Sang hră pơtô hrăm gưl muai Gia Bắc, să Sơn Điền, tơring čar Lâm Đồng hơmâo 7 boh anih hrăm hăng 230 čô ană amôn čơđai muai mơ̆ng 25 blan truh kơ 6 thun mut hrăm hăng 98% lĕ mrô ană bă djuai ania ƀiă K’Ho Nôp soh. Tơdơi kơ 2 wơ̆t hrơi tơjuh laih jơnum mut thun hrăm phrâo, bruă đing nao lăng ba mơnong ƀong huă kơ čơđai sang hră dŏ glăi amăng sang hră tơhrơi, dưi hơmâo khua mua, nai pơtô amăng sang hră đing nao ngă djơ̆ tơlơi phiăn pơkă. Khul khua mua sang hră gưl muai Gia Bắc ăt dăp hơdră, čih pơkra lu hơdră, ĕp lu anih či ngă hrŏm pioh ĕp blơi hăng pơdŭ pơgiăng mơnong ƀong huă mơ̆ng anih phun Di Linh, ba nao pơ djop sang hră kiăng kơ añăm hla rơ̆k dŏ asăt, añăm mơnong dŏ hiam asăt, huăi răm hăng brŭ hiă či hơtŭk brơi kơ čơđai muai sang hră ƀong huă. Anih pơdŭ pơgiăng nao añăm pơtam anun ataih 35 km.

Nai neh Nguyễn Thị Tuyết Lan, Khua sang hră gưl muai Gia Bắc brơi thâo, hrŏm hăng gơnam yua mă bruă prăp lui phrâo, hiam pioh pơtô hăng hrăm, dŏ blơi thim lu mơta gơnam yua tơnă asơi hơbai añăm čem rông ba čơđai sang hră gưl muai kiăng hơdjă rơgoh, djơ̆ hnơ̆ng pơkă, anun lĕ tơlơi ƀuăn mơ̆ng khua sang hră hăng amĭ ama čơđai sang hră:

“Đing nao klă hloh mơnong ƀong huă kơ ană amôn čơđai muai anet, gơmơi pơphun pơjing mơnong ƀong huă hrup pơ sang anŏ, sui ha wơ̆t pơphun hơtŭk riă pơdă gơnam, pŭ asơi añăm brơi čơđai muai ruah mă mơnong hơgĕt či ƀong huă, tui hluai pô. Amĭ ama čơđai nao lăng, ĕp tơl anih, ƀuh ană bă dŏ huă ƀong pơ sang hră, hơmâo añăm ia hlor pơđao, rơgoh hơdjă, wai lăng tong ten biă mă, laih anun pơtô hrăm kơ čơđai hrăm lu mơta amăng sang hră, tơbiă pơrơngiao bơtơpư̆ hlư̆ ngui ngor mơak anun amĭ ama ƀing čơđai đăo kơnang biă mă”.

Ƀơi sang hră gưl sa hăng gưl dua Gia Bắc, 656 čô čơđai sang hră tơdơi kơ abih mông hrăm amăng anih, dŏ tơbiă ngui pơ rơngiao mơak hloh, pok brơi lu tơlơi hrăm gah rơngiao tŭ yua kơ drơi jăn, pran jua čơđai. Yua kơ anun, mah kiah găn rơgao 2 wơ̆t hrơi tơjuh đôč, yap mơ̆ng hrơi jơnum mut thun hrăm phrâo, čơđai sang hră juăt laih hăng tơlơi tơpă djơ̆ rơ-ua tơlơi pơtô hrăm, triăng hrăm hră hăng hor hloh. Amôn Ka Mộng Diệu, čơđai sang hră anih 5C, Sang hră gưl sa hăng gưl dua Gia Bắc, să Sơn Điền, brơi thâo:

“Kâo ƀuh nao sang hră mơak biă mă yua dưi dŏ hrŏm hăng ƀing gơyut gơyâo. Gơnam yua hrăm hră ƀing gơmơi hơmâo djop. Amăng anih hrăm hơmâo nai neh djru ba lu jơlan hơdră tơlơi hrăm hră pơar. Kâo hor mơ̆n hrăm tơlơi hrăm jŭ yap Toán hăng tơlơi hrăm adoh. Drơi jăn kâo pô khom gir run lu hloh amăng thun hrăm anai, kiăng tŭ mă tơlơi bơni čơđai sang hră rơgơi djop mơta tơlơi hrăm”.

