VOV4.Jarai - Ƀrô ngă lơphet 75 thun Hrơi pioh kơ tơhan rơka (27/7), tơring čar Dak Lăk mă yua 13 klai blơi gơnam kơ sang anŏ hơmâo kơnuk kơna djru, sang anŏ hơkrŭ lŏn ia đưm. Mrô prăk rơbêh 13 klai prăk anai amra hơmâo brơi kơ giăm 42.500 čô mơnuih djru hơkrŭ lŏn ia ƀơi tơring čar. Amăng anun, gơnam mơng Khua mir sir hơmâo rơbêh 4 klai 200 klăk prăk, prăk dŏ glăi lĕ gơnam mơng tơring čar hăng plơi pla. Gơnam brơi hơmâo kah jing 2 hơnong pơkă: 600.000 prăk hăng 300.000 prăk.

Ƀing khua nao čuă jơmư sang anŏ hơmâo kơnuk kơna djru ƀơi Čư̆ M’gar

Rơđah biă ñu, gơnam hơmâo nua 600.000 prăk brơi kơ ƀing amĭ Việt Nam sông kơtang; sang anŏ tơhan djai pơsăn drơi kơnuk kơna ta čem rông rim blan; tơhan rơka hơmâo mrô pơkă mơng 81% truh kơ kơtang hloh. Mrô prăk 300.000 prăk brơi kơ tơhan rơka, tơhan ruă akă ƀu anăm mă bruă hăng mrô pơkă 80% trun gah yŭ; tơhan rơka glăk ƀong prăk ƀu anăm mă bruă; mơnuih djru blah ngă djơ̆ jrao măt, hăng mrô pơkă tơlơi ruă 80% trun gah yŭ; pô pơ ala brơi sang anŏ tơhan djai pơsăn drơi, mơnuih ngă yang tŭi ñang kơ tơhan djai pơsăn drơi.

Siu H’Mai: Pơblang