kyar yôm phăn mơng lŏn ia ta amăng rơnuk phrâo. Ơi Phan Thanh Thiên, Khua khul bơwih ƀong sĭ mơdrô hlăk ai tơring čar Gia Lai pơsit tong: Anai lĕ sa tơlơi gal prong kiăng hơdôm anom bơwih ƀong sĭ mơdrô hajăn thâo. Tơlơi pơtrun mrô 198 glăk hơmâo hơdôm anom bơwih ƀong sĭ mơdrô Gia Lai tŭ mă hăng lu tơlơi čang rơmang. Ƀing gơñu lăng anai lĕ tơlơi ƀuăn kơđi čar prong kơtang, sa tơlơi yak nao pơđĭ kyar sui pơ anăp, hăng prong hloh lĕ tơlơi gal kiăng pok phư hơdôm tơlơi gun ƀuh amăng hrơi blan rơgao. Samơ̆, ơi Phan Thanh Thiên, Khua khul bơwih ƀong sĭ mơdrô hlăk ai tơring čar Gia Lai brơi thâo, kiăng hơmâo tơlơi pơsit mơng gong gai djop gưl amăng pơphun ngă tui, kiăng ba tơlơi pơtrun jing tơlơi pơtrut pơđĭ kyar hơđong kjăp mơng bruă bơwih ƀong hajăn.

“Kâo rơkâo khua mua tơring čar đing nao lu ƀiă dong hơdôm anom bơwih ƀong sĭ mơdrô mơnuih ƀôn sang ngă pô, kah hăng ƀing bơwih ƀong sĭ mơdrô hlăk ai Gia Lai. Blung hlâo, hơmâo hơdră djru brơi kiăng tong ten, rơđah rơđông, djru brơi anom bơwih ƀong sĭ mơdrô tañ tŭ mă hơdôm akŏ bruă, ngă hră pơ-ar tañ. Laih dong, kiăng ngă gêh gal kiăng anom bơwih ƀong sĭ mơdrô dưi čan prăk mă kmlai ƀiă, djru brơi ƀing hlăk ai pơphun bơwih ƀong hăng pơđĭ kyar bơwih ƀong sĭ mơdrô. Hrŏm hăng anun lĕ bruă pơjing hơdôm jơlan hơdră pơsur sĭ mơdrô, pơphun hơdôm tal pơtop hrăm kơ bruă wai lăng, pơplih mrô, kiăng hrưn đĭ pran bơkơtưn brơi anom bơwih ƀong sĭ mơdrô ƀon lan”.

Tơlơi pơtrun mrô 198 phrâo hơmâo Khua pơ ala mơnuih ƀôn sang dêh čar tŭ yap mă yua ƀu djơ̆ kơnong pok rai sa rơwang phrâo kơ bruă bơwih ƀong sĭ mơdrô mơnuih ƀôn sang ngă pô ƀơi Việt Nam đôč ôh mơ̆ ăt ba glăi tơlơi đăo gơnang hăng pran hrưn đĭ mơng anom bơwih ƀong sĭ mơdrô, sit biă ñu lĕ ƀơi hơdôm boh ƀon lan hơmâo tơlơi dưi kar hăng Gia Lai. Lơm hơdôm hơdră bruă ngă pơtrut ngă tui hơdôm bruă mă khut khăt hăng ha amăng plĕ mơng gong gai djop gưl, anih bơwih ƀong sĭ mơdrô amra jing rơđah rơđông, tŭ yua ƀiă dong, ngă atur kiăng anom bơwih ƀong hajăn jing anih bơwih ƀong akŏ phun amăng pơđĭ kyar lŏn ia. Hăng pran jua pơplih phrâo, hơdôm anom bơwih ƀong sĭ mơdrô Gia Lai glăk gum tơngan hrŏm, ha pran sa jua kiăng ngă tui, pơgôp prong amăng pơđĭ kyar hơđong kjăp amăng ƀon lan hăng đơ đam dêh čar. /.