Hơdôm hrơi tong krah blan 9, ƀơi kual plơi pla phrâo amăng kual lŏn tơhroh să Cát Tiến, tơring čar Gia Lai, rơbêh 40 boh sang anŏ glăk ječ ameč man pơdong sang phrâo. Kual plơi pla phrâo ataih mơng plơi hơđăp hơdôm rơtuh met, ƀơi anai lŏn dơng dơ̆, hơmâo glông hrĕ apui lơtrik, ia yua hăng jơlan tuh pơ alin man pơkra ha amăng plĕ. Jing sa amăng hơdôm boh sang anŏ man pơdong sang giong tañ hloh, ơi Bùi Thanh Vương hơdai nao dŏ pơ anih phrâo hơmâo ha blan laih. “Kơnuk kơna đing nao djru kiăng neh met wa nao dŏ pơ plơi pla phrâo, tơlơi anai ngă neh met wa hok mơ-ak biă. Bơyan hơjan hlim ƀiă truh laih yua anun neh met wa čang rơmang arăng man pơdong sang tañ giong kiăng bĕ hĭ hơdôm anih lŏn tơhroh giăm kơčong čư̆, ƀơi anai truh bơyan hơjan hŭi biă. Ră anai hơmâo hơmâo djop mơnuih dăng hyu hrĕ apui lơtrik, pơkra đing ia yua, anun ngă kơ bruă mă tañ ƀiă. Kơnong kâo pô hơmâo 2 pok hră lŏn sang, anai lĕ 2 blah lŏn arăng phrâo djru brơi”.

Hrŏm hăng sang anŏ ơi Vương, lu sang anŏ pơkŏn amăng plơi Trung Lương, să Cát Tiến ăt gơgrong man pơdong sang mơtăm lơm arăng jao lŏn, hăng tơlơi čang rơmang tañ tơbiă mơng kual amuñ ƀuh lŏn tơhroh. Ơi Mai Trần Hải, mơnuih dŏ amăng plơi Trung Lương brơi thâo, hlâo adih truh bơyan hơjan kơthel, sang anŏ ñu khŏm nao kơđăp pơ kual rơnuk rơnua. Ră anai hơmâo lŏn man pơdong plơi pla phrâo hăng djru brơi prăk, sang anŏ hơmâo apah arăng man pơdong sang phrâo. “Lŏn pơtâo lơm tơhroh trun amra dor abih sang dŏ, yua anun khŏm ba đuăi abih mơnuih ƀôn sang, ƀu brơi hlơi dŏ glăi ƀơi anai”.

Tơlơi ngă bơngô̆t anai lĕ mơng bruă lŏn tơhroh kơtang ƀơi čư̆ Cấm amăng blan 11/2021, ngă dor rơbêh 40 boh sang amăng plơi Trung Lương. Tơring čar Bình Định hơđăp hơmâo lăi pơthâo bruă djru ječ yua lŏn tơhroh ƀơi kual anai. Ƀon lan pơjing akŏ bruă dưm dăp plơi pla phrâo brơi 64 boh sang anŏ amăng kual hŭi rơhyưt. Ơi Lại Minh Đức, Khua plơi Trung Lương brơi thâo, truh ră anai, 44 boh sang anŏ hơmâo hăng glăk man pơdong sang phrâo. “Kual plơi pla phrâo ră anai neh met wa nao dŏ laih, giăm 80% tŭ mă prăk djru nao dŏ pơ plơi pla phrâo kiăng man pơdong sang phrâo. Bơ 20 boh sang anŏ ăt glăk tŏ tui pơtrut pơsur kiăng nao dŏ pơ anih phrâo”.

Ơi Nguyễn Ngọc Thạch, kơ-iăng Khua anom bruă bơwih ƀong să Cát Tiến brơi thâo, ƀon lan glăk tŏ tui pơtrut tañ bruă duh glăi prăk, ba tơbiă mơnuih ƀôn sang; laih dong pơjing hơdră pơhlôm rơnuk rơnua brơi hơdôm boh sang anŏ aka ƀu nao dŏ pơ anih phrâo. “Amăng hrơi blan pơ anăp gir run pơtrut tañ bruă ba đuăi kiăng neh met wa hơđong tơlơi hơdip pơ anăp anai, Jơnum min mơnuih ƀon sang să ăt pơjing akŏ bruă ba đuăi mơnuih ƀôn sang, hrŏm hăng anun pơjing akŏ bruă pơhlôm pơgang tơlơi truh sat amăng thun 2026. Ƀu djơ̆ kơnong ƀơi čư̆ Cấm đôč ôh mơ̆ să hơmâo prap lui akŏ bruă tong ten tơdah ƀuh hơmâo tơlơi truh sat amăng ƀon lan amra gir run ba đuăi neh met wa nao pơ anih rơnuk rơnua anun lĕ kơđăp ƀơi sang hră, anih kơdư ƀiă djru brơi neh met wa”.

Mơng kual lŏn juăt dong ƀơi anăp kơ lŏn tơhroh, mơnuih ƀôn sang dŏ ƀơi kơčong čư̆ Cấm glăk ƀơƀrư̆ đuăi nao dŏ pơ kual rơnuk rơnua ƀiă. Hơdôm boh sang phrâo ƀu djơ̆ kơnong djru brơi neh met wa hơđong tơlơi hơdip đôč ôh mơ̆ ăt lĕ boh than ba glăi mơng tơlơi gơgrong ba đuăi mơnuih ƀôn sang mơng kual amra ƀuh tơlơi truh sat. Samơ̆, lơm bơyan hơjan kơthel jê̆ giăm laih, bruă pơgiong ba đuăi hơdôm boh sang anŏ ăt lĕ bruă jao kiăng ngă hloh, kiăng plai ƀiă tơlơi răm rai yua lŏn tơhroh, pơhlôm rơnuk rơnua brơi mơnuih ƀôn sang hăng kông ngăn mơnuih ƀôn sang./.