VOV4.Jarai-Ƀu buă sa blan dơ̆ng tah, čơđai sang hră djop gưl ƀơi Dak Lak amra mut thun hrăm phrâo 2022-2023 yơh. Kiăng pơhlôm djop bruă mă pơtô hăng hrăm hră, bruă prăp rơmet lui gơnam yua mă bruă ƀơi tơring čar hơmâo pơtrut kơtang, dăp hơdră, pơhlôm hlâo kiăng pơtô hrăm hruaih huăi tơ̆i đưn, gêh găl djop mơta. Tui hăng Gơnong bruă Pơtô hăng Pơjuăt tơring čar Dak Lak, thun hrăm 2022-2023, đơ đam tơring čar hơmâo 478 rơbâo 180 čô čơđai sang hră hrăm ƀơi 1.017 boh sang hră, mơ̆ng sang hră gưl muai truh pơ gưl klâo.

Kiăng pơhlôm hơđong gơnam yua hrăm hră thun phrâo, Jơnum min mơnuih ƀôn sang tơring čar hơmâo brơi yua 477 klai prăk tuh pơ alin blơi gơnam yua phrâo, ming pơkra glăi sang hră bơwih brơi bruă pơtô hrăm. Amăng anun, giăm 389 klai prăk mă yua man pơdong 350 boh anih hrăm phrâo, ming pơkra glăi 170 boh anih hrăm sô, man pơkra war pơga sang hră, tơdron čơđai sang hră ngui ngor, amăng jang sang hră; năng ai 88 klai prăk lĕ mă yua blơi kơƀang grê, hnăl jŭ čih pơtô hăng lu gơnam yua pơtô hrăm pơkŏn.

Nay Jek: Pơblang