Thun hrăm 2026-2027 să Sơn Điền hơmâo 2 boh sang hră gưl muai, sa boh sang hră gưl 1 hăng 2, abih bang 1.722 čô čơđai sang hră, mrô čơđai sang hră mơnuih djuai ƀiă truh 94%. Hrŏm hăng jơlan hơdră mơ̆ng Ping gah, kơnuk kơna djru brơi lui hĭ mă prăk apah hrăm hră, ƀing čơđai sang hră ƀơi să Sơn Điền hơmâo tơlơi djru ba mơ̆ng gong gai să, djop khul grup mơnuih tơpuôl hăng lu mơnuih hơmâo pran jua čơmah gah rơngiao tơring čar Lâm Đồng. Mah kual tơnap tap hai samơ̆ djop sang hră ƀơi Sơn Điền lêng kơ man pơdong hiam soh. Ƀing čơđai sang hră mut hrăm hră hơmâo eng ao phara hơjăn kơ sang hră lăng hiam rơguăt, anun čơđai sang hră hơ̆k kơdơ̆k mơ̆n nao hrăm hră. Ơi Vũ Đức Nhuần, Khua Jơnum min mơnuih ƀôn sang să Sơn Điền, lăi pơtong:

“Să Sơn Điền lĕ să tơnap tap samơ̆ bruă pơtô hrăm lĕ jing tŭ yua hmư̆ hing mơ̆n amăng tơring čar. Mah tơnap tap hai, ăt gir run pơtô hrăm klă, ngă djơ̆ tơlơi Khua mir sir Hồ Chí Minh tom pơtô laih. Thun hrăm phrâo djop sang hră hơmâo prăp lui klă laih anun ƀing nai neh pơtô hrăm lêng kơ hur har mut thun hrăm phrâo. Ƀing gơmơi kơnang kơ anom bruă wai lăng tơlơi bơwih ƀong huă đing nao djru ba hmao kru djop sang hră tơlơi hơgĕt či kiăng phrâo”.

Hrŏm hăng bruă ngă kiăng tañ hơđong bruă pơtô hăng hrăm tơdơi kơ 2 wơ̆t hrơi tơjuh mut thun hrăm phrâo, khua mua 5 boh sang hră mơ̆ng gưl muai truh pơ gưl dua amăng să tơnap tap Sơn Điền, tơring čar Lâm Đồng ăt hlăk hur har ngă tui bruă pơ blih ba yua mrô hăng atur tơlơi pơhing bơwih brơi kơ bruă git gai wai lăng, pơtô hrăm. Hăng anŏ kơƀah hơdrôm hră hrăm, biă mă ñu anih 9, nai pơtô Nguyễn Đình Tú, Khua sang hră gưl sa hăng gưl dua Gia Bắc, să Sơn Điền, brơi thâo, lơ̆m dŏ tơguan hră djru ba, sang hră hơmâo lu hơdră pơsir kiăng tañ djop hơdrôm hră hrăm brơi kơ čơđai sang hră:

“Lơ̆m hơdrôm hră hrăm tal 1 đưi pơgiăng glăi truh pơ anih dưm hră, sang hră hơmâo pơpha tui hluai mrô čơđai amăng sang hră. Bơhmutu, sa khul anih hrăm hơmâo 100 drăm hơdrôm hră, pơpha bơkơnar kơ ƀing čơđai sang hră mă yua. Dua lĕ, pơpha čơđai sang jĕ giăm sa boh ƀut yua hrŏm ding dăng sa drăm hơdrôm hră. Sang hră pơphun brơi jơnum khul pioh pơpha djơ̆ găl brơi čơđai pơblih nao rai mă yua hơdrôm hră či hrăm”.

Mơ̆ng hơdôm mông huă ƀong amăng sang hră dưi đing nao djop, rơgoh hơdjă truh pơ anih hrăm hiam klă, tơlơi djru ba tong ten mơ̆ng ƀing nai pơtô gum hrŏm gong gai kơnuk kơna, amĭ ama čơđai sang hră, hrŏm hăng abih glông bruă kơđi čar ngă hrŏm pơjing atur pok thun hrăm phrâo lu tơlơi mơak biă mă kơ să kual ataih Sơn Điền, tơring čar Lâm Đồng. Hăng tơlơi ngă bruă khut khăt hloh “Să tơnap hai samơ̆ bruă pơtô hrăm lĕ klă”, Sơn Điền hlăk yak nao pơblih phrâo, hơmâo tơlơi đing ba, tuh pơ alin boh tơhnal hơmâo ƀuh rơđah rơđong tum teč, dơ̆ng mơ̆ng mông huă ƀong hăng rim hrơi ană amôn nao sang hră hơmâo pran jua mơak mơai soh.