Rơngiă ama, rơngiă amĭ, ƀu kơnong jing tơlơi rơngôt mơ̆ng ƀing čơđai đôč ôh ăt jing tơlơi rơngôt mơ̆ng sang anŏ. Adơi Võ Thị Ngọc Ngân, čơđai hrăm Sang hră gưl klâo Bà Điển, ƀôn prong Hồ Chí Minh, lăi: “Mơ̆ng hrơi ama djai, tơlơi hơdip tơnap biă mă, djŏp mơta bruă anet prong, ĕp prăk kăk, asơi huă añăm ƀong kơnang kơ amĭ kâo soh. Mah mă bruă glêh kơtang, prăk ƀu hơmâo đơi ôh, samơ̆ amĭ kâo ăt gir mơn, kiăng adơi amai gơmơi dưi nao hrăm hră kar hăng ƀing gŏp mơn”.

Dêh čar ta glăk hơmâo năng ai 1,5 klăk čô čơđai sang anŏ tơnap kơtang biă, amăng anun hơmâo năng ai 176 rơbâo čô čơđai drit druai, amĭ ama pơklaih lui. Lu hơdră djru hơmâo ngă, kiăng pơgang ba čơđai drit druai, čơđai arăng pơklaih lui dưi hơmâo tơlơi hơdip klă hiam hloh kah hăng: Hră pơkôl jar kmar kơ tơlơi dưi ƀing čơđai, Tơlơi phiăn ƀing čơđai, Jơlan hơdră ngă bruă dêh čar yua kơ ƀing čơđai thun 2021-2030; Tơlơi phiăn djru ba ƀing čơđai tơnap tap kơtang,...

Ră anai dêh čar ta glăk djru brơi rim blan kơ 21.000 čô čơđai drit druai. Rơngiao kơ anun, Ping gah hăng Kơnuk kơna pơtrun laih hơdră djru ba hlâo, pơtrut pơsur hơdôm khul grup, mơnuih mơnam, sang bruă bơwih ƀong amăng hăng dêh čar tač rơngiao gum tơngan, djru lăng ba tơlơi hơdip čơđai drit druai lăi hơjăn hăng čơđai tơnap kơtang lăi hrŏm.

Mơ̆ng anun lăng ba tơlơi hơdip ƀing čơđai drit druai, čơđai arăng pơklaih tui, pơjing tơlơi bơkơnar, ngă klă hloh tơlơi dưi lăp djơ̆, juh alum čơđai hơmâo pran jua, gir run hơdip mơak amăng plơi pla. Ơi Nguyễn Văn Lực, Khua khul pơgang ba mơnuih rơwen rơwô jô găng tơring čar Lâm Đồng brơi thâo: “Ƀơi Lâm Đồng hơmâo rơbêh  4.000 čô čơđai drit druai kiăng lăng ba. Rim blan gơmơi djru ba 400 čô anai, rim čô 1 klăk prăk, ha thun lĕ 4 klai 800 klăk. Laih anun lơ̆m phrâo mut thun hrăm phrâo, gơmơi jak iâu adơi amai amăng khul djru ba, ƀu rơkâo prăk djru mơ̆ng pơkŏn ôh, či lo brơi 20 čô čơđai drit druai mut hrăm gưl prong, rim čô hơmâo djru 200 klăk či hrăm amăng 4 thun. Laih dong ngă hiưm pă kiăng ƀing čơđai hơđong pran jua hơdip mơda, gir kơtir, ƀu kơnong hơdip mơak amăng mơnuih tơpuôl đôč ôh, tơdơi anai ăt djru ba mơnuih mơnam dong”.

Ơi Ngô Sách Thực, Khua khul pơgang ba mơnuih rơwen rơwô jô găng Việt Nam brơi thâo: hăng tơlơi gum djru mơ̆ng djŏp khul grup, sang bruă bơwih ƀong, mơnuih thâo pap kơ mơnuih tơnap hăng abih bang mơnuih tơpuôl, amăng 5 thun rơgao, djŏp gưl hơmâo iâu pơthưr pơgôp rơbêhj 637 klai prăk, brơi prăk hrăm hră, rơdêh tang wang, gơnam hrăm hră...kơ ƀing čơđai tơnap tap: “Khul pơgang ba mơnuih rơwen rơwô jô găng Việt Nam pơmin ngă hiưm pă kiăng lăng ba ƀing čơđai drit druai, ƀu kơnong djru gơnam tam, prăk kăk đôč ôh, kiăng djru brơi gơñu hơmâo pran gir run hrăm hră, hrưn đĭ hơdip mơda, ƀu pioh lui pô hlơi gah tlôn ôh”.

Ping gah, Kơnuk kơna ta pơsit tơlơi pơmin sa hơnong đôč, anun lĕ ană mơnuih yơh phun ñu, ngă pô, jing tơlơi gơñăm nao hăng pơtrut đĭ kyar. Yua hnun, bruă lăng ba čơđai drit druai, čơđai arăng pơklaih lui hăng mơnuih tơnap, kơƀah kơtang jing tơlơi gơgrong ngă mơ̆ng Kơnuk kơna rah, ăt jing bruă kiăng abih bang mơnuih gum ngă mơn.  Anai jing gru hiam thâo khăp pap mơ̆ng djuai ania ta, čem rông, lăng ba hăng djru brơi kiăng čơđai drit druai dưi hrăm hră, hơdip klă, hơdip jơnap, kjăp tơkai jing sa čô mơnuih hơmâo tơlơi pơmin hiam djru kơ mơnuih tơpuôl./.