VOV4.Jarai-Amăng dua hrơi lơ 15 hăng lơ 16/1, ƀơi plơi prong Ƀuôn Ma Thuôt, tơring čar Dak Lak ngă hrom kông ty PNJ than ngan ƀơi kual Dap Kơdư-Dơnung kual Tong krah hăng Khul ngă bruă sĭ mơdrô pô hlăk ai pơphun pok siêu thị mini Tết 0 prăk kiăng djru mơnong ƀong huă kơ mơnuih ƀôn sang tơnap tap bơbeč yua kơ klin Covid 19 ƀrô djơ̆ hrơi tết Nhâm Dần pơ anăp.

Ƀơi siêu thị mini anai hơmâo rơbêh 40 mơta gơnam sĭ mơdrô kah hăng sik, braih, boh mơnŭ, ia rơmă, ia mơsin, tơpung mih dưm añăm, ƀôt ngot, ƀañ, kĕo, ia mih hăng lu mơta gơnam pơkŏn. Gơnam sĭ mơdrô djru anai hơmâo ƀlir rơnoh sĭ mơdrô, mơnuih ƀôn sang hơmâo wĕ djru nao ĕp lăng gơnam hơgĕt kiăng djop hăng rơnoh prăk čih ƀơi wĕ kiăng gơnam hơgĕt ta tŭ mă ƀơi anih prưng pơdă. Hră djru anai, dŏ hơmâo anăn jak iâu jơnum mơak thun phrâo, pĕ bơnga tơlơi tơphă, kiăng tŭ mă tơlơi djru pơpŭ mơak thun phrâo lìxì pơkŏn dơ̆ng.

Ƀing tơdăm dra mut phung gah anom bruă khua hlăk ai tơring čar hăng hơdôm anom bruă djru dŏ pơphun anung 200 tơlô̆ ƀañ tek ƀañ čưng pioh brơi kơ mơnuih ƀun rin, mơnuih ƀu hơmâo sang dŏ amăng plơi prong Ƀuôn Ma Thuôt.

Nay Jek: Pơblang