Thun anai, 62 čô čơđai djuai ƀiă tơring čar Dak Lăk hrăm rơgơi, glăk hrăm ƀơi hơdôm boh sang hră Cao đẳng, Đại học amăng dêh čar ta hơmâo pơpŭ bơni. Pơhiăp ƀơi mông ngă lơphet, ơi Y Biêr Niê, Kơ-iăng khua Ping gah tơring čar Dak Lăk bơni hơ-ơč hăng kơdrưh yua biă mă kơ tơlơi hrăm hră mơ̆ng ƀing čơđai. Laih dong kiăng hlăk ai djŏp djuai ania ƀơi tơring čar gir hloh dong hrăm rơgơi hloh dong, hơmâo tơlơi pơmin hiam, đăo kơnang kơ tơlơi git gai mơ̆ng Ping gah, tơlơi phiăn Kơnuk kơna, pơtrut tui gru grua gum pơgôp abih bang djuai ania, gir gum djru kơ lŏn ia ta pơdrong sah klă hiam. Laih dong, djŏp gưl ping gah, gong gai, Jơnum min djŏp djuai ania mơnuih mơnam hăng hơdôm khul grup kơđi čar - mơnuih mơnam ngă bruă tơpă sit, tŭ yua djŏp tơlơi pơtrun mơ̆ng Ping gah, Kơnuk kơna hăng kual mơnuih ƀôn sang djuai ƀiă hăng čư̆ siăng, biă ñu hơdră tuh pơ alin pơđĭ kyar pơtô hăng pơjuăt, pơđĭ tui anŏ klă mơnuih mă bruă ƀơi tơring čar.