Ƀơi kual giăm guai să Ƀuôn Đôn, puih kơđông tơhan wai pơgang guai Bo Heng gum hrŏm hăng hăng anom bruă tơhan blah hơdeč tơring čar Dak Lak, grup hyu djru mơnuih ƀôn prong Hồ Chí Minh hăng anih bơwih brơi tuai čuă ngui Cầu Treo Ƀuôn Đôn pơphun jơlan hơdră “Bơyan bơrơmi khăp pap” ƀơi Ƀuôn Trí. Ƀing čơđai hơmâo lăng arăng suang anai čơgrai, ngui tơlơi ngui đưm, ngui adôh suang hăng tŭ mă 695 anung gơnam. Khul pơphun ăt ƀơk 150 anung gơnam brơi hơdôm boh sang anŏ tơnap tap. Ƀơi să giăm guai Ia Rvê, puih kơđong tơhan Ia Rvê hơmâo ƀơk rơbêh 1.300 anung gơnam brơi ƀing čơđai sang hră mơng sang hră čơđai muai truh gưl II hăng ƀing čơđai amăng ƀon lan dong.

Ƀơi kual giăm guai phương Xuân Đài, puih kơđong tơhan wai pơgang guai Xuân Đài gum hrŏm hăng Khul pơlir đah kơmơi phương jao 200 anung gơnam ƀrô bơyan blan bơrơmi. Hơdôm anung gơnam anai djru brơi ƀing čơđai kual giăm guai dưi ngui mơ-ak amăng bơyan blan bơrơmi, pơdah tơlơi gum hrŏm mơng ƀing apăn bruă, ling tơhan wai pơgang guai hrŏm hăng gưl Ping gah, gong gai, hơdôm khul grup hăng ƀing čơmah kiăng djru brơi sang anŏ tơnap tap.