Tui hăng Gơnong bruă Man pơdong tơring čar Dak Lak, anom bruă git gai kơčăo bruă man pơdong 100 boh sang brơi kơ ană plơi pla dŏ bĕ amăng mông hŭi rơhyưt ia ling dăo, hơmâo pơphun man pơdong mơ̆ng kơnôl 27/6, ƀơi 27 boh plơi pla amăng djop să, phường anih juăt hơmâo tơlơi truh ia ling dăo, hăng rơnoh prăk tuh pơ alin 171 klai prăk. Rim sa boh sang dưi man pơdong ƀơi đơ đam 220 met karê, sang ngă dua tal anih dŏ rơhaih yap abih bang 440 met karê, sang pơdong hăng ƀêtông, pơsơi kơjăp hăng atur sang lĕ rơgao hnơ̆ng jơlah ia ling dăo.

Lơ̆m mă yua sang anai, rim boh sang dưi djop mơnuih ƀôn sang đuăi mơ̆ng anih ia lip, nao dŏ kơđap jăng jai, sa boh sang djop 200 čô dŏ hrŏm amăng mông ječ ameč. Truh ră anai, 98 boh sang ngă giong laih, tuh ƀêtông, păng bơbung thau; hơdôm črăn dŏ glăi kah hăng man pơnăng, man atur, dưm truă hrĕ apui, đing ia, sang juă glai ăt hlăk ngă giong tañ, amra jao glăi sem lăng, pơtong rơđah boh tơhnal man pơdong, jao glăi či mă yua. 2 boh sang dŏ glăi ăt hlăk pơtrut hmar man pơdong, ngă giong tañ, hlâo kơ bơyan hơjan hlim kơthel truh pơ anăp.

Ơi Hà Lương Đức Kơ-iăng khua ping gah să Hòa Mỹ, tơring čar Dak Lak brơi thâo, Jơnum min mơnuih ƀôn sang tơring čar hơmâo djru prăk kăk man pơdong 9 boh sang dŏ hrŏm djru kơ ană plơi amăng mông ječ ameč ia ling dăo, či nao dŏ kơđap. Truh ră anai, hơdôm ring bruă anai ngă giong laih truh 98% rơnoh bruă jao, prăp lui jao ĕp glăi pơtong boh tơhnal man pơdong, bơwih brơi kơ mơnuih ƀôn sang dŏ amăng bơyan hơjan hlim, ia ling dăo ngă čơdong truh laih.

“Hơdôm ring bruă man pơdong sang pơhlom ia ling dăo tui jơlan hơdră ngă hrŏm mơ̆ng dlông pơtrun, khom giong amăng kơnôl 15/9. Tui hăng tơlơi git gai anun, Jơnum min mơnuih ƀôn sang djop să, hlăk ngă hrŏm hăng pô anom bruă tuh pơ alin, man pơdong pơtrut hmar, pơdong kiăng djơ̆ hrơi blan pơkă, hơdôm bruă dŏ glăi, ngă hiư̆m pă hmao hăng hrơi blan pơkă, pioh ba yua pơhlom ia ling dăo, hơmâo anih brơi mơnuih ƀôn sang dŏ kơđap”.

Bruă tuh pơ alin man pơdong sang pơhlom ia ling dăo kơ mơnuih ƀôn sang amăng plơi pla, kiăng ngă tui djơ̆ jơlan hơdră tơlơi pơtrun mơ̆ng ping gah, kơnuk kơna ta amăng bruă djru pơhlom hlâo tơlơi truh sat kơ mơnuih ƀôn sang hăng pơgang ba kông ngăn dram gơnam ană plơi pla amăng mông ječ ameč truh lơ̆n adai ngă, hơjan hlim ia ling dăo rơbŭ kơthel ngă, tơbiă rai mơ̆ng anŏ pơblih ayuh hyiăng lơ̆n tơnah. Laih dơ̆ng, djop ring bruă djru hrŏm ngă pơgiong jơlan glông nao rai, sang dŏ, jing anih pioh kơ ană plơi pla nao kơđap, kiăng hơđong amăng mông ječ ameč ƀơi djop plơi pla, juăt hơmâo tơlơi truh ia lip amăng tơring čar Dak Lak.