Ƀơi mông jơnum, Khua Khul mơnuih tha rơma Việt Nam, ơi Nguyễn Thanh Bình lăi pơtong, mơ̆ng gru grua đưm juăt pia “Pơpŭ kơ ƀing tha, pơyom tơlơi hơdip truh tơnŭk”, tơlơi phiăn, juăt ngă “mơñum ia hơdor kơ pô klơi” truh kơ pran jua juăt ngă “thun jai lu, tơlơi pơmin jai prong”, mơnuih tha rơma Việt Nam pơmin hiam kơjăp ngă bruă hơkrŭ, pran jua khăp kơ lơ̆n ia, pran jua ngă bruă gơgrong ba hăng kiăng pơyơr pran jua kơ bruă mă, djru hrŏm tơlơi pơmin, ai hơtai, tơlơi thâo, kơnuih hiam hăng tơlơi kiăng mơ̆ng pô djru nao amăng bruă man pơdong hăng pơgang Lơ̆n ia.

Lăng glăi rơwang bruă pơ klôn adih, guang  bruă laih rơgao, djop gưl khul mơnuih tha rơma hơmâo pơblih phrâo na nao laih boh yom phun amăng bruă mă, anăp či ngă bruă, lăng nao pơ kual plơi pla jing anom bruă pơyŭ hăng hơmâo ba glăi boh tơhnal tŭ yua mơ̆ng djop mơta bruă. Akŏ pơdong anih dŏ mă bruă, pơphun brơi khul grup kiăng djop mơnuih đing nao, djru ba, bruă mă pơgang, wai lăng hăng pơđĭ tui tơlơi gơgrong mơ̆ng ƀing tha rơma hơmâo lu tơlơi pơblih hiam klă.

Lu hơbô̆ bruă sit nik dưi ngă djă pioh, pok pơhư prong tui kah hăng khul ngă hrŏm lu hnơr thun pơdjru nao rai tơdruă; hơdôm khul grup gru grua hiam, adoh suang, rơjang drơi jăn, pơtop ngă kơjăp, pơđĭ suaih pral pran jua, wai lăng tơlơi suaih pral, pơgang anih dŏ jum dar hăng djru tơlơi bơwih ƀong huă. Bruă ngă hrŏm “Thun jai lu-Gru hiam jai bơngač” ăt ngă bang tui, hăng hơdôm klăk čô mơnuih tha rơma ngă hrŏm man pơdong ping gah, akŏ pơdong bruă kơđi čar, pơsir tơlơi hơmâo mơ̆ng pơyŭ plơi pla, pơsur hrăm hră, pơtrut pran jua ƀing rơgơi kơhnâo, djru hrŏm pơgang rơnuk rơnua, man pơdong plơi pla phrâo, plơi prong thâo rơgơi, rơguăt hiam.

Lu mơnuih tha rơma hur har mă bruă, pơkra ming, sĭ mơdrô; ƀuh lu mơnuih tha rơma ba gru hlâo bơwih ƀong huă rơgơi, pơđĭ kyar bruă ngă hmua hơdjă rơgoh, bơwih bong huă pơhlom khŏp akŏ klôn. Hơdôm bruă gum hrŏm mơ̆ng ƀing tha rơma amăng sang anŏ hăng khul mơnuih mơnam jai hrơi ƀuh lăp čih pioh biă.

Amăng mông lơ̆n ia yak nao amăng črăn phrâo hăng lơ̆m hơmâo lu mơnuih tha rơma hloh, mrô mơnuih tha rơma hmar đơi, Khua khul mơnuih tha rơma Việt Nam lăi pơtong, sa amăng hơdôm boh yom phun kiăng pok pơhai lĕ, pơđĭ kyar “bơwih bong huă prăk”, kiăng lăi lir hơbit hăng anŏ kiăng jai hrơi ngă lu mơta hơmâo mơnuih tha rơma tŭ mă kah hăng bruă pơjrao duăm ruă, wai lăng tơlơi suaih pral sui, djru sang dŏ, gru grua hiam, hyu ngui, pơtô pơjuăt, ba yua boh thâo ia rơgơi tơlơi pơhing hăng bruă bơwih bơwang gêh găl, pơblih kơtang mơ̆ng tơlơi pơmin “wai lăng” nao kơ bruă pơgang rah, wai lăng rah, pơtrut tui rah tơlơi gơgrong mơ̆ng ƀing tha rơma:

“Anun lĕ jơlan ngă tui yom biă mă amăng jơlan hơdră dêh čar pơtrun, pioh ngă djơ̆ găl brơi rơnuk lu mơnuih tha rơma amăng mrô mơnuih ră anai; ngă gêh găl brơi djop mơnuih tha rơma dưi dŏ hơdip mơak klă hăng pơyơr pran jua kơ bruă mă. Hrŏm hăng anun, kiăng akŏ pơjing khul khua mua amăng Khul tha rơma amra ngă bruă hur har hăng pran jua beč bal, pơblih yua mrô pơgang anŏ mơtah mơda, kơtưn ngă hrŏm hăng djop gưl anom bruă, djop sang bruă pioh ngă tui klă hloh bruă pơgang, wai lăng hăng pơđĭ tui tơlơi gơgrong mơ̆ng ƀing tha rơma amăng rơnuk phrâo”.

Ƀơi anăp tơlơi kiăng dưi bong glăi hăng anŏ pơblih hmar đơi mrô mơnuih tha rơma lu, Khua Jơnum min djop djuai ania mơnuih mơnam dêh čar, yă Bùi Thị Minh Hoài lăi pơtong, kiăng pơblih phrâo tơlơi pơmin amăng bruă wai lăng khul mơnuih tha rơma, pơblih mơ̆ng tơlơi dơnong lăng ba ƀing tha rơma tŭ mă tơlơi djru jơlan hơdră, nao kơ bruă jao ƀing tha rơma ngă pô mut hrŏm pơđĭ kyar, ngă gêh găl pioh kơ ƀing tha rơma ăt djru hrŏm hơdip mơda mơak hlak, suaih pral, hơdip tŭ yua hăng djru hrŏm gêh găl djơ̆ hăng tơlơi suaih pral, tơlơi thâo, bruă tom găn rơgao, tơlơi či kiăng mơ̆ng ƀing gơñu.

Khua Jơnum min djop djuai ania mơnuih mơnam Việt Nam, yă Bùi Thị Minh Hoài rơkâo, djop gưl anom bruă ping gah, gong gai kơnuk kơna, jơnum min djop djuai ania djop gưl, djop khul grup mơnuih mơnam mut phung hăng Khul mơnuih tha rơma ăt ngă giong tơlơi pơtrun, jơlan hơdră, pơblih phrâo boh yom phun mă bruă, hơdră pơphun bruă mă; đing nao kơ ƀing tha rơma dŏ tơnap tap, sang anŏ ƀun rin, ƀing tha rơma hyiăl amăl, dŏ pơ plơi pla kual ataih, kual asuek, plơi pla mơnuih djuai ƀiă; laih dơ̆ng ngă gêh găl brơi kơ ƀing tha rơma gum hrŏm djru pơgôp hiăp akŏ pơdong ping gah, akŏ pơdong gong gai kơnuk kơna, pơtô hrăm gru grua đưm, pơsir kơđi tơlơi amăng plơi pla, pơgang tơlơi rơnuk rơnua hơđong hăng akŏ pơdong tơlơi hơdip hiam mơak rơguăt rơnôm plơi pla. Laih dơ̆ng pơdah rai pran jua đăo kơnang kơ djop gưl rơnuk ƀing tha rơma Việt Nam, dưi djă pioh pran jua mă bruă “thun jai lu-Gru hiam bơngač tui”, hrŏm hăng abih bang ping gah, mơnuih ƀôn sang, amăng ling tơhan ngă tui anŏ kiăng pơđĭ kyar lơ̆n ia hiam klă, pơdrong sah, thâo rơgơi, hyuk hyak mơak klă. Khua Jơnum min djop djuai ania mơnuih mơnam Việt Nam, yă Bùi Thị Minh Hoài lăi pơtong:

“Ngă tui bruă mă pơgang klă, wai lăng hăng pơđĭ tui tơlơi gơgrong ba mơ̆ng ƀing tha rơma; wai lăng, pơgang tơlơi suaih pral, djru ba ƀing tha rơma sang anŏ tơnap tap, ƀu lui ƀing tha rơma kơƀah tơlơi djru pơgang ba suaih pral, pơtrut pran jua ƀing tha rơma ngă djơ̆ tơlơi pơmin, pran jua, tơlơi thâo thăi amăng bruă mă, pơgôp hrŏm pơđĭ kyar bơwih ƀong huă ƀơi plơi pla hăng lơ̆n ia, akŏ pơdong khul gum pơgôp djop djuai ania; ngă pô pơtruh brơi kơjăp plah wah ping gah, Kơnuk kơna hăng mơnuih tha rơma. Djop gưl anom bruă ping gah, gong gai kơnuk kơna ngă gêh găl djru ba kiăng mơnuih tha rơma ăt ngă hrŏm pơgôp ba tơlơi pơhiăp akŏ pơdong ping gah, akŏ pơdong gong gai kơnuk kơna, pơgang rơnuk rơnua hơđong, man pơdong tơlơi hơdip mơda rơguăt gru grua hiam hăng ngă kơjăp tui amăng khul gum pơgôp djop djuai ania.