Jơlan hơdră anai pơphun ƀơi sang hră đôm lăm kơnuk kơna čem rông ba dua gưl, gual sa hăng gưl dua Ia Lôp. Amăng mông mơak ik jua hơgor, jua ring rai suang rup aniă čơgrai, pơdah tơlơi suang taih, pơphun lu tơlơi ngui ngor mơak pơkŏn amăng mlam čơkă Blan bơrơmi ria Tết Trung thu, brơi čơđai ƀong ƀañ jơngum hrŏm. Tal blung a čơkă Tết Trung thu amăng anih dŏ phrâo, amôn Triệu Thị Lan Anh, hrăm anih 7, Sang hră đôm lăm gưl sa hăng gưl dua Ia Lôp lăi:

“Hrơi anai, dưi ngui hrŏm čơkă trung thu mơak biă mă, kâo dŏ amăng sang hră phrâo ƀuh hiam klă, abih bang ƀing gơyut gơmơi mơak soh. Kâo rơkâo mơ-it tơlơi bơni hơdor tơngia kơ ƀing met wa khua mua, tơhan ƀô̆ đô̆i, ƀing neh wa djru tơlơi khăp pap, wơ̆t ƀing ayong amai tơdăm dra mut phung. Kâo ƀuăn gir run hloh hrăm hră triăng, săng, gưt hiăp ƀing nai pơtô”.

Ia Lôp lĕ sa kual giăm guai, tơlơi hơdip mơda sang anŏ ƀing ană amôn čơđai sang hră dŏ tơnap tap đôč. Thun hrăm anai, ƀing nai pơtô hăng čơđai sang hră đôm lăm gưl sa hăng gưl dua Ia Lôp hơmâo  tơlơi mơak yua dŏ hrăm amăng sang hră phrâo man pơdong, ba yua thun hrăm anai. Nai Phạm Duy Tĩnh, Khua sang hră brơi thâo, amăng bơyan Blan bơrơmi thun anai, hơmâo 862 čô čơđai sang hră tŭ mă gơnam djru hăng mơak ngui ngor  čơkă jơlan hơdră ngui ngor anăn “Mlam mơak Blan bơrơmi ria”, abih bang mơak mơai trơi pơđao.

“Anai lĕ anŏ gêh găl prong biă mă lapw mơak mơ̆n, ƀu kơnong kơ ƀing nai, neh pơtô hrăm hră đôč ôh, dŏ hơmâo tom ƀing ană amôn, abih bang čơđai sang hră ăt kah hăng sang anŏ ƀing čơđai sang hră pơ anai mơak soh. Hrơi anai, hơmâo jơngum ngui lăng tơlơi ngui ngor, ƀong mơñum mơak trung thu, hiam phara biă mă. 20 thun hăng anai, kâo ƀuh tal anai yơh ngă têt trung thu prong biă mă, ăt jing tal blung a mơ̆ns ang hră să Ia Lôp hơmâo ƀuh tui anai”.

Ƀơi mông ngui ngor, khul pơphun tơlơi ngui ngor hơmâo jao glăi 10 mơta hơdră bơwih ƀong huă kơ mơnuih ƀun rin, 10 boh rơdêh tang rơwang, 10 anung prăk hrăm hră hăng 890 anung gơnam anet djru ba mơnuih ƀôn sang hăng čơđai sang hră să Ia Lôp; laih dơ̆ng jao hră apah bơni kơ ƀing čơđai hrăm thâo, ngă bruă triăng hur har amăng jơlan hơdră “ Čung tơkai adơi nao sang hră”.

Hơjăn khua ping gah tơring čar Dak Lak, ơi Lương Nguyễn Minh Triết ăt jao 10 anung gơnam kơ čơđai sang hră ƀun rin gir run hrăm hră thâo hăng 100 klăk prăk djru man pơdong sang kơ mơnuih ƀun sang ƀun rin, sa boh sang anŏ djuai ania ƀiă tơnap tap hloh.

Đại tá Đỗ Quang Thấm, ding kơna git gai anom bruă ping gah sang bruă khua tơhah pơgang guai tơring čar Dak Lak lăi, anai lĕ bruă mă tŭ yua hăng hiam biă mă anăp nao kơ kual guai dêh čar, pơphun kiăng hơmâo mông mơak pioh kơ ană amôn dŏ ƀơi kual giăm guai čơkă blan bơrơmi ria, tết Trung thu.

“Anai lĕ sa bruă mă tŭ yua biă mă hăng hiam klă hloh pơdah rai tơlơi khăp pap, thâo đing nao, djru bá mơ̆ng djop gưl anom bruă, djop anom bruă hăng tơhan pơgang guai dêh čar pioh kơ ƀing ană amôn čơđai muai tơdăm dra ngek ƀơi guai dêh čar. Kơnong kơ jơlan hơdră anai, djru kơ ƀing ană amôn h’ĭn pran jua hloh kơ tơlơi djru ba mơ̆ng khua mua amăng kơnuk kơna, ling tơhan djop gưl pơtrut, kiăng ană amôn hrăm hră thâo, gir run hloh, kơñ pơgi kiăng jing mơnuih ƀôn sang tŭ yua kơdêh čar hrŏm hăng ƀing tơhan pơgang guai dêh čar djru pơgang kơjăp jơlan guai dêh čar tơdơi anai”.