VOV4.Jarai-Ƀơi anăp kơ tơlơi arăng phă glai pơrai rưng kơtang, lơ̆m nun lu tơlơi phiăn pơkă kơ bruă wai pơgang glai kyâo ƀu gêh găl đơi dơ̆ng tah, tơring čar Dak lak phrâo rơkâo čih pơkra glăi tơlơi phiăn,  brơi pơkra glăi kiăng gêh găl hăng pơđĭ tui bruă pơgang glai klô, pơđĭ kyar glai klô amăng tơring čar. Hơdôm tơlơi rơkâo dưi hơmâo Jơnum min mơnuih ƀôn sang tơring čar Dak Lak  lăi pơthâo phrâo anai kơplah wah khua mua tơring čar hăng khua mua Ding jum Bruă hmua hăng Pơđĭ kyar plơi pla. Tui hăng jơnum min mơnuih ƀôn sang tơring čar Dak Lak, prăk tuh pơ alin kơ bruă pơgang glai klô tui hră pơtrun mrô 38 thun 2016 mơ̆ng Khua dêh čar rơnoh prăk djru 300 rơbâo prăk sa ha sa thun ƀu djơ̆ dơ̆ng tah, ƀu djop kơ bruă apah pơgang glai rưng.

Dak Lak rơkâo Ding jum bruă hmua hăng Pơđĭ kyar plơi pla lăi pơthâo kơnuk kơna pơđĭ tui rơnoh prăk boh ƀiă 1 klăk 300 rơbâo sa ha sa thun. Dak Lak ăt pơtong rơđah, ƀing tơhan pơgang glai klô ră anai dŏ kơƀah anun pơgang glai klô tơnap tap laih anun lu jơlan hơdră tơlơi phiăn pơtrun lĕ ƀu găl dơ̆ng tah. Dak Lak rơkâo Kơnuk kơna hơmâo hơdră phara djru kơ tơhan pơgang glai klô yua kơƀah mơnuih mă bruă laih anun pơkă tơlơi dưi bruă mă kơ tơhan pơgang glai klô, pô glai klô kiăng pơgang glai kyâo tŭ yua hloh.

Nay Jek: Pơblan