Ƀing tơhan hơmâo ĕp ƀuh, rŭ kuai hơmâo wơ̆t khua mua tơhan blah ngă să Đặng Thùy Trâm, Grup tơhan Đại đội Công binh 1 gah sang bruă khua tơhan tơring čar Quảng Ngãi laih anun tơhan plơi pla hăng mơnuih ƀôn sang dŏ lăng ƀơi  kual klơi luh, ĕp ƀuh hơdôm per tơlang tơhan djai pơsăn drơi jăn ƀơi ƀut Đồng Răm, plơi Đồng Răm.

Ƀing tơhan kơnuk kơna pok prong anih klơi kuai hăng ƀuh dơ̆ng 3 per tơlang hrŏm hăng gơnam dor hrŏm amăng atâo djai kah hăng ajao, bơnut ao hăng hrĕ hrut ao pơđao phŏ laih. Abih 3 per tơlang anun hăng gơnam dŏ hrŏm atâo hơmâo anom bruă Gru grua-Mơnuih mơnam să Đặng Thùy Trâm djă pioh, răk lui jăng jai. Tui anun yơh, truh ră anai ƀing tơhan kơnuk kơna hyu ĕp, rŭ kuai ƀuh pơtum hĭ 6 per tơlang tơhan djai pơsăn drơi jăn yua kơ lơ̆n ia amăng kual sang ia jrao tơhan hơđăp Đức Phổ, dŏ glăi ƀơi sang ia jrao Bác Mười hăng ăt dŏ pok prong anih hyu ĕp dơ̆ng pơsat hăng anih dor tơhan djai pơsăn drơi jăn yua kơ lơ̆n ia.