Tui hăng akŏ bruă thun 2023, tơring čar Dak Lăk amra brơi rơbêh 5.660 klai prăk pioh ngă bruă kơnuk kơna. Yap truh rơnuč blan 10, tơring čar Dak Lăk hơmâo brơi rơbêh 2.600 klai prăk, jing rơbêh 48% akŏ bruă, đĭ 17% pơhmu hăng tơđar hlâo. Amăng anun, prăk mơ̆ng kơnuk kơna brơi hơmâo 42,5%, prăk mơ̆ng tơring čar hơmâo 56,8% akŏ bruă.

Ƀơi mông jơnum, khua mua jơnum min mơnuih ƀôn sang tơring čar Dak Lăk git gai hơdôm gơnong bruă, Jơnum min mơnuih ƀôn sang hơdôm boh tơring glông, plơi prong pơtrut tui bruă pel ĕp, ƀuh hăng pơsir hĭ hơdôm tơlơi tơnap, tơlơi gun kơ ring bruă. Kiăng dưi hơmâo rơbêh 5.660 klai prăk tuh pơ alin amăng thun anai, ơi Đinh Xuân Hà, Khua gơnong bruă man pơphô hăng tuh pơ alin tơring čar Dak Lăk brơi thâo, ră anai hơdôm gơnong bruă, pô tuh pơ alin mơ̆ng tơring čar glăk gir ngă bruă kiăng tañ hơmâo prăk tuh pơ alin.