Gơnong bruă ia jrao tơring čar Dak Lak pok pơhai brơi djop sang ia jrao să hăng anih pơjrao ƀơi 102 boh să, phường ngă tui akŏ bruă pơkă lăng rim rơwư̆ rơwang, kiăng thâo krăn tơlơi ruă kơ mơnuih ƀôn sang ƀu apah prăk. Amăng anun, lông ngă lăng hlâo ƀơi 4 boh să, phường lĕ Tân An, Tuy Hòa, hơdôm să Đồng Xuân hăng Krông Bông; 98 boh să, phường dŏ glăi amra pơphun mơ̆ng lơ 1/7 pơ anăp.

Truh ră anai, giăm 500 čô mơnuih ƀôn sang dưi pơkă lăng djop tui tơlơi pơtô ba mơ̆ng Ding jum ia jrao laih anun bruă pơkă lăng hlâo kiăng thâo ƀuh, ăt hlăk ngă tui hăng hơdôm rơbâo čô mơnuih. Tơring čar Dak Lak tơdơi kơ pơmut glăi hơmâo 3,34 klăk čô mơnuih ƀôn sang. Mơ̆ng thun 2026-2030, Dak Lak him lăng mă yua 1000 klai prăk sa thun pioh pơkă lăng tơlơi suaih pral kơ abih bang mơnuih ƀôn sang ƀu mă prăk ôh. Kơnong amăng thun 2026, tơring čar mă yua 400 klai prăk brơi kơ 102 boh anih pơjrao ƀơi să, phường hăng rơnoh prăk pơplai 350 rơbâo prăk sa čô, sa wơ̆t pơkă lăng. Rơgao dua wơ̆t hrơi tơjuh lông ngă lăng, yua hơmâo prăp lui tong ten gơnam yua, mơnuih mă bruă, pơtrut bruă pơtô pơblang hơmâo lu mơnuih tŭ ư gum hrŏm, bruă ngă tui Hră pơtrun anai hnang blung hơmâo ba glăi boh tŭ yua klă, ngă gêh găl brơi pok pơhai sa amăng plĕ amăng đơ đam tơring čar pơ anăp anai.