VOV4.Jarai - Prăp mut thun hrăm phrâo 2022-2023, Dak Lăk glăk ngă bruă ječ ameč, man pơkra glăi sang hră, anih hrăm; blơi gơnam bơwih brơi bruă pơtô hrăm kơ hơdôm boh sang hră. Thun hrăm anai, tơring čar Dak Lăk tuh pơ plai giăm 488 klai prăk pioh man phrâo, pơkra glăi sang hră hăng blơi gơnam pioh pơtô hrăm kơ hơdôm boh sang hră mơng anih muai truh kơ gưl 3. Prăk man pơkra pioh djru kơ plơi pla kual ataih, tơnap tap, kual giăm guai ƀơ̆i hlâo, biă ñu hơdôm boh sang hră gưl 1, pơhlôm hrăm mơguah tlam mơtăm amăng ha hrơi tui tơlơi pơtô hrăm phrâo thun 2018.

Sang hră gưl sa Y Jut, tơring glông Buôn Đôn, Dak Lăk hơmâo man pơkra phrâo 3 boh anih hrăm

Tui hăng Gơnong bruă pơtô hăng pơjuăt tơring čar Dak Lăk, mah prăk tuh pơ plai kơ bruă pơtô hrăm lêng hơmâo tơring čar lăng ba, samơ̆ kiăng hơmâo djŏp gơnam yua pioh pơtô tui hơdră hrăm phrâo, tơring čar ăt kơƀah mơn 500 anih hrăm. Gơnong bruă pơtô hăng pơjuăt Dak Lăk hơmâo ngă hră laih, rơkâo kơ Jơnum min mơnuih ƀon sang tơring čar pơsir brơi bruă anai.

Siu H’Mai: Pơblang