Tơdơi kơ pơmut hrŏm, tơring čar Dak Lak prong rơbêh 18.096 km karê, mrô mơnuih rơbêh 3,3 klăk čô, 102 anih mă bruă gưl să; rŏng lŏn ha guai hăng dêh čar Kur hăng hơmâo kual ia rơsĭ. Amăng anih pơđĭ kyar phrâo hơmâo dăp kơdư, ia rơsĭ hăng guai lŏn ia, tơring čar hơmâo dong tơlơi gal kơ bruă ngă hmua, pơkra pơjing gơnam, logistics, bơwih ƀong huă kual ia rơsĭ hăng bơwih ƀong ƀơi bah amăng jang. Samơ̆, anai ăt lĕ kual kiăng răng kơđiăng hloh amăng bruă pơgang rơnuk rơnua, hơđong.

Amăng mông mă bruă, ƀing khua mua đing nao pơčrông sai kơ bruă tŭ mă klă tơlơi dưi phrâo amăng tơring čar samơ̆ kiăng pơlir kjăp hăng tơlơi rơkâo prong amăng bruă wai pơgang rơnuk rơnua-hơđong, sit biă ñu amăng hơdôm kual phun, kual giăm guai hăng hơdôm ring bruă, jơlan glông yôm phun. Thượng tướng Trần Việt Khoa, Ding kơna Ping gah dêh čar, Khua Sang hră pơtô ling tơhan, rơkâo Dak Lak kiăng tŏ tui tơlơi dưi gah ngă hmua hăng kual ia rơsĭ kiăng kơ đĭ tui bruă pơđĭ kyar, amăng anun đing nao pơkra gơnam klă hloh hăng ngăn rơnoh mă yua: “Dak Lak ră anai hơmâo kual ia rơsĭ dơlăm samơ̆ ƀu hơmâo tơdrun kompăn pơprong, anun ngă tơnap tap amăng bruă tơdrun kompăn hăng logistics; dua dong lĕ kual lŏn drơ̆t baza hiam hloh, lu djuai phun pla yôm amăng ngă hmua samơ̆ aka ƀu dưi pơkra brơi klă hloh. Mơng anun brơi ƀing ta ƀuh kơ tơlơi sit nik, ră anai ngă hiưm pă Dak Lak pơđĭ kyar ngă hmua, kiăng pơđĭ kyar pơkra gơnam klă kah dưi pơđĭ kyar bơwih ƀong ngă đang hmua.”

Sa boh tơhnal hơmâo lăi pơtong amăng mông mă bruă lĕ pơđĭ kyar bơwih ƀong huă hrŏm hăng pơjing kual wai pơgang laih dong hơkrŭ kjăp “wai pơgang amăng abih bang”. Tui anun, hrưn đĭ tơlơi hơdip, pơhrŏ trun ƀun rin, pơhlôm tơlơi hơdip, tơlơi bơwih ƀong huă hơđong kjăp brơi mơnuih ƀôn sang, sit biă ñu ƀơi kual giăm guai hăng kual mơnuih djuai ania ƀiă, ƀu djơ̆ kơnong lĕ bruă jao pơđĭ kyar đôč ôh mơ̆ ăt pơgôp pơgang hơđong mơng ƀon lan. Hăng hơdôm boh ƀon lan phun, bruă tuh pơ alin man pơkra jơlan glông, logisics, pơđĭ kyar bơwih ƀong ƀơi bah amăng jang, tơkuh nao rai hăng dêh čar Kur hăng anăp nao kual ia rơsĭ ă tlĕ tơlơi rơkâo kiăng pơhlôm rơnuk rơnua-hơđong. Hrŏm hăng anun lĕ hrưn đĭ amăng bruă đăo lăng hlâo, pơgang amăng mơnuih mơnam, pơhlôm pơgang hơjan kơthel, tơlơi truh sat hăng hơdôm tơlơi ngă sat răm phrâo ƀuh. Ơi Lương Nguyễn Minh Triết, Ding kơna Ping gah, Khua git gai Ping gah tơring čar Dak Lak pơsit tong: “Ƀing gơmơi pơsit tong pơlir bruă dưm dăp bơwih ƀong huă mơnuih mơnam hăng bruă wai pơgang rơnuk rơnua mơng blung a, sit biă ñu hăng hơdôm akŏ bruă pơprong, hơdôm ară jơlan phun, hơdôm boh ƀon lan akŏ phun hăng lêng kơ hruă kjăp tơlơi pơmĭn ngă bruă anun lĕ pơđĭ kyar kiăng hơđong hăng hơđong kiăng pơđĭ kyar. Dua dong lĕ ƀing gơmơi đing nao pơjing pran wai pơgang amăng abih bang mơnuih pơlir hăng bruă wai pơgang mơng mơnuih ƀôn sang laih dong pơjing pran đăo gơnang, sit biă ñu đing nao kual giăm guai, kual mơnuih djuai ania ƀiă hăng hơdôm kual plơi pla ƀon lan wai pơgang phun.”

Mơng kual Dap kơdư truh pơ ia rơsĭ, mơng plơi pla ataih ayaih truh pơ kual giăm guai, Dak Lak lêng ba tơbiă hơnong pơkă pơđĭ kyar hơđong kjăp pơlir hăng bruă pơhlôm brơi kual Dap kơdư hơđong mơ-ak./.