Hră lăi pơthâo amăng mông pơphun brơi ƀuh 3 thun laih rơgao, Jơnum min djop djuai ania mơnuih mơnam djop gưl amăng tơring čar Dak Lak hơmâo pơtrut gum pơgôp giăm 60 klai prăk, djru brơi mơnuih ƀun rin tui tơlơi pơkă hăng man pơdong 925 boh sang gum pơgôp. Hăng anăn pơphun “Hơdôm klăk čô mơnuih gum djru, hơdôm rơbâo boh sang gum pơgôp”, mông pơphun ngă tui blan yua kơ mơnuih ƀun rin thun 2023 ƀơi Dak Lak lĕ hrơi pơphun yôm phăn pơdah pran gum pơgôp, pơpŭ tơlơi yôm ngă tui bruă gum djru mơnuih ƀun rin.

Amăng mông pơphun, khul pơphun hơmâo hră pơ-ar mơ-it hăng iâu pơthưr djop khul grup, ƀing mơnuih, anom bơwih ƀong sĭ mơdrô, ƀing čơmah mut hrŏm gum pơgôp kiăng pơđĭ kyar keh prăk, ngă gêh gal kiăng tŏ tui gum djru brơi mơnuih ƀun rin. Pô pơ ala Jơnum min djop djuai ania mơnuih mơnam djop gưl amăng tơring čar ăt ba tơbiă rơnoh prăk ƀuăn pơtrut gum pơgôp kiăng pơjing keh prăk. Pơđut mông pơphun, khul hơmâo tŭ mă 13 klai 600 klăk prăk mơng hơdôm khul grup, anih anom hăng ƀuăn djru brơi keh prăk yua mơnuih ƀun rin tơring čar.