VOV4.Jarai-Truh ră anai, rơbêh 90% mrô sang anŏ ƀun rin, giăm ƀun rin ƀơi tơring čar Dak Nông hơmâo čan prăk djru kơmlai ƀiă pioh pơtrut bơwih ƀong huă. Ră anai, tơring čar ăt hlăk pơtrut brơi ba rơnoh prăk djru mơnuih ƀôn sang čan tañ, kiăng mơnuih ƀôn sang čan rŭ pla glăi phun boh troh, đang hmua tơdơi kơ klin Covid 19 ngă. Truh abih blan 6/2022, rơnoh prăk čan tui hơdră djru mơ̆ng kơnuk kơna ƀơi Dak Nông truh kơ 3.640 klai prăk, đĭ tui giăm 15% pơkă hăng mơ̆ng akŏ thun. Anai lĕ boh tơhnal đĭ tui lu hloh aka ƀu hơmâo djơ̆ ôh mơ̆ng hlâo truh ră anai.

Mơnuih ƀôn sang ƀun rin nao čan prăk ƀơi tơring glông Dak Rlâp

Ơi Đào Thái Hòa, Khua sang bruă prăk djru mơnuih mơnam ƀơi tơring čar Dak Nông brơi thâo, sang bruă prăk anai hơmâo akŏ pơjing 1.600 grup pơkrem prăk laih anun brơi čan pơblih nao rai pơ kual plơi pla, ngă gêh găl kơ mơnuih ƀôn sang dưi nao čan prăk tañ hloh, laih dơ̆ng krăo lăng, pơtô brơi hơdră tuh pơplai mă yua prăk čan djơ̆ hơdră, ngă hmua pla pơjing ba glăi boh tơhnal tŭ yua, ngă hrom djop sang bruă kơnuk kơna amăng tơring čar, sem glăi djop mơnuih hơmâo anăn čan ƀơi djop plơi pla laih anun pơpha prăk pơhrua nao kiăng djop hăng hmao kru.

Nay Jek: Pơblang