Thun 2023, Kông ti apui lơtrik Dak Lak hơmâo jao giăm 288 klai prăk, anai lĕ abih tih mrô prăk tuh pơ alin man pơkra. Kông ti hơmâo kah pha tuh pơ alin brơi hơdôm ring bruă pơkra glông hrĕ apui lơtrik 110 kV rơbêh 14 klai prăk, glông hrĕ apui lơtrik trung hạ thế rơbêh 223 klai prăk, hăng ring bruă pơkŏn giăm 50 klai prăk. Truh ră anai, kông ti hơmâo jao trun ngă pơgiong 14 ring bruă, abih tih rơbêh 52,2 klai prăk, pơkrem rơbêh 19 klai prăk pơhmu hăng jŭ yap hlâo anun. Kiăng kơ jao trun abih rơbêh 95% tui tơlơi pơkă amăng thun, ră anai hơdôm anom bruă glăk ječ ameč pok pơhai lu hơdră bruă kiăng pơtrut tañ bruă man pơkra, blơi gơnam kiăng pơhlôm djop gơnam, măi mok dưm truă.

Amăng anun, Khul git gai ring bruă ngă gong jơlan gum hrŏm kơplah wah hơdôm anom bruă črâo ba, dưm truă, anom bruă mă yua. Hơdôm anom bruă pơkŏn gơgrong čih pơkra hrơi mông kup apui lơtrik pơhlôm brơi kơ bruă dưm truă, pơphô bruă, pơsir hĭ hmao tlôn hơdôm tơlơi gun găn kiăng pơgiong hơdôm ring bruă djơ̆ hrơi mông pơkă hăng pơhlôm klă hloh. Bruă đing nao pơgiong hơdôm ring bruă tuh pơ alin man pơdong amra pơgôp pơplih pơkra, hrưn đĭ klă dong mă yua apui lơtrik brơi abih bang mơnuih amăng tơring čar Dak Lak